قازاقستاننىڭ گرۋزياداعى ەلشىلىگى يۆانە دجاۆاحيشۆيلي اتىنداعى تبيليسي مەملەكەتتىك ۋنيۆەرسيتەتىنىڭ كىتاپحاناسىنا, سونداي-اق سۋحۋمي مەملەكەتتىك ۋنيۆەرسيتەتىنىڭ جانىنداعى اباي كابينەتىنە قازاقستان تۋرالى كىتاپتار سىيلادى, دەپ حابارلايدى Egemen.kz سىرتقى ىستەر مينيسترلىگىنىڭ ءباسپاسوز قىزمەتىنە سىلتەمە جاساپ.
گرۋزين جۇرتشىلىعىن قازاق مادەنيەتى مەن ادەبيەتىمەن كەڭىنەن تانىستىرۋ ماقساتىندا قازاق كلاسسيكتەرىنىڭ ادەبي شىعارمالارى, ەجەلگى زاماننان قازىرگى زامانعا دەيىنگى قازاقستان تاريحى بويىنشا ەڭبەكتەرى, ونەر مەن داستۇرلەرگە ارنالعان البومدار, ەنتسيكلوپەديالار جانە بەلگىلى قازاقستاندىق اۆتورلاردىڭ كوركەم كىتاپتارى تابىس ەتىلدى.
ءىس-شارا گرۋزيانىڭ شىعارماشىلىق زيالىلارى مەن كىتاپ سۇيەر قاۋىمنىڭ قىزىعۋشىلىعىن تۋدىردى. وسىعان بايلانىستى ەلشىلىك كىتاپحاناسى دا قازاق, گرۋزين, اعىلشىن تىلدەرىندە شىققان ديپلوماتيا, ساياسات, ەكونوميكا تۋرالى كىتاپتارمەن, سونداي-اق كلاسسيكالىق جانە زاماناۋي ادەبيەتتەرمەن تولىعىمەن جاڭارتىلدى. بۇل كىتاپحانانىڭ پايدالانۋشىلارىنا قازاقستاننىڭ تاريحى, وركەنيەتى, حالىق داستۇرلەرى, ساۋلەتى, ونەرى جانە مادەنيەتى سالاسىنداعى بىلىمدەرىن تەرەڭدەتۋگە مۇمكىندىك بەرەدى.
ەلشىلىك كىتاپتاردى تابىستاۋ اكتسياسىن جالعاستىرىپ, ونى بيىل قازاقستاندا جانە شەت ەلدەردە كەڭىنەن اتالىپ ءوتىپ جاتقان قىپشاق دالاسىنان شىققان, ءارى اتى اڭىزعا اينالعان بيلەۋشى سۇلتان بەيبارىستىڭ 800 جىلدىعى, مەملەكەت جانە قوعام قايراتكەرى تەمىربەك جۇرگەنوۆتىڭ 125 جىلدىعى جانە كورنەكتى قازاقستاندىق قوعام قايراتكەرى, مادەنيەتتانۋشى مۇرات اۋەزوۆتىڭ 80 جىلدىق مەرەيتويلارىن ناسيحاتتاۋعا ارنالادى.