اۋقىمدى جوبانى باقىلاۋ ءۇشىن سالاارالىق ينتەگراتسيا قۇرىلادى

اۋقىمدى جوبا – بۇل ءسۇت تاۋارلارى فەرمالارىن (متف) سالۋ ءۇشىن 10 جىلعا جىلدىق 2,5% جەڭىلدىكپەن نەسيە تۇرىندە بەرىلەتىن مەملەكەتتىك قولداۋ, 2023 جىلى بۇل سوما 100 ملرد تەڭگەنى قۇرايدى. جوبانىڭ مىندەتى – بۇگىنگى تاڭدا يمپورت ۇلەسى جوعارى الەۋمەتتىك ماڭىزى بار ازىق-ت ۇلىك ونىمدەرىن ءوندىرۋ ارقىلى ەلدىڭ سۇرانىسىن جابۋ. جوبا بىرنەشە جىلعا ەسەپتەلگەن. جەم-ءشوپ جانە وندىرىستىك بازاسى جەتىلگەن, جوبالاردى قوسا قارجىلاندىرۋ ءۇشىن جەتكىلىكتى قاراجاتى جانە جاقسى پراكتيكالىق تاجىريبەسى بار ءىرى شارۋاشىلىقتار عانا جەڭىلدىكپەن نەسيە الۋعا ۇمىتكەر بولا الادى. سوڭعى كورسەتكىش اسا ماڭىزدى, ويتكەنى بيۋدجەت قاراجاتى نەگىزىنەن جۇمىس ىستەپ تۇرعان ءسۇت تاۋارلارى فەرمالارىن كەڭەيتۋگە نەمەسە جاڭعىرتۋعا كوزدەلگەن. 11 وڭىردەگى اكىمدىكتەر وسى تالاپتارعا جاۋاپ بەرەتىن 67 جوبادان تۇراتىن پۋلدى الدىن الا ايقىندادى. ونىڭ 35-ءى جۇمىس ىستەپ تۇرعان ءسۇت تاۋارلارى فەرمالارىن كەڭەيتۋگە, 32-ءسى جاڭادان سالۋعا ارنالعان.

اۋىل شارۋاشىلىعى ۆيتسە-ءمينيسترى امانگالي بەردالين كەڭەس كەزىندە جاقىن ارادا اۋقىمدى جوبا بويىنشا نەسيە بەرۋ ەرەجەلەرى قابىلداناتىنىن اتاپ ءوتتى. اكىمدىكتەر جوبالاردى قارجىلاندىرۋ ءۇشىن سەنىمدى اگەنتتەردى انىقتاۋى قاجەت. كەڭەستە ۇلكەن جوباعا قاتىسۋشى بارلىق ءوڭىر تىڭدالدى, اشم مەن اگرارلىق نەسيە كورپوراتسياسى جۇرگىزگەن ءاربىر بولاشاق جوبانى تالداۋ ناتيجەلەرىن قارادى. ستف قۇرىلىسىنا جەڭىلدىكپەن نەسيە بەرۋدى انك دا جۇرگىزەدى. وسى جىلى كورپوراتسياعا 16 جوبا بويىنشا ءوتىنىم بەرىلدى. ونىڭ بەسەۋى اۋقىمدى جوبا اياسىندا اكىمدىكتەر تىزبەسىمەن قايتالانادى. 

مىسالى, اقمولا وبلىسىنداعى ەكى جوبا اۋقىمدى جوبا بويىنشا جانە انك-دان ءتۇرلى كەزەڭدەردى ىسكە اسىرۋعا جەڭىلدىكپەن قارجىلاندىرۋ سۇراپ وتىر. الايدا ءار ءتۇرلى قارجى ينستيتۋتتارى اراسىندا ءبىر جوبانىڭ ءبولىنۋى مەملەكەتتىك قولداۋ شارالارىن ءبولۋدىڭ ادىلەتسىزدىگىنە اكەلەدى. قايتالاناتىن جوبالاردىڭ وتىنىمدەرى انك-دا قۇجاتتاردى جيناۋ ساتىسىندا تۇرعانىن ەسكەرە وتىرىپ, ولاردى تەك اۋقىمدى جوبا اياسىندا قاراۋعا قالدىرۋ تۋرالى شەشىم قابىلداندى. ال انك-نىڭ ارتىلعان سوماسىن از قارجى بولىنگەن باسقا وڭىرلەردەگى جوبالارعا باعىتتاۋ كەرەك دەپ شەشىلدى.

