1956 جىلدان بەرى تامىز ايىنىڭ ءار ەكىنشى جەكسەنبىسى قۇرىلىس سالاسىنىڭ قىزمەتكەرلەرى ءتول مەرەكەلەرىن اتاپ وتەدى. كەڭەس كەزەڭىنەن باستاۋ الاتىن مەيرام ەلىمىز تاۋەلسىزدىك العاننان كەيىن كۇنتىزبەدەن الىنبادى.
ەل ەكونوميكاسىنىڭ دامۋىندا قۇرىلىس سەكتورى ماڭىزدى ءرول اتقارادى. بۇل سالا بۇگىندە 700 مىڭعا جۋىق قازاقستاندىقتى جۇمىسپەن قامتاماسىز ەتىپ وتىر. قۇرىلىسشىلاردىڭ جۇمىسى قيىن, بىراق اسا ماڭىزدى. تۇرعىن ۇيلەر مەن الەۋمەتتىك نىسانداردىڭ ساپالى قۇرىلىسى, سايىپ كەلگەندە, وتانداستارىمىزدىڭ تۇرمىس جاعدايىنىڭ جاقسارۋىنا مۇمكىندىك بەرەدى.
ارينە, جۇمىسىمىز ورىندى سىنعا ۇشىراپ تا جاتادى, اسىرەسە ساپاعا قاتىستى تۇرعىندار نارازىلىق بىلدىرەتىن جاعدايلار بارشىلىق. ءبىز بولاشاقتا بۇعان جول بەرمەۋىمىز كەرەك. ول ءۇشىن سالانى دامىتىپ, اشىقتىق پەن ادىلدىكتى, بەلسەندىلىك پەن قۇرىلىسشىلاردىڭ بىلىكتىلىگىن ارتتىرۋدى قامتاماسىز ەتۋ ماڭىزدى.
وتكەن جىل الەمدىك ەكونوميكا مەن قارجى نارىعى ءۇشىن وڭايعا سوقپادى. قۇرىلىس ماتەريالدارى مەن جابدىقتار ءبىرشاما قىمباتتاپ, تۇتىنۋشىلاردىڭ تولەم قابىلەتى تومەندەدى. دەگەنمەن, ءبىزدىڭ مامانداردىڭ تاباندىلىعى مەن كاسىبيلىگىنىڭ ارقاسىندا Samruk-Kazyna Construction قارجىلىق تۇراقتىلىقتى ساقتاپ, العا قويىلعان ماقساتتارعا قول جەتكىزدى: وتكەن جىلى ءبىز 150 مىڭ م2 استام تۇرعىن ءۇيدى پايدالانۋعا بەرىپ, جىلدىق جوسپاردى 3% - عا اسىرا ورىندادىق.
سونداي-اق, وتكەن جىلى استانا قالاسىندا شاتىر جابىندىسى جانە قاسبەتتى قاپتاۋ ماتەريالدارىن شىعاراتىن زاۋىتتىڭ قۇرىلىسىنا ينۆەستيتسيا سالدىق. كاسىپورىن قىركۇيەك ايىندا ىسكە قوسىلادى. اتالعان ءوندىرىس وشاعى وتاندىق ءونىم ەسەبىنەن شەتەلدەن يمپورتتالاتىن قۇرىلىس ماتەريالدارىنىڭ ۇلەسىن ەداۋىر قىسقارتۋعا جانە باسپانانىڭ شارشى مەترىنىڭ قۇنىن ارزانداتۋعا سەپ بولماق.
