شىمبۇلاق شيپاجايىنىڭ قىزمەتكەرلەرى بۇگىن سانيتارلىق كۇنگە جابىلاتىنىن حابارلادى. بۇل جاياۋ جۇرگىنشىلەر كوپىرىن قيراتىپ, سۋ الاتىن قۇبىردىڭ ىستەن شىعۋىنا اكەلگەن سەلدىڭ سالدارىمەن بايلانىستى, دەپ حابارلايدى Egemen.kz.
شيپاجايدىڭ ءباسپاسوز قىزمەتى سۋ قابىلدايتىن بەكەت لاي مەن تاستان تازارتىلىپ جاتقانىن حابارلادى.
«21 شىلدەدە تۇيىق-سۋ ءالپى لاگەرىنىڭ ماڭىندا كىشى الماتى وزەنىندە تابيعي اپات بولدى - سەل ءجۇرىپ, جاياۋ جۇرگىنشىلەر كوپىرى قيرادى. وسىنىڭ بارلىعى سۋ قابىلداعىشتىڭ ىستەن شىعۋىنا اكەلدى. سونىڭ سالدارىنان شىمبۇلاقتا سۋ بەرۋ توقتاتىلدى. ءبىزدىڭ ماماندار سۋ قابىلداعىش ستانتسيانى لايدان تازارتۋ جۇمىستارىن بەلسەندى تۇردە جۇرگىزىپ جاتىر. قولايسىزدىقتار ءۇشىن كەشىرىم سۇرايمىز جانە تۇسىنىستىك تانىتقاندارىڭىزعا العىس ايتامىز», دەلىنگەن حابارلامادا.
الماتى قالاسىنىڭ توتەنشە جاعدايلار دەپارتامەنتى حابارلاعانداي, تەمپەراتۋرانىڭ كوتەرىلۋى مەن مۇزدىقتاردىڭ ەرۋىنە بايلانىستى كىشى الماتى شاتقالىنىڭ ساعاسىنداعى سۋ دەڭگەيى كوتەرىلىپ, سونىڭ سالدارىنان سۋ ىشۋگە جارامسىز بولىپ وتىر.