قازاقستان ساۋدا-ساتتىق ساياساتىندا جاڭا ءارى باتىل قادام جاساۋى كەرەك. بۇل تۋرالى مەملەكەت باسشىسى قاسىم-جومارت توقاەۆ «ادىلەتتى قازاقستاننىڭ ەكونوميكالىق باعدارى» اتتى قازاقستان حالقىنا جولداۋى بارىسىندا ايتتى, دەپ جازادى Egemen.kz.
«جۇمىسقا ءوزىمىزدىڭ شيكىزاتتى, تاۋارلار مەن كادرلاردى, باسقاشا ايتقاندا, بارلىق ىشكى مۇمكىندىكتەرىمىزدى پايدالانۋ قاجەت. ءبىز جاڭا ونەركاسىپ ساياساتى ارقىلى جاڭاشا دامۋ ۇلگىسىنە كوشۋگە ءتيىسپىز», دەپ ايتاپ ءوتتى پرەزيدەنت.
قاسىم-جومارت توقاەۆتىڭ ايتۋىنشا, مەملەكەت ءىرى كاسىپورىندارمەن بىرلەسىپ, ءوندىرىستىڭ بارلىق ساتىسى ءوز ەلىمىزدە بولۋىن قامتاماسىز ەتۋى كەرەك. ول ءۇشىن ءوندىرىس سالاسىن رەتتەيتىن جانە ىنتالاندىراتىن ءتۇرلى تاسىلدەردى قولدانۋ شارت. ماسەلەن, وڭدەۋ ونەركاسىبى شيكىزاتتى كوڭىلگە قونىمدى باعامەن ءارى جەتكىلىكتى كولەمدە الۋى كەرەك.
«سونىمەن بىرگە رەتتەلەتىن ساتىپ الۋ كەزىندەگى ءوز تاۋارلارىمىزدىڭ ۇلەسىن ارتتىرۋ جانە وفتەيك جۇيەسىن تولىق ىسكە قوسۋ قاجەت. ەلىمىزدەگى ءونىم وندىرۋشىلەرمەن جاسالاتىن وفتەيك كەلىسىم-شارتتاردىڭ ۇلەسىن كەمىندە 10 پايىزعا جەتكىزۋ كەرەك. بۇل – جىل سايىن 2 تريلليون تەڭگە دەگەن ءسوز», دەپ ناقتىلادى مەملەكەت باسشىسى.
پرەزيدەنت اتاپ وتكەندەي, بۇگىندە كوپتەگەن ەلدەر ىشكى نارىقتى قورعاۋ شارالارىن بەلسەندى قولدانىپ كەلەدى. دامىعان مەملەكەتتەردىڭ ءوزى پروتەكتسيونيستىك ونەركاسىپ ساياساتىنا كوشتى. وسى تۇستا قاسىم-جومارت كەمەل ۇلى دۇنيەجۇزىلىك ساۋدا ۇيىمى ۇسىنعان دەرەكتەردى ورتاعا سالدى.
«دۇنيەجۇزىلىك ساۋدا ۇيىمىنىڭ باعالاۋىنشا, ءبىزدىڭ ەلدەگى ىشكى نارىقتى قورعاۋ دەڭگەيى تومەن, نەبارى 128 تاريفتىك ەمەس شارا. سوندىقتان ءبىز ساۋدا-ساتتىق ساياساتىندا جاڭا ءارى باتىل قادام جاساۋىمىز كەرەك. مەملەكەت وتاندىق ءونىم وندىرۋشىلەردى قورعاۋعا مىندەتتى. بۇل – ءبىزدىڭ ەكونوميكامىز وزگەلەر ءۇشىن جابىق دەگەن ءسوز ەمەس. ەكونوميكامىز باسقا ەلدەرگە ءاردايىم اشىق بولۋعا ءتيىس. بىراق ۇلتتىق بيزنەستىڭ مۇددەسىن قورعاۋ كەرەك», دەپ تۇيىندەدى ەل پرەزيدەنتى.