بيىل وتاندىق قۇرىلىس سەكتورىندا قۇلدىراۋ بايقالادى. ماتەريالداردىڭ قىمباتتاۋى, جەتكىزىلىم تىزبەكتەرىنىڭ بۇزىلىپ, كەشىگۋى جانە باسقا دا پروبلەمالار بارشىلىق. وسىعان قاراماستان «Samruk-Kazyna Construction» اق الەمدە بالاماسى جوق «جايلى مەكتەپ» پيلوتتىق ۇلتتىق جوباسىن ىسكە اسىرا باستادى. رەسپۋبليكالىق بيۋدجەت پەن ۇلتتىق قور ەسەبىنەن قارجىلاندىرىلاتىن تىڭ جوبانىڭ اياسىندا 3 جىلدا قازاقستاننىڭ بارلىق وڭىرلەرىندە 369 مەكتەپ سالىنادى. بۇل 740 مىڭنان استام جاڭا وقۋشى ورنىن اشىپ, اپاتتى مەكتەپتەر جانە ءۇش اۋىسىمدى وقىتۋ ماسەلەلەرىن شەشۋگە مۇمكىندىك بەرەدى. مەملەكەت باسشىسىنىڭ تىكەلەي تاپسىرماسى بويىنشا «Samruk-Kazyna Construction» اق جوبا اياسىندا ءبىلىم بەرۋ نىساندارىن سالۋ جونىندەگى بىرىڭعاي ديرەكتسيا بولىپ بەكىتىلدى. مەنىڭ ويىمشا, بۇل ءبىزدىڭ كومپانيامىزعا ارتىلعان ۇلكەن سەنىم. كومپانيامىزدا تاجىريبەلى جانە بىلىكتى كادرلار جۇمىس ىستەيدى, سوندىقتان ءبىز بيلىك پەن حالىقتىڭ سەنىمىن اقتاۋ ءۇشىن بارلىق كۇش-جىگەرىمىزدى سالامىز. سونداي-اق, «جايلى مەكتەپ» ۇلتتىق جوباسى قۇرىلىس كومپانيالارى مەن وتاندىق تاۋار وندىرۋشىلەردى تاپسىرىستارمەن, ال قاتارداعى قۇرىلىسشىلاردى جۇمىسپەن جانە تۇراقتى تابىسپەن قامتاماسىز ەتەدى.
ۇلتتىق جوبانىڭ الەۋمەتتىك ماڭىزى زور. بولاشاقتا ءبىز بۇل مەكتەپتەر ءۇشىن بالالارىمىز بەن نەمەرەلەرىمىزدىڭ الدىندا ۇيالمايتىنداي ەتىپ ساپالى سالۋىمىز كەرەك. سوندىقتان, جوبالاۋ مەن قۇرىلىستىڭ ساپاسى قاتاڭ باقىلاۋدا. ءبىز ء«بىر كۇندىك» جالعان فيرمالار مەن جوسىقسىز مەردىگەرلەردى ىرىكتەۋدەن وتكىزبەس ءۇشىن قۇرىلىس كومپانيالارىنا جوعارى تالاپتار قويدىق. سونداي-اق, بەكىتىلگەن شەكتەۋگە سايكەس, ءبىر قۇرىلىس كومپانياسى ۇلتتىق جوبا اياسىندا 20-دان استام مەكتەپ سالا المايدى. كونكۋرستىق راسىمدەر كەزىندە جەرگىلىكتى كومپانيالارعا باسىمدىق بەرىپ, ولارعا 5 پايىزدىق جەڭىلدىك قاراستىردىق. ياعني, باسقا ايماقتارداعى قۇرىلىس كومپانيالارىنا جەرگىلىكتى كومپانيالارعا قاراعاندا بايقاۋدا جەڭىسكە جەتۋ كۇردەلىرەك بولادى. سونىمەن قاتار, ءار ايماقتا مەكتەپ جيھازى جانە ونى وندىرەتىن كاسىپورىنداردى تاڭداۋ بويىنشا ارنايى كوميسسيالار قۇرىلدى. ءبىز وتاندىق وندىرۋشىلەردى قولداۋعا دايىنبىز, ال جيھازدى تاڭداۋ قۇقىعىن پەداگوگتەرگە بەرۋ كەرەك دەپ ەسەپتەيمىز. ولار مەكتەپ وقۋشىلارىنىڭ نە قالايتىنىن جاقسى بىلەدى. ءبىزدىڭ ماماندار, ساراپشىلار جانە قاراپايىم قۇرىلىسشىلار ەلىمىزدىڭ بولاشاعى بالالار ءۇشىن جاڭا فورماتتاعى زاماناۋي, جايلى وقۋ ورىندارىن ساپالى جوبالاۋ جانە سالۋ ءۇشىن بار كۇش-جىگەرىن سالادى.
