قاراعاندى وڭىرلىك گارنيزونىنىڭ اسكەري پوليتسيا باسقارماسىنىڭ ءۇش قىزمەتكەرى جانىپ جاتقان پاتەردەن بەس جاسار بالانى قۇتقارىپ قالدى. ولاردىڭ بۇل ارەكەتى الەۋمەتتىك جەلىلەردەگى جاريالانىمداردان بەلگىلى بولدى, دەپ جازادى Egemen.kz.
قاراعاندى وبلىسى تجد ءباسپاسوز قىزمەتىنىڭ اقپاراتىنشا, سەرجانت جاندوس ايتقالي, ەفرەيتورلار ءىزباسار تولەۋتاي مەن شىڭعىس ەرقانات 25 تامىزدا تاڭەرتەڭ قىزمەتكە بارا جاتىپ, تەرەزەلەرى وتقا ورانىپ, ءتۇتىن شىعىپ جاتقان ءبىرىنشى قاباتتاعى پاتەردى بايقاعان. وقيعا ورنى ماڭايىندا ەر ادامدار بولماي, بىرنەشە ايەل كومەككە شاقىرىپ تۇرعان ەدى.
«كوشەدە ءبىز ۇستىندەگى كيىمى كۇيىپ كەتكەن 6-7-لەر شاماسىنداعى بالانى كوردىك. ول ابدەن قورقىپ قالعان. بىزگە ءىنىسى ۇيدە قالعانىن ايتتى. تەرەزەدەن پاتەرگە كىردىم. قاتتى تۇتىننەن كوزىم جاساۋراپ, اۋا جۇتۋ ءۇشىن تەرەزەگە بىرنەشە رەت جاقىنداۋىما تۋرا كەلدى, سۋعا مالىنعان ورامال مەن فونار الىپ قايتا كىردىم. ءۇشىنشى رەت كىرگەندە عانا تۇپكى بولمەدە مىسىعىن قۇشاقتاپ, قورقىپ وتىرعان بالانى تابا الدىم», دەيدى جاندوس ايتقالي.
اسكەريلەر بالانى مىسىعىمەن قوسا سىرتقا شىعارعان. كوپ ۇزاماي ءورت سوندىرۋشىلەر كەلىپ, ءورتتى سوندىرۋگە كىرىسكەن.
توتەنشە جاعدايلار مينيسترلىگىنە اسكەري قىزمەتشىلەردى ماراپاتتاۋ ءۇشىن ۆەدومستۆولىق ناگرادا تابىستاۋ تۋرالى ۇسىنىس جىبەرىلدى.