جاڭا 2023-2024 وقۋ جىلىندا ءبىرىنشى سىنىپقا باراتىن بالالاردىڭ 68,2 پايىزى مەملەكەتتىك تىلدە وقۋدى تاڭداعان, دەپ حابارلايدى Egemen.kz.
وقۋ-اعارتۋ مينيسترلىگىنىڭ مالىمەتىنشە, جاڭا وقۋ جىلىندا ەلىمىزدىڭ مەكتەپتەرىندە ءبىلىم الاتىن 3,9 ميلليون وقۋشىنىڭ ىشىندە 364 مىڭ بالا ءبىرىنشى سىنىپقا قابىلدانادى.
قازىر قازاقستاندا 7,7 مىڭ ورتا ءبىلىم بەرۋ ۇيىمى جۇمىس ىستەيدى. مەكتەپتەردە ساپالى دايىندىق پەن وقۋ-تاربيە ءۇردىسىن ۇيىمداستىرۋ, سىنىپ-كەشەندەرىن قالىپتاستىرۋ قولعا الىنىپ جاتىر. ءبىرىنشى سىنىپقا قابىلدانۋشىلار الماتى قالاسىندا, تۇركىستان, الماتى وبلىستارىندا كوپ. سونداي-اق بالالاردىڭ مەملەكەتتىك تىلدە ءبىلىم الۋى بويىنشا شىمكەنت قالاسى, تۇركىستان, الماتى وبلىستارى كوش باستاپ تۇر.
ەسكە سالا كەتسەك, 2021 جىلى ءبىرىنشى سىنىپ وقۋشىلارىنىڭ 64 پايىزى قازاق تىلىندە ءبىلىم الۋدى تاڭداعان ەدى.