جايلى مەكتەپتەر سوڭعى ۇلگىدەگى زاماناۋي تەحنولوگيالىق يگىلىكتەرمەن جابدىقتالادى, وقۋشىلار مەن ۇستازدار ءۇشىن بارىنشا ىڭعايلى بولادى. اۋىلدار مەن قالالارداعى مەكتەپتەردىڭ ءبارىن بىركەلكى ەتىپ سالامىز, وسىلايشا بالالاردىڭ بارىنە تەڭ جاعداي جاسايمىز. ءبىزدىڭ ماقساتىمىز – جەتكىنشەكتەر مەكتەپكە ىنتامەن, قۋانا جانە اسىعا باراتىنداي جاعداي جاساۋ. ءار وقۋشى ءبىلىم وشاعىندا وتكىزەتىن ۋاقىتىن ءتيىمدى پايدالانۋى كەرەك. جايلى مەكتەپتەردە بۇل ءۇشىن قاجەتتىنىڭ ءبارى قاراستىرىلادى: كوۆوركينگ ورتالىقتارى, زەرتحانالار, شەبەرحانالار مەن الىپ سپورت الاڭى. وندا ستاديون, حوككەي كورتى مەن جۇگىرۋ جولاعى جاسالادى. قىستا وقۋشىلار حوككەي ويناپ, شاڭعى تەپسە, جازدا مەكتەپ اۋماعىن اينالىپ, كروسس جۇگىرەدى. وسىنىڭ ارقاسىندا سالاۋاتتى ۇرپاق قالىپتاستىرۋعا ءبىر تابان جاقىنداي ءتۇسىپ, بولاشاق چەمپيونداردى مەكتەپ قابىرعاسىنان تاربيەلەيمىز.
جايلى مەكتەپتەردىڭ جوبالىق-سمەتالىق قۇجاتتاماسى مەملەكەتتىك ساراپتامادان وتكەننەن كەيىن قۇرىلىس كوميتەتىنىڭ بانكىنە كىرەدى. وسىلايشا, بولاشاقتا وسى مەكتەپتەردىڭ دايىن جوبالاۋ-سمەتالىق قۇجاتتاماسىن جاڭا ءبىلىم بەرۋ وبەكتىلەرىن سالۋ كەزىندە پايدالانۋعا بولادى. بۇل, ءوز كەزەگىندە, ميللياردتاعان بيۋدجەت قارجىسىن ۇنەمدەۋگە مۇمكىندىك بەرمەك.
پيلوتتىق ۇلتتىق جوبانى جۇزەگە اسىرۋ بارىسىندا وتاندىق قۇرىلىس سالاسىن رەفورمالاۋ قاجەتتىگىنە كوز جەتكىزدىك. نورماتيۆتىك قۇقىقتىق اكتىلەر جاڭارتۋدى تالاپ ەتەدى, ال قۇرىلىس نورمالارىنىڭ كوپشىلىگى ەسكىرگەن, ويتكەنى يندۋستريا ءبىر ورىندا تۇرماي, العا جىلجىپ كەلەدى. ءبىز مەكتەپ سالۋدىڭ, جوبانى باسقارۋدىڭ جانە ساپانى باقىلاۋدىڭ جاڭا تاسىلدەرىن ەنگىزۋگە تىرىسىپ جاتىرمىز. جوبا شەڭبەرىندە العاش رەت ەرس-كەلىسىمشارتار تاجىريبەسىن قولداندىق. وعان سايكەس ءار مەردىگەر كومپانيا نەمەسە كونسورتسيۋم مەكتەپتەردى سالىپ قانا قويماي, جوبالاپ, تولىقتاي جابدىقتاۋى ءتيىس, ياعني نىساندى دايىن كۇيدە تاپسىرۋعا مىندەتتى. ۇلتتىق جوبانىڭ ناتيجەسىنە سايكەس ءبىز ەل ۇكىمەتىنە وتاندىق قۇرىلىس سەكتورىن جاڭعىرتۋ بويىنشا ناقتى ۇسىنىستاردى جولدايمىز.
سوندىقتان «جايلى مەكتەپ» جوباسىنىڭ تاجىريبەسى سالانى, ونىڭ ىشىندە وتاندىق ماتەريالدار مەن تاۋارلار ءوندىرىسىن دامىتۋعا مۇمكىندىك بەرەدى. ءبىز وتاندىق كاسىپورىنداردى قولداپ, ولارعا وندىرىستىك الەۋەتتى كۇشەيتۋگە جانە كەڭەيتۋگە مۇمكىندىك بەرۋگە دايىنبىز.
