ماۋسىم ايىندا ەلەكتروندىق ەڭبەك بيرجاسىندا 89,9 مىڭ بوس جۇمىس ورنى جانە 54,5 مىڭ تۇيىندەمە ورنالاستىرىلدى. مامىر ايىمەن سالىستىرعاندا بوس جۇمىس ورىندارىنىڭ سانى 5,3%-عا, تۇيىندەمە 26,7%-عا قىسقاردى, دەپ حابارلايدى Egemen.kz.
قر ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە, جۇمىس بەرۋشىلەر مەن جۇمىس ىزدەۋشىلەردىڭ بەلسەندىلىگىنىڭ تومەندەۋى بارلىق بىلىكتىلىك توپتارعا قاتىستى بايقالىپ, ونىڭ ىشىندە بىلىكتىلىگى جوق جۇمىس كۇشىنە دە ايتارلىقتاي اسەر ەتتى.
ماسەلەن, بىلىكتىلىگى جوق قىزمەتكەرلەرگە سۇرانىس ماۋسىم ايىندا 26,5 مىڭنان 23,9 مىڭ بوس ورىنعا (10%-عا), ال ۇسىنىس 28 مىڭنان 17 مىڭعا (39%-عا) دەيىن ازايدى. بىلىكتىلىگى ورتاشا قىزمەتكەرلەر تاراپىنان ۇسىنىس ۇشتەن بىرگە دەيىن تومەندەپ, ايدىڭ قورىتىندىسى بويىنشا 14,7 مىڭ تۇيىندەمەنى قۇرادى, ال بىلىكتىلىگى جوعارى ىزدەنۋشىلەر اراسىنداعى بەلسەندىلىك 25,7 مىڭنان 22,8 مىڭ (11%-عا) تۇيىندەمەگە دەيىن قىسقاردى.
«رەسپۋبليكا بويىنشا سۇرانىستىڭ جالپى تومەندەۋى تۇركىستان (-3,4 مىڭ بوس جۇمىس ورنى), جامبىل (-1 مىڭ بوس جۇمىس ورنى) جانە اتىراۋ (-850 بوس جۇمىس ورنى) وبلىستارىنا ايتارلىقتاي اسەر ەتتى. بۇل رەتتە, تومەندەۋدىڭ جالپى ترەندىنە قاراماستان, بىرقاتار وڭىرلەر ماۋسىم ايىندا كادرلارعا قاجەتتىلىكتىڭ ارتقانىن كورسەتتى: جەتىسۋ (+1,1 مىڭ بوس ورىن), الماتى (+416) جانە شىعىس قازاقستان (+479) وبلىستارى. شىعىستا بىلىكتى كادرلار اراسىندا تاپشىلىق بايقالدى: بايلانىس ورتالىقتارىنىڭ ماماندارى (تۇيىندەمەدەن 113 بىرلىككە ارتىق بوس جۇمىس ورىندارى), جوندەۋشى سلەسارلار (91 بىرلىككە) جانە ەلەكتر-گاز دانەكەرلەۋشىلەر (80 بىرلىككە)», دەلىنگەن حابارلامادا.
ەكىنشى جاعىنان جۇمىس ىزدەۋشىلەر بەلسەندىلىگىنىڭ ايتارلىقتاي تومەندەۋى كوپتەگەن ايماقتاردا كادرلار تاپشىلىعىنا اكەلدى. ماسەلەن, قاراعاندى وبلىسىندا بوس جۇمىس ورىندارىنىڭ سانى تۇيىندەمەلەر سانىنان 6,4 مىڭعا, پاۆلودار جانە شىعىس قازاقستان وبلىستارىندