ەلوردادا اۋلا كوماندالارى اراسىندا فۋتبولدان «اۋلا ليگاسى» ءتۋرنيرى ءوتىپ جاتىر. تامىز ايىنىڭ باسىندا استانا قالاسىندا اۋلا فۋتبولىنان اۋقىمدى بالالار تۋرنيرىنە ىرىكتەۋ كەزەڭى وتكەن ەدى. ءتۋرنيردىڭ كەلەسى كەزەڭىنە 53 كوماندا جولداما الدى, دەپ حابارلايدى Egemen.kz استانا اكىمدىگىنىڭ ءباسپاسوز قىزمەتىنە سىلتەمە جاساپ.
تۋرنير قالانىڭ بەس سپورت الاڭىندا 5+1 فورماتى بويىنشا ءوتىپ جاتىر.
سارىارقا اۋدانى – كوكتال پاركى, بەيبارىس سۇلتان كوشەسى; الماتى اۋدانى – قفف اشىق فۋتبول الاڭى, ب. مومىش ۇلى كوشەسى, 5ا; بايقوڭىر اۋدانى – قفف اشىق فۋتبول الاڭى, ب. مومىش ۇلى كوشەسى, 5ا; نۇرا اۋدانى – №81 Astana English school مامانداندىرىلعان گيمنازياسى, ءىلياس وماروۆ كوشەسى, 14; ەسىل اۋدانى – قابانباي باتىر كوشەسى, 31.اۋلا كوماندالارى اراسىنداعى فۋتبول ءتۋرنيرى جازعى دەمالىس كەزىندە بالالار مەن جاستاردىڭ بوس ۋاقىتىن ءتيىمدى وتكىزۋ, قالادا بۇقارالىق فۋتبولدى دامىتۋ, جاسوسپىرىمدەردى دەنە شىنىقتىرۋ جانە سپورتپەن تۇراقتى اينالىسۋعا تارتۋ ماقساتىندا وتكىزىلىپ جاتىر.
جەڭىمپازدار مەن جارتىلاي فينالعا شىققاندار ەستەلىك سىيلىقتارمەن, ديپلومدارمەن, كۋبوكتارمەن ماراپاتتالادى.
فينالدىق ويىندار تامىز ايىنىڭ 30-31 كۇندەرى «جاس باتىر» سپورت كەشەنىندە (كونستيتۋتسيا كوشەسى, 3) وتەدى. ويىندار كۇن سايىن ساعات 10.00-دە باستالادى.