ۇلتتىق جوبانى ءساتتى جۇزەگە اسىرۋ ءۇشىن جەرگىلىكتى اتقارۋشى ورگاندارمەن, سالالىق قاۋىمداستىقتارمەن جانە ساراپشىلارمەن دە ەتەنە جۇمىس ىستەپ جاتىرمىز. ءبارىمىز ءبىر جاعادان باس, ءبىر جەڭنەن قول شىعارىپ, اۋىزبىرشىلىك تانىتساق قانا, ورتاق ماقساتقا قول جەتكىزە الامىز. ءوز باسىم حالىق پەن بيلىك, قوعام بەلسەندىلەرى تاراپىنان ورىندى ۇسىنىستارعا اشىقپىن جانە ولاردى مۇقيات تىڭداپ, سارالاپ, قاراستىرۋعا دايىنمىن.
زاماناۋي, جايلى مەكتەپتەردىڭ قۇرىلىسىنان بولەك «Samruk-Kazyna Construction» تاعى بىرقاتار باستامالاردى قولعا الماق. بىرىنشىدەن, ەسكى ۇيلەردى رەنوۆاتسيالاۋ باعدارلاماسى ارقىلى اپاتتى جانە قاۋىپتى باسپانالاردى قايتا جاڭعىرتۋ; ەكىنشىدەن, جەتىم بالالار مەن بيۋدجەتتىك سالا قىزمەتكەرلەرى ءۇشىن ساتىپ الۋ قۇقىعىمەن بەرىلەتىن جالدامالى باسپانا سالۋ باعدارلاماسىن ىسكە قوسۋ. بۇدان بولەك, تاعى ەكى جوبا ازىرلەنۋ ۇستىندە. ەلدى دامىتۋ مەن حالىقتىڭ الەۋمەتتىك جاعدايىن جاقسارتۋعا باعىتتالعان وسى ءتورت باستامامىز ۇكىمەت پەن مەملەكەت باسشىسىنىڭ وڭ قولداۋىن تاپقان جاعدايدا, سالا جاڭا سەرپىلىس الادى, قۇرىلىس كومپانيالارى تاپسىرىستارمەن, ال ماماندار تۇراقتى جۇمىسپەن قامتاماسىز ەتىلەدى.
قۇرىلىس سالاسىنىڭ ماماندارىن, ارىپتەستەرىمدى «Samruk-Kazyna Construction» اق اتىنان جانە جەكە ءوز اتىمنان كاسىبي مەرەكە – قۇرىلىسشىلار كۇنىمەن قۇتتىقتايمىن! شىنى كەرەك, كوزگە كورىنبەيتىن قىرۋار جۇمىس جاسالىپ جاتىر. ايتارىم, ءبىزدىڭ كۇشىمىز – بىرلىكتە! ءار قىزمەتكەردىڭ بويىنداعى كۇش-جىگەر مەن جوعارى كاسىبيلىگى حالىقتىڭ ءومىر ءسۇرۋ ساپاسىن ارتتىرا وتىرىپ, قالالارىمىز بەن اۋىلدارىمىزدىڭ كەلبەتىن كوركەيتىپ, قارقىندى دامۋىنا جول اشادى. ءبىزدىڭ ورتاق جەتىستىكتەرىمىزدىڭ ارتىندا سىزدەردىڭ قاجىرلى ەڭبەكتەرىڭىز جاتىر. ەڭ باستىسى – قازاقستاندىقتارعا قولايلى جاعداي جاساپ, كوپتەن بەرى تولعاندىرىپ كەلە جاتقان مۇڭ-مۇقتاجىن شەشۋ. تۇتاس ەلدىڭ جانە ءبىزدىڭ كومپانيانىڭ دامۋى مەن وركەندەۋى جولىنداعى باعا جەتپەس ەڭبەكتەرى ءۇشىن بارلىق قۇرىلىس سالاسىنىڭ قىزمەتكەرلەرىنە ۇلكەن العىسىمدى بىلدىرەمىن! سىزدەرگە كاسىبي تابىس, دەنساۋلىق جانە وتباسىلارىڭىزعا اماندىق تىلەيمىن!
ماۋلەن ايمانبەتوۆ,
«Samruk-Kazyna Construction» اق باسقارما توراعاسى