اتىراۋ وبلىسىنداعى ەجەلگى سارايشىق تاريحي قالاشىعىنىڭ اشىلماعان سىرى كوپ. ويتكەنى التىن وردا داۋىرىنەن باستالاتىن قالاشىقتىڭ تاريحى ءالى تولىق زەرتتەلگەن جوق. بۇل جەردەن جىل سايىن ەل شەجىرەسىنە قوسىلاتىن قۇندى جادىگەرلەر تابىلىپ وتىر.
«سارايشىق» مۋزەي-قورىعىنىڭ باس ينسپەكتورى, ارحەولوگ ايبەك تۇرار ۇلىنىڭ ايتۋىنشا, 2005 جىلى جايىق وزەنىنىڭ جارقاباعىنان مونشانىڭ جارتى بولىگى ساقتالعان ورىن انىقتالعان. ونى ارحەولوگتەر زەينوللا ساماشەۆ, مۇقتار قوجا تاپقان ەكەن. «بيىل تاعى ءبىر مونشانىڭ ورنى تابىلىپ وتىر. ەكى مونشانىڭ ءبىر-بىرىنە ۇقساستىعى بار. بۇلار جالپى حالىققا ارنالعان قوعامدىق مونشا ەمەس. جەكە ادامداردىڭ ءوز وتباسىنا ارناپ سالعان جەكە يەلىگىندەگى مونشالارى. ويتكەنى التىن وردانىڭ گۇلدەنگەن داۋىرىندە قوعامدىق مونشالار كەڭ تاراعان. كەيىننەن ونىڭ ىرگەسى ىدىراپ, بىرنەشە بولىككە بولىنگەن سوڭ ءار اۋقاتتى وتباسى وزدەرى ءۇشىن وسىنداي شاعىن مونشا اشقان. بۇل مونشانى نوعاي-قازاق كەزەڭىنە سايكەس كەلەدى دەپ ەسەپتەيمىز», دەيدى ايبەك تۇرار ۇلى.
ونىڭ دەرەگىنە قاراعاندا, مونشا ءۇش بولىكتەن تۇرادى: كيىم شەشەتىن, جۋىناتىن بولمەلەر, پەش ورناتىلعان بولىگى.
ارحەولوگتەردىڭ زەرتتەۋىنە سۇيەنسەك, سارايشىق قالاشىعىندا قوناقۇيدىڭ بولعانى داۋ تۋدىرمايدى. بۇعان ارحەولوگتەر تاپقان 14 بولمەنىڭ ورنى دالەل بولا الادى. ارحەولوگيالىق قازبا جۇرگىزۋ كەزىندە التىن وردا داۋىرىندەگى قىش بۇيىمدار مەن تيىندار تابىلعان. قىش بۇيىمداردىڭ سىرتى جاسىل تۇسكە بويالعان. ال اۆيرول ىدىسى قىزىل قىشتان جاسالعان. ءتىپتى حورەزمدىك كەراميكالار بار.
سارايشىقتاعى قازبا جۇمىستارى مادەنيەت جانە سپورت مينيسترلىگىنىڭ 2021-2023 جىلدارعا ارنالعان «قازاقستاننىڭ باتىس وڭىرىندەگى التىنوردالىق قالالار, كونە كەرۋەن جولدارى جانە كەرۋەن-سارايلار: پانارالىق زەرتتەۋلەر» ء(حىىى-حV عع.) عىلىمي جوباسى اياسىندا جۇرگىزىلىپ كەلەدى. بيىل تاريح عىلىمدارىنىڭ دوكتورى, پروفەسسور ۇ.احمەتوۆانىڭ جەتەكشىلىگىمەن 800 شارشى مەتر اۋماقتا قازبا جۇمىستارىن جۇرگىزۋ كوزدەلگەن.
«باتىس قاقپانىڭ ماڭىندا قازبا جۇمىستارى قولعا الىندى. بولاشاقتا وسى اۋماقتان تۋريستەرگە ارنالعان ءتۇرلى نىسان اشۋدى جوسپارلاپ وتىرمىز», دەيدى ا.تۇرار ۇلى.
اتىراۋ وبلىسى