قازىر قوعامدا ءمامس جۇيەسىنە قاتىستى سىن-پىكىرلەر از ەمەس. راس, قانشاما ازامات مەديتسينالىق الەۋمەتتىك ساقتاندىرۋعا اقشا تولەيدى, بىراق ءوزى تىركەلگەن ەمحاناعا دەر كەزىندە ەمدەلە المايدى. ويتكەنى كەزەك كۇتۋ كەرەك. الايدا ءمامس جۇيەسىمەن كۇردەلى وپەراتسيا جاساتىپ, وڭالىپ جاتقان ازاماتتار دا جوق ەمەس.
امسق استانا فيليالىنىڭ قىزمەتكەرلەرىنە سITY كلينيكاسىنىڭ مۇمكىندىكتەرىن تانىستىرعان باس دارىگەر قانات دۇيسەنباەۆ ەمحانادا وتە سيرەك كەزدەسەتىن ەرەكشە وپەراتسيالار جاسالاتىنىن جەتكىزگەن. وسىعان بايلانىستى يگىلىكتى ءىستىڭ ءمان-جايىن دارىگەرلەردەن سۇراپ كوردىك.
«CITY ەمحاناسىندا 2023 جىلعى 16 مامىردان باستاپ وسىعان دەيىن ءمامس جۇيەسىمەن ادام اياعىندا بولاتىن ارتەريالىق قان اينالىمىن قالپىنا كەلتىرۋ بويىنشا 10 كۇردەلى وپەراتسيا جاسالدى», دەيدى ستاتسيونار جانە وپەربلوك مەڭگەرۋشىسى عاليا ابەجانوۆا.
ەلورداداعى بۇل ەمحانا ءمامس جۇيەسى بويىنشا تەگىن ەم العان العاشقى ەمدەلۋشى ۇزاق ۋاقىتتان بەرى اتەروسكلەروزدان زارداپ شەككەن 82 جاستاعى قارت كىسى اياعىنىڭ تامىرلارى تولىعىمەن بىتەلىپ, سونىڭ سالدارىنان اياعىندا قاتتى اۋىرسىنۋ تۋدىراتىن تروفيكالىق جارالار پايدا بولعان. ءتىپتى اۋىرسىنۋدى باساتىن دارىلەر دە اسەر ەتپەيتىن كورىنەدى.
«سوزىلمالى قابىنۋعا كەز كەلگەن ۋاقىتتا ينفەكتسيا ءتۇسىپ, ادامنىڭ بۇكىل اعزاسىنا كەرى اسەر ەتەدى جانە ساۋ اعزالاردىڭ جۇمىسىن بۇزۋى مۇمكىن. مۇنداي اۋرۋلاردى ەمدەۋدىڭ ءتۇرلى ادىستەرى بار. بىراق اياقتى ساقتاپ قالۋ مۇمكىن بولا بەرمەيدى. ال بۇل ناۋقاستىڭ جاعدايىندا ءتىپتى كۇردەلى بولدى. مۇنداي جاعدايدا كوبىنەسە اۋىر سىرقاتتى ەسكەرە وتىرىپ, ناۋقاسقا وپەراتسيا جاساۋدان باس تارتۋدى ۇسىنۋى مۇمكىن», دەيدى دارىگەرلەر.
قارتتىڭ ناۋقاسى قاتتى اسقىنىپ كەتكەندىگىنە جانە سوزىلمالى سىرقاتىنا قاراماستان, دارىگەرلەر جەرگىلىكتى انەستەزيا ارقىلى وپەراتسيا جاساۋعا شەشىم قابىلداعان. وسىلايشا, دارىگەرلەر اياق تامىرلارىنىڭ قان ءجۇرۋىن قالپىنا كەلتىرگەن. ناتيجەسىندە, قىسقا ۋاقىت ىشىندە تروفيكالىق جارالار تولىق جازىلىپ, ناۋقاستىڭ اياعىن كەسۋدەن ساقتاپ قالدى. ياعني قاريانى مۇگەدەك بولىپ قالۋدان امان ساقتاعان.
