شىمكەنت قالاسىنىڭ ءبىلىم باسقارماسىندا قىزمەت ەتىپ, جۇيەلى تۇردە جەمقورلىقپەن اينالىسقان لاۋازىمدى تۇلعالار جاۋاپكەرشىلىككە تارتىلدى, دەپ جازادى Egemen.kz قر سىبايلاس جەمقورلىققا قارسى ءىس-قيمىل اگەنتتىگىنىڭ ءباسپاسوز قىزمەتىنە سىلتەمە جاساپ.
شىمكەنت قالاسىنىڭ قىلمىستىق ىستەر جونىندەگى اۋدانارالىق سوتى ءبىلىم باسقارماسىنىڭ ماماندارى ا. شينداۋلوۆا مەن م. مەيىربەكوۆاعا قاتىستى ۇكىم شىعاردى.
اتالعان ادامدارعا 36 ملن تەڭگە كولەمىندە ايىپپۇل سالىندى.
«ولار جەكەمەنشىك مەكتەپكە دەيىنگى مەكەمەلەردە تەكسەرىس جۇرگىزبەگەنى ءۇشىن 100 مىڭنان 500 مىڭ تەڭگەگە دەيىنگى سومادا مەكتەپكە دەيىنگى مەكەمەلەردىڭ باسشىلارىنان جۇيەلى نەگىزدە پارا العانى ءۇشىن كىنالى دەپ تانىلدى. سوتتالعاندار مەملەكەتتىك قىزمەتتە, جەرگىلىكتى ءوزىن-ءوزى باسقارۋ ورگاندارىندا, قارجى ۇيىمدارىندا جانە كۆازيمەملەكەتتىك سەكتوردا قىزمەت اتقارۋ قۇقىعىنان ءومىر بويىنا ايىرىلدى. سوت ۇكىمى زاڭدى كۇشىنە ەنگەن جوق», دەلىنگەن ANTIKOR حابارلاماسىندا.
بۇدان باسقا, ءبىلىم بەرۋ سالاسىنداعى جەمقورلىق تاۋەكەلدەرىن سىرتقى تالداۋ بارىسىندا بيۋدجەت قاراجاتىن جىمقىرۋ سحەماسى انىقتالدى. دالىرەك ايتقاندا, ەكى قالالىق مەكتەپتىڭ بۋحگالتەرى 2020-2023 جىلدار كەزەڭىندە ءوزىنىڭ جەكە شوتىنا مەكتەپ قىزمەتكەرلەرىنە ەڭبەكاقى تولەۋ قورىنا بولىنگەن 67 ملن تەڭگەدەن استام قاراجاتتى زاڭسىز اۋدارعان.
جىمقىرۋدىڭ ۇقساس سحەماسى №2 مەكتەپتە قولدانىلدى, وندا 6 جىلدان استام ۋاقىت بويى ديرەكتور, باس مەنەدجەر جانە باس بۋحگالتەر بىرلەسىپ جۇمىس ىستەگەن.
شىمكەنت قالاسى بويىنشا سىبايلاس جەمقورلىققا قارسى قىزمەت قالالىق ءبىلىم بەرۋ سالاسىنداعى بۇزۋشىلىقتاردىڭ العىشارتتارىن جويۋ بويىنشا ءتيىستى ۇسىنىمدار ەنگىزدى.