استانادا رەسمي قىزمەت ەتەتىن ءدىني بىرلەستىكتەردىڭ شىعۋ تاريحى, ولاردىڭ قىزمەتى مەن ءدىني عيبادات عيماراتتارى جايىندا جازىلعان «ەلوردانىڭ ءدىني نىساندارى» اتتى ەنتسيكلوپەدياسى تانىستىرىلدى, دەپ حابارلايدى Egemen.kz قالا اكىمدىگىنىڭ ءباسپاسوز قىزمەتىنە سىلتەمە جاساپ.
سالتاناتتى ءىس-شارا بەيبىتشىلىك جانە كەلىسىم سارايىندا ءوتتى. استانا قالاسى اكىمىنىڭ ورىنباسارى ەسەت بايكەننىڭ توراعالىعىمەن ءدىن ىستەرى باسقارماسى دايىنداعان كىتاپتاردى تاماشالاۋعا ەلوردالىق ءدىني بىرلەستىكتەردىڭ باسشىلارى, عىلىمي-ساراپتامالىق قوعامداستىق وكىلدەرى مەن مەملەكەتتىك ورگانداردىڭ قىزمەتشىلەرى كەلدى.
جيىنعا استانا قالاسى ءماسليحاتىنىڭ توراعاسى ەرلان قاناليموۆ قاتىسىپ, تۋىندىنىڭ ەلوردا تۇرعىندارى مەن قوناقتارىنا ءدىن تۋرالى تاپتىرماس نۇسقاۋلىق بولاتىنىن اتاپ ءوتتى.
ء«دىن – حالقىمىزدىڭ الەۋمەتتىك جانە رۋحاني ءومىرىنىڭ ءبىر بولىگى. قازاق حالقىندا سالت-ءدۇستۇرى مەن عۇرپى دىنمەن ۇشتاستىرىلعان. ساليقالى ءومىر ءسۇرۋ, دۇرىس ۇرپاق تاربيەلەۋ, كەلەر ۇرپاققا دۇرىس تاربيە بەرۋ, قۇرمەتتەۋ, ىزەت كورسەتۋ قاسيەتتەرىن قالىپتاستىرۋ ءدىن مەن ءداستۇرىمىزدىڭ ەرەكشەلىگى دەپ ايتۋعا بولادى. بۇل ەڭبەك ەلوردالىقتارعا, قالا قوناقتارىنا جانە ءدىن سالاسىنىڭ زەرتتەۋشىلەرىنە نۇسقاۋلىق بولادى دەپ ويلايمىن», دەدى ءماسليحات توراعاسى.
جيىنعا قاتىسقان قالا اكىمىنىڭ ورىنباسارى ەسەت بايكەننىڭ ايتۋىنشا, ءدىني بىرلەستىكتەردىڭ تاريحى مەن كۋلتتىك تاجىريبەسى تۋرالى جازىلعان تۋىندى - استانانىڭ شيرەك عاسىرداعى جەتىستىگى.
«بۇگىنگى جيىن استانانىڭ 25 جىلدىعىمەن تۇسپا-تۇس كەلىپ وتىر. ءدىن ىستەرى باسقارماسىمەن اقىلداسا كەلە, ءدىن سالاسىنداعى جەتىستىكتەردى كورسەتۋ ماقساتىندا ەنتسيكلوپەديا جاساۋدى ۇيعاردىق. شيرەك عاسىردا ءبىز ءۇشىن ەلوردادا اتقارىلعان شارالار جەتىستىك دەپ بىلەمىن. ءۇش جىلدا ءبىر وتكىزىلەتىن الەمدىك جانە ءداستۇرلى دىندەر كوشباسشىلارىنىڭ سەزى ەلوردامىزدى الەمدىك جانە رۋحاني ديالوگ ورتالىعىنا اينالدىردى. ەلورداداعى 14 ءدىني كونفەسسيا مەن 57 ءدىني بىرلەستىكتىڭ ەڭبەگى ارقاسىندا 25 جىلدا ەلورداداعى ءدىن سالاسى وزىندىك دارا جولىن قالىپتاستىردى. وسى جەتىستىكتەردى وقىرمان نازارىنا جەتكىزۋدى ءجون كوردىك», دەدى قالا اكىمىنىڭ ورىنباسارى.
جاڭا جيناق 16 تاراۋعا بولىنگەن. ءار بولىمدە ەلورداداعى كونفەسسيالار تۋرالى جەكەلەگەن تولىق اقپارات ۇسىنىلعان.
سونداي-اق جيناقتا ءدىني بىرلەستىكتەردىڭ شىعۋ تاريحى مەن بۇگىنگى اتقارىپ جاتقان جۇمىسى تۋرالى جازىلعان, ءتۇرلى ءدىني ورىنداردىڭ, ساۋلەتتى عيماراتتاردىڭ فوتولارى دا ەنگەن.