«اكەمنىڭ اۋىرعانىنا 20 جىلدان استى. بۇرىن دارىگەرلەر كوپتەگەن ءدارى-دارمەك تاعايىندايتىن, ونىمەن اۋىرسىنۋدى باسۋعا بولاتىن. بىراق كەيىنگى بىرنەشە جىلدا دارىلەر اسەر ەتپەيتىن بولدى. اۋىرسىنۋ باسىلماي, اكەم ۇيقىدان قالدى. بىرنەشە تەكسەرۋلەر مەن كونسۋلتاتسيالاردان كەيىن ءبىز CITY ەمحاناسىنا باردىق. كت زەرتتەۋىن جۇرگىزۋ كەزىندە انگيوحيرۋرگ ايدار پارمانوۆ اكەمنىڭ اۋرۋدان زارداپ شەگۋىنىڭ سەبەبى نەدە ەكەنىن كورسەتىپ, ءتۇسىندىردى. بۇل كەزدە اياعى قارايىپ كەتكەن ەدى. دارىگەر «بىزدە ەندى ۋاقىت جوق, اياقتى امان ساقتاپ قالۋ كەرەك» دەدى. سەبەبى وپەراتسيا جاسالماسا, دەرتى دەندەپ كەتۋى مۇمكىن ەكەن. ءبىز اكەمىزدىڭ اياعىن ساقتاپ قالۋعا مۇمكىندىك بار ەكەنىنە قۋانىپ, دەرەۋ قان تالداۋلارىن تاپسىرىپ, تەكسەرۋلەردەن وتكىزىپ, حيرۋرگيالىق ەمدەۋگە دايىنداي باستادىق. اۋرۋحاناعا جاتقىزعاننان كەيىن دارىگەرلەر اكەمىزگە ءمامس بويىنشا تەگىن وپەراتسيا جاسادى. قازىر اكەمىز ءوزىن جاقسى سەزىنەدى جانە ءبىراز جىلدان سوڭ تۇندە تىنىش ۇيىقتايتىن بولدى. بۇل رەتتە اق حالاتتى دارىگەرلەرگە العىسىمىز شەكسىز!» دەيدى ناۋقاستىڭ بالالارى.
مامانداردىڭ ايتۋىنشا, مۇنداي وپەراتسيا قان تامىرلارى تاجىريبەسىندە وتە سيرەك جاسالادى. بۇل ءوز كەزەگىندە ەلوردادا قان تامىرلارى حيرۋرگياسى ادىستەرىنىڭ ودان ءارى دامۋىنا, قازىرگى زامانعى الەمدىك دەڭگەيدە حيرۋرگيالىق كومەكتىڭ دامىعان ادىستەرىن يگەرۋگە جانە ەنگىزۋگە سەنىمدىلىك بەرەدى. سونداي-اق اتالعان ەمحانانىڭ انگيوحيرۋرگ دارىگەرى 76 جانە 85 جاستاعى ناۋقاستارعا دا وسىعان ۇقساس وپەراتسيا جاساپتى. بۇل وپەراتسيالار دا مەديتسينالىق ساقتاندىرۋ قورى ەسەبىنەن جۇرگىزىلگەن.
«بۇل وپەراتسيالار جەرگىلىكتى انەستەزيا ارقىلى جاسالدى. وپەراتسيانىڭ نەگىزى ءتاسىلى ناۋقاستىڭ قان اعىمىن قالپىنا كەلتىرۋ ءۇشىن ونىڭ ءوز كۇرەتامىرىن قولدانامىز. ول دايىندالعاننان كەيىن ارتەريالارعا تىگىلەدى, ناتيجەسىندە كۇرەتامىر شۋنت قىزمەتىن اتقارادى, ودان كەيىن ول ارتەريالانادى دا, اعزالاردى قانمەن قامتاماسىز ەتەدى. بۇل جاعدايدا كۇرەتامىردى تولىعىمەن وقشاۋلاۋدىڭ قاجەتى جوق, ويتكەنى بۇل وپەراتسيالار كلاسسيكالىق تۇرىندە جاسالادى», دەيدى انگيوحيرۋرگ ايدار تولەگەن ۇلى.
P.S: 2018 جىلى ىسساپارمەن شىمكەنت قالاسىندا جۇرگەنىمىزدە سول جەردەگى ءبىر قالامگەر اعامىزدىڭ ۇيىندە قوناقتا بولدىق. كوپ تاعىلىمدى اڭگىمە ايتىپ, شىعارىپ سالعان ەدى. ارادا الاپات كوۆيد ىندەتى بولدى, ءسويتىپ بىلتىر شىمكەنتكە تاعى جولىمىز ءتۇستى. بۇل جولى اعامىزعا ارنايى سالەم بەرە كەتۋگە ءوزىمىز بارعانبىز. قازاق مادەنيەتىنە ەلەۋلى ەڭبەك سىڭىرگەن اعامىز ءبىر اياعىمەن وتىر, ەكىنشى اياعى سانىنان تومەن جوق. ءبىزدىڭ جۇزىمىزدەگى سۇراقتى وقىپ قويعان اعامىز ءمان-جايدى بىردەن ءتۇسىندىردى. اياقتاعى قان تامىرلاردىڭ بىتەلۋى جانە جارىلۋى سالدارىنان باشپايدان باستاپ قارايىپ, ءشىري باستاعان. بۇل ءشىرۋ ەكىنشى اياققا اسەر ەتسە, ەكى اياعىنان بىردەي ايىرىلادى دەگەن دارىگەرلەر ءبىر اياعىن كەسىپ تاستاپتى. جوعارىدا ايتىلعان وپەراتسيانى ەستىگەندە ويمىزعا وسى قالامگەر اعامىزدىڭ جاعدايى ەرىكسىز ويعا ورالىپ ەدى.