28 شىلدەدە الماتى تاۋلارىندا سەل ءجۇرۋ قاۋپى بار, دەپ حابارلايدى Egemen.kz توتەنشە جاعدايلار مينيسترلىگىنىڭ ءباسپاسوز قىزمەتىنە سىلتەمە جاساپ.
28 شىلدەدە الماتى قالاسىندا جانە وعان ىرگەلەس تاۋلى جەرلەردە كەيدە قاتتى جاڭبىر, نايزاعاي, بۇرشاق جاۋادى دەپ بولجانىپ وتىر. جالپى, سوڭعى 13 كۇندە قالىپتاسقان اۋا تەمپەراتۋراسىنىڭ جوعارىلاۋىنا بايلانىستى الماتى تاۋلارىندا گلياتسيالدى (مۇزدىق) جانە نوسەرلى سيپاتتاعى سەل قاۋپىنىڭ جوعارى دارەجەسى بايقالعان. گيدرومەتەورولوگيالىق جانە سەل جاعدايىنىڭ تالداۋىنا سايكەس, قاتتى جاڭبىر جاۋعان كەزدە سەل قۇبىلىستارى بولۋى مۇمكىن.
تج ءمينيسترىنىڭ نۇسقاۋىنا سايكەس الماتى قالاسىندا ورنالاسقان قۇتقارۋ بولىمشەلەرى جوعارى دايىندىق رەجيمىنە كەلتىرىلىپ, ال اكىمنىڭ مىندەتىن اتقارۋشىنىڭ وكىمىمەن قالالىق ازاماتتىق قورعاۋ قىزمەتتەرى, اۋداندىق اكىمدىكتەر, ازاماتتىق قورعاۋ قىزمەتتەرىنىڭ اۆاريالىق-قۇتقارۋ, ينجەنەرلىك تەحنيكاسى دايىندىققا كەلتىرىلگەن.
قازسەلدەنقورعاۋ بولىمشەلەرى سەل قاۋپى بار ۋچاسكەلەردە باقىلاۋدىڭ جەدەلدەتىلگەن رەجيمىنە اۋىستىرىلعان, اەروۆيزۋالدى جانە جەرگىلىكتى باقىلاۋ جۇرگىزىلىپ جاتىر, ينجەنەرلىك-تەحنيكالىق قىزمەتكەرلەردىڭ تاۋلىك بويى كەزەكشىلىگى بەكىتىلدى.
تجد-ءنىڭ مالىمدەمەسىنە سايكەس, تۋريستەرگە, الماتى تۇرعىندارى مەن قوناقتارىنا سەل تاسقىنىنا قالىپ قالعان جاعدايدا قۇتقارىلۋعا مۇمكىندىك جوق ەكەنى ەسكەرتىلىپ, سەل تاسقىنى قاۋپىنە بايلانىستى ىلە-الاتاۋ تاۋلارىنا بارماۋ سۇرالعان.
«تاۋداعى جاعداي تۋرالى بۇقارالىق اقپارات قۇرالدارىنىڭ حابارلارىن ۇنەمى قاداعالاپ وتىرىڭىزدار, ەگەر قاۋىپ تونسە نەمەسە كەنەتتەن سەل بولسا, رەلەفتىڭ ەڭ بيىك نۇكتەسىنە كوتەرىلىڭىزدەر, دەمالۋعا توقتاماڭىزدار جانە سەل قاۋىپتى كانالداردىڭ جانىندا, كول كوپىرلەرىندە (بوگەتتەردە), ولاردىڭ استىندا لاگەرلەر قۇرماڭىزدار. ەستەرىڭىزدە بولسىن, سەل اعىنىنا تۇسكەن ادامدى قۇتقارۋ مۇمكىن ەمەس, سوندىقتان وعان جاقىنداماڭىزدار», دەلىنگەن حابارلامادا.