اق كيمەشەگىمەن الىستان الاتاۋداي كورىنەتىن اق جاۋلىقتى اجەلەرىمىزدە كەشەگى اتا-بابالارىمىزدان قالعان سارقىت بار. ول ۇلتتىڭ سالت-داستۇرىنە تامىزىق بولار تالىمگە تولى. مۇنى جەتىسۋ تورىندە وتكەن «اجەلەر الەمى» بايقاۋىندا بايقادىق.
«قارقارا جاۋلىق, كيمەشەك, جىرعا وزەك بولعان, كۇيگە سەپ» دەپ اقىندارىمىز جىرلاعانداي, كيمەشەگىن كىرلەتپەي, كوڭىلىنە كىر شالدىرماي جۇرگەن سول اق سامايلى انالارىمىز جۋىردا ونەر باسەكەسىنە ءتۇستى.
وبلىستىق ارداگەرلەر كەڭەسىنىڭ ۇيىمداستىرۋىمەن ورنەك تاپقان «اجەلەر الەمى» بايقاۋى قىزىقتى ءوتتى. بالاسىن قاناتتاندىرىپ, نەمەرە مەن شوبەرەسىن باۋلىپ وتىرعان وبلىسىمىزداعى بەلسەندى اجەلەر دودا كورىگىن قىزدىرىپ, بەس كەزەڭ بويىنشا جۇيرىكتى انىقتادى.
اتالعان ءىس-شارانىڭ باسىندا وبلىستىق ارداگەرلەر كەڭەسىنىڭ توراعاسى ەرمەك كەلەمسەيىت ءسوز الىپ, رۋحانياتتىڭ ورىندە, ونەگەلى ءومىرىمىزدىڭ تورىندە تۇرعان انالاردىڭ قوعامداعى ورنىن, پارقى مەن نارقىن سالماقتاپ, بارشا اناعا ساتتىلىك تىلەدى.
جارىس شارتى بويىنشا ءوزىن تانىستىرىپ, ونەرىن, ۇلتتىق سالت-داستۇرىمىزدەن كورىنىس, قولونەر تۋىندىسىن كورسەتكەن اجەلەر, ءوز كەزەگىندە ءداستۇر بويىنشا قويىلعان ساۋالدارعا جاۋاپ بەردى. وتكەنىمىزدىڭ ونەگەسىن دارىپتەپ, ءوز ونەرلەرىن كورسەتۋ, بويىنداعى مەيىرىمدىلىك پەن ىزگىلىك قاسيەتىن سايىس ارقىلى كورەرمەنگە دارىتۋ ماقساتىندا ۇيىمداستىرىلعان بۇل دودادا قازىلار القاسىنىڭ شەشىمىمەن كوكسۋ اۋدانىنىڭ اتىنان سىنعا تۇسكەن ماكۋرا ءنۇسىپوۆا اجەمىز 3-ورىن يەگەرى دەپ تانىلدى. ەسكەلدىلىك جاقسىحان تۇرىسبەك اجەي 2-ورىننان كورىنسە, ونەرىمەن وزا شاپقان تەكەلىلىك ورالتاي اليەۆا اجەي جارىس جەڭىمپازى دەپ تانىلدى.
جارىس نەگىزىندەگى اقشالاي سىيلىقتارعا يە بولعان جۇلدەگەرلەردەن بولەك, بايقاۋدا بەلسەندىلىك تانىتقان وڭىردەگى اجەلەر ىنتالاندىرۋ سىيلىعىنا يە بولدى. ولار دا قارجىلاي سىياقىمەن ماراپاتتالدى.
جەتىسۋ وبلىسى