تۇركىستان وبلىسىندا تۇنگى ۋاقىتتا ەكى ءتارتىپ ساقشىسى ءوز-وزىنە قول جۇمساماق بولعان قىزدى قۇتقارىپ قالدى. پوليتسيا قىزمەتكەرلەرىنىڭ دەر ۋاقىتىندا قاجەت جەردەن تابىلۋىنا پاۆلودار وبلىسىنان شالىنعان قوڭىراۋ سەبەپشى بولعان كورىنەدى.
تۇندە پاۆلودارلىق جاس جىگىت تولە بي اۋداندىق پب-عا حابارلاسىپ, تۇركىستان وبلىسىندا تۇراتىن تانىسى ءوز-وزىنە قول جۇمساعالى جاتقانىن جانە ونى تەز ارادا قۇتقارۋ كەرەكتىگىن ايتقان. پوليتسيا قىزمەتكەرلەرى ەسەنعالي اسقاربەكوۆ پەن بەيبارىس سەرىكباەۆ بىردەن قىزدىڭ تۇرعىلىقتى مەكەنجايىن انىقتاپ, دەرەۋ سول جەرگە بارادى. ۋچاسكەلىك ينسپەكتورلار ءۇيدىڭ قاقپاسىن قاققانىمەن, ەشكىم اشپاعان. سودان كەيىن ءتارتىپ ساقشىلارى ۋاقىتتى جوعالتپاۋ كەرەكتىگىن ءتۇسىنىپ, قاقپادان سەكىرىپ تۇسكەندە بەيتانىس ايەل جۇگىرىپ شىعىپ, پوليتسەيلەردىڭ نە ىستەپ جاتقانىن سۇرايدى. ولار قوڭىراۋ ارقىلى كەلگەندەرىن تۇسىندىرەدى, الايدا ايەل قىزىنىڭ ءوز بولمەسىندە ۇيىقتاپ جاتقانىن ايتادى.
ءتارتىپ ساقشىلارى سەنىمدى بولۋ ءۇشىن قىزدىڭ بولمەسىن تەكسەرۋگە شەشىم قابىلدايدى. وسىلايشا, ولار قىزدىڭ بولمەدە جوق ەكەنىن جانە اسۇيدە قوشتاسۋ حاتى تۇرعانىن كورەدى. ولار ءۇيدىڭ بارلىق بولمەسىن قاراعانىمەن, قىزدى تاپپايدى. بەيبارىس سەرىكباەۆ ءۇيدىڭ توبەسىنە اپاراتىن باسپالداقتى بايقاپ, وعان كوتەرىلىپ, سول ساتتە ارقانعا ءىلۋلى تۇرعان قىزدى كورگەن. ۋچاسكەلىك قىزمەتكەر دەرەۋ ارىپتەسىن كومەككە شاقىرىپ, ءبىرى قىزدى كوتەرىپ, ەكىنشىسى ىلمەكتى كەسىپ تاستايدى. سودان كەيىن پوليتسەيلەر وعان العاشقى مەديتسينالىق كومەك كورسەتەدى: ولار جانسىزدانعان اياق-قولىن ۋقالاپ, جاساندى تىنىس بەرىپ, جەدەل جاردەم شاقىرادى.
قىراعىلىق پەن جەدەل ارەكەتتىڭ ارقاسىندا پوليتسەيلەر وسىلايشا 24 جاستاعى قىزدى ولىمنەن قۇتقارىپ قالدى. قازىرگى ۋاقىتتا قىزدىڭ جاعدايى تۇراقتى. وقيعانىڭ تولىق ءمان-جايى ءالى دە انىقتالىپ جاتىر. اناسى ءتارتىپ ساقشىلارىنا شىن جۇرەكتەن العىسىن ءبىلدىردى. سونداي-اق پوليتسەيلەرگە دارىگەرلەر دە العىس ايتىپ, قىزدىڭ ۋاقىتىندا قۇتقارىلعانىن, ساپالى العاشقى كومەك كورسەتىلگەنىن اتاپ ءوتتى. دارىگەرلەردىڭ ايتۋىنشا, ەگەر ءتارتىپ ساقشىلارى بىرنەشە سەكۋندقا كەشىككەندە, قىز ومىرمەن قوشتاسۋى مۇمكىن ەدى.
پوليتسيا قىزمەتكەرى ەسەنعالي اسقاربەكوۆ 2009 جىلدىڭ قىركۇيەگىنەن بەرى ىشكى ىستەر ورگاندارىندا جۇمىس ىستەيدى. ۇيلەنگەن, ءۇش ۇل تاربيەلەپ وتىر. ال بەيبارىس سەرىكباەۆ – بەلگىلى ءانشى ءارى كومپوزيتور ەرجان سەرىكباەۆتىڭ ۇلى. ونەرپاز, وكىنىشكە قاراي, تۋعان قالاسى ارىستا 51 جاسىندا جول اپاتىنان قايتىس بولعانى بەلگىلى. قايعىلى وقيعادان كەيىن جاس جىگىت ءوز ءومىرىن پوليتسيا قىزمەتىمەن بايلانىستىرۋعا شەشىم قابىلداپتى. بەيبارىس 2022 جىلدان باستاپ ىشكى ىستەر ورگاندارىندا قىزمەت اتقارادى.