سەرىك جۇمانعارين اۋقىمدى جوبا بويىنشا بيۋدجەت قاراجاتىن جۇمساۋدىڭ تيىمدىلىگىن باقىلاۋ ءۇشىن اكىمدىكتەر الدىنا مىندەت قويدى. ول ءۇشىن بولاشاق جوبالار پۋلىن بەكىتۋ الدىندا ءوتىنىم بەرۋشىلەردىڭ «اتامەكەن» ۇكپ ارقىلى بيزنەس-تۇراقتىلىعى تەكسەرىلەدى. 

ءوز تاراپىنان «اتامەكەن» ۇكپ تورالقا توراعاسى رايىمبەك باتالوۆ جوبالاردىڭ ىسكە اسىرىلۋىن باقىلاۋ بويىنشا ءتيىمدى ءوزارا ءىس-قيمىل جاساۋ ءۇشىن كاسىپكەرلەر پالاتاسى, مەملەكەتتىك ورگاندار مەن اكىمدىكتەر اراسىندا ينتەگراتسيا قۇرۋدى ۇسىندى.

«قازىر بىزدە ينۆەستيتسيالىق جوبالاردى مونيتورينگتەن وتكىزۋ جۇيەسى جاقسى قۇرىلعان. كەز كەلگەن ۋاقىتتا ينۆەستيتسيالىق جوبالاردى ىسكە اسىرۋ بارىسىن كورسەتەتىن اقپارات جۇيەسى بار, ولاردىڭ نەگىزگى كورسەتكىشتەرى داشبوردقا شىعارىلعان جۇيەدە كاسىپكەردىڭ ءوز جوباسى بويىنشا دەرەكتەر جۇكتەيتىن ينۆەستور كابينەتى بار. اكىمدىك, اشم جانە باسقا دا قاتىسۋشىلارعا, مەملەكەتتىك ورگاندارعا جۇيەگە كىرۋگە رۇقسات بەرە الامىز. بۇل وبەكتيۆتى اقپارات ارناسى بولماق», دەدى ول.

ۆيتسە-پرەمەر بۇل باستامانى قولداپ, ۇكپ-عا اشم-مەن بىرلەسىپ, اۋقىمدى جوبا اياسىندا جوبالار پۋلىنىڭ ىسكە اسىرىلۋىن باقىلاۋ ءۇشىن ۇلتتىق پالاتا بازاسىندا وسى اقپارات جۇيەسى نەگىزىندە ينۆەستيتسيالار جونىندەگى باسقارۋشى كوميتەت قۇرۋدى تاپسىردى. بۇدان باسقا باسقارۋشى كوميتەتتىڭ الاڭىندا كەلەسى جىلعا جەڭىلدىكپەن نەسيە بەرۋ ءۇشىن پۋلعا كىرەتىن جوبالاردى ىرىكتەۋ جۇرگىزىلەتىن بولادى. قازىر اۋقىمدى جوبانىڭ كەلەسى كەزەڭىن ىسكە اسىرۋ ءۇشىن رەسپۋبليكالىق بيۋدجەتتەن 2024 جىلعا 100 ملرد تەڭگە ءبولۋ بويىنشا جۇمىس جۇرگىزىلۋدە – ول قۇس فابريكالارىن, كليماتىن باقىلاۋعا بولاتىن كوكونىس قويمالارىن سالۋ جانە كەڭەيتۋ, سۋارۋ جونىندەگى جوبالار. وسى جوبالاردىڭ بارلىعى نەگىزگى ازىق-ت ۇلىك ونىمدەرى بويىنشا ەلدىڭ يمپورتقا تاۋەلدىلىگىن ايتارلىقتاي تومەندەتۋگە مۇمكىندىك بەرەدى.

«اۋقىمدى جوباعا ەنگەن ءاربىر جوبا بويىنشا اقشانى پايدالانۋدى تولىققاندى باقىلاۋدى قامتاماسىز ەتۋ قاجەت. ايىنا ءبىر رەت جينالىپ, ولاردى ىسكە اسىرۋ بارىسىن قاراستىرامىز. ماعان تەك 100% ناتيجە كەرەك. سونداي-اق «اتامەكەن» ۇكپ-عا وتاندىق وندىرۋشىلەردى ستف قۇرىلىسىنا بارىنشا تارتۋدى ۇسىنامىن», دەپ قورىتىندىلادى سەرىك جۇمانعارين.