مەملەكەت باسشىسى قاسىم-جومارت توقاەۆ جاتاقحانا تاپشىلىعى ماسەلەسىن جويۋ ماقساتىندا بەرگەن تاپسىرماسىن جۇزەگە اسىرۋ اياسىندا 300 ورىندىق جاڭا جاتاقحانا پايدالانۋعا بەرىلىپ وتىر. قر عىلىم جانە جوعارى ءبىلىم ءمينيسترى ساياسات نۇربەكتىڭ قاتىسۋىمەن الماتىدا «جاستار Apartments» جاڭا زاماناۋي جاتاقحانانىڭ اشىلۋ سالتاناتى ءوتتى, دەپ حابارلايدى Egemen.kz اتالعان مينيسترلىكتىڭ ءباسپاسوز قىزمەتىنە سىلتەمە جاساپ.
جاڭا جاتاقحاناعا الماتى قالاسىنداعى جوعارى وقۋ ورىندارىنىڭ جاتاقحاناعا مۇقتاج ءبىلىم الۋشى جاستارى ورنالاستىرىلادى.
جاتاقحانانىڭ اشىلۋ سالتاناتىنا پارلامەنت ءماجىلىسىنىڭ دەپۋتاتى ەلنۇر بەيسەنباەۆ, قالا اكىمدىگىنىڭ وكىلدەرى, جوعارى وقۋ ورىندارىنىڭ باسشىلارى, عالىمدارى مەن پروفەسسور-وقىتۋشىلار قۇرامى قاتىستى.
«ەلىمىزدە جاتاقحانا ماسەلەسى وتە وزەكتى. الماتى قالاسىندا جاتاقحانا تاپشىلىعى جوعارى. وسى ماسەلە بويىنشا ءبىز ەكى باعىت بويىنشا جۇمىس ىستەپ جاتىرمىز. ءبىرىنشىسى جەكەمەنشىك حوستەلدەرمەن جانە قوناق ۇيلەرمەن كەلىسىمشارتقا قول قويىلدى. وسى كەلىسىم ارقىلى قوسىمشا 10 000-نان استام توسەك-ورىن تابىلىپ وتىر. بۇگىندە قالادا جەر تاپشىلىعى بار. ەكىنشى باعىت - قايتا جوندەۋ جۇمىسى. ياعني بيزنەسى قۇلدىراپ كەتكەن اكادەميالىق نەمەسە جەكە مەنشىك عيماراتتارىندا ءبىز قايتا جوندەۋ جۇمىستارىن جۇرگىزىپ, جاتاقحانا رەتىندە قايتا جاساقتاپ جاتىرمىز. بۇگىنگى جاتاقحانا وسى ەكىنشى باعىت بويىنشا اشىلىپ وتىر», دەدى ساياسات نۇربەك.
عيماراتتا قايتا جوندەۋ جۇمىستارى وسى جىلدىڭ ءبىرىنشى جارتىسىندا باستالعان ەدى. جاتاقحانانىڭ ىشكى ساۋلەتى شەتەلدىك كوشباسشى ۋنيۆەرسيتەتتەردىڭ ديزاينى نەگىزىندە جاسالعان. نىسان ءتيىستى تالاپتارعا تولىق سايكەس كەلەدى. ءتورت قاباتتان تۇراتىن جاتاقحانادا اسحانا, دەمالىس بولمەلەرى, كىر جۋعا جانە كەپتىرۋگە ارنالعان تۇرمىستىق بولمە, ءار قاباتتا ءوز اس ءۇيى مەن وقۋ زالدارى قاراستىرىلعان. سونداي-اق ءار سەكتسياعا توڭازىتقىش, زاماناۋي دۋش كابينالارى مەن جاڭادان جيھازدار قويىلعان. قاۋىپسىزدىكتى قامتاماسىز ەتۋ ءۇشىن بەينەباقىلاۋ جۇيەسى ورناتىلعان.