قۇقىق قورعاۋ ورگاندارىنىڭ كاسىپكەرلەردى قۋدالاۋىن ءبىرجولا توقتاتۋ كەرەك - پرەزيدەنت

پرەزيدەنت قازاقستان حالقىنا جولداۋى بارىسىندا كاسىپكەرلىكتىڭ بۇگىنگى احۋالىنا دا ەرەكشە توقتالىپ ءوتتى.

«بيلىك پەن بيزنەستىڭ اراسىندا سىندارلى ديالوگ بولۋى قاجەت. قازىرگى وتپەلى كەزەڭدە مەملەكەتتىك ورگانداردىڭ كەمشىلىككە جول بەرەتىنى, كەيدە اسىرا سىلتەيتىنى جاسىرىن ەمەس. سوندىقتان ەكونوميكالىق سيپاتتاعى كەيبىر زاڭ بۇزۋ ارەكەتتەرىن قىلمىس ساناتىنان الىپ تاستاۋ جۇمىسىن جالعاستىرۋ قاجەت. بۇل جەردە ءسوز كاسىپكەرلەرگە جانە ولاردىڭ ەكونوميكالىق تەرىس ارەكەتكە قاتىستى ىستەر تۋرالى بولىپ وتىر», دەدى قاسىم-جومارت كەمەل ۇلى.

بۇل رەتتە مەملەكەت باسشىسى سالىق سالاسىندا زاڭ بۇزعانداردى قىلمىستىق جاۋاپكەرشىلىككە تارتۋعا نەگىز بولاتىن ءادىل مەحانيزم ەنگىزۋ قاجەت ەكەنىن قوسا ايتتى.

«قۇقىق قورعاۋ ورگاندارىنىڭ كاسىپكەرلەردى قۋدالاۋىن ءبىرجولا توقتاتۋ كەرەك. مۇنداي ارەكەتتەرگە تىيىم سالىنعان. بىراق, سوعان قاراماستان, ءالى دە جالعاسىپ جاتقانىن بىلەمىن. وسىنداي مالىمەتتەر كەيدە ادەيى تاراتىلىپ جاتادى, ءتىپتى, ولار جالعان بولۋى دا مۇمكىن. قالاي دەسەك تە, بۇل – نازاردان تىس قالدىرۋعا بولمايتىن ماسەلە. كاسىپكەرلىككە قولداۋ كورسەتۋ, سالانى رەتتەيمىز دەگەن جەلەۋمەن جاسالاتىن قىسىمدى ازايتۋ جانە باسەكەلەستىكتى دامىتۋ ماسەلەلەرىن مۇقيات تالقىلاۋ قاجەت. سوندىقتان مەن جۋىق ارادا ەلىمىزدىڭ بيزنەس وكىلدەرىمەن ارنايى كەزدەسۋ وتكىزەمىن», دەدى ەل پرەزيدەنتى.

مەملەكەت باسشىسى قازاقستانداعى بانكتەر تۇتىنۋ نەسيەسىمەن اۋەستەنىپ كەتكەنىن دە نازارعا الىپ, بۇل ازاماتتاردىڭ شەكتەن تىس قارىزعا باتۋىنا اكەپ سوقتىرعانىن ايتتى.

«بۇگىندە ناقتى سەكتورعا بەرىلەتىن كرەديت ازايىپ جاتقاندا بانكتەر تۇتىنۋ نەسيەسىمەن اۋەستەنىپ كەتتى. وسى جاعداي قارجى جۇيەسىنە تونەتىن سىن-قاتەرلەردىڭ كوبەيۋىنە جانە ازاماتتاردىڭ شەكتەن تىس قارىزعا باتۋىنا اكەپ سوقتىردى. مەنىڭ 2019 جىلى 500 مىڭ ازاماتتىڭ كەپىلسىز نەسيەسىن كەشىرۋ تۋرالى شەشىمىم جانە جاقىندا قابىلدانعان جەكە تۇلعالاردىڭ بانكروتتىعى تۋرالى زاڭ ماسەلەنى ءبىرشاما رەتتەدى. بىراق احۋالدى ءبىرجولا تۇزەۋ ءۇشىن جاڭادان جۇيەلى شارالار قابىلداۋ قاجەت», دەپ ءتۇسىندىردى قاسىم-جومارت توقاەۆ.

ءسوز بارىسىندا پرەزيدەنت قازاقستان ازاماتتارىنىڭ قارجى ساۋاتىن ارتتىرۋ وتە ماڭىزدى ەكەنىن ەسكە سالدى.

«بۇل رەتتە «Amanat» پارتياسىنىڭ «قارىزسىز قوعام» جوباسىن ەرەكشە اتاپ ءوتۋ قاجەت. سونىڭ ارقاسىندا ەلىمىزدىڭ 8 ايماعىندا 20 مىڭنان استام ادام قارجىلىق ساۋاتىن ارتتىردى. ولاردىڭ كوپشىلىگى – 10 جانە ودان دا كوپ نەسيە العان ادامدار. بۇل جوبا از ۋاقىتتا ءوزىنىڭ تيىمدىلىگىن كورسەتتى. ۇكىمەتكە «Amanat» پارتياسىمەن بىرلەسىپ, ونىڭ اۋقىمىن كەڭەيتۋدى تاپسىرامىن. «قارىزسىز قوعام» جوباسىنىڭ يگىلىگىن بۇكىل ەلىمىز كورۋى قاجەت», دەپ تۇيىندەدى مەملەكەت باسشىسى.