الماتى قالاسىنىڭ اقكەنت ىقشام اۋدانىندا كوپقاباتتى تۇرعىن ۇيلەردىڭ ءبىرى ورتەنىپ, ادامدار تەرەزەدەن سەكىرۋگە ءماجۇر بولعان. الماتى قالالىق دەنساۋلىق ساقتاۋ باسقارماسى اتالعان وقيعادان زارداپ شەككەن 31 ادام اۋرۋحاناعا جەتكىزىلگەنىن ناقتىلادى, دەپ حابارلايدى Egemen.kz.
«2023 جىلى 1 تامىزدا ساعات 18:30-داعى جاعداي بويىنشا الاتاۋ اۋدانى, اقكەنت ىقشام اۋدانى, 54 ءۇي مەكەنجايىندا بولعان ءورت سالدارىنان قالا اۋرۋحانالارىنا 31 ادام جەتكىزىلدى, ونىڭ 16-سى - بالا. زارداپ شەككەندەر ءدىن امان, قازا تاپقاندار جوق. ناۋقاستاردىڭ دەنساۋلىق جاعدايى تۋرالى قوسىمشا حابارلاناتىن بولادى», دەدى الماتى قالاسى دەنساۋلىق ساقتاۋ باسقارماسىنىڭ ءباسپاسوز قىزمەتى.
ايتا كەتەيىك, كوپقاباتتى تۇرعىن ۇيدەگى ءورت ساعات 18:46-دا ءسوندىرىلدى.
وقيعا ورنىندا قالالىق تجد كۇشتەرى مەن قۇرالدارى ساپىنان 50 ادام جانە 14 تەحنيكا جۇمىس ىستەدى, ونىڭ ىشىندە 3 اۆتوساتى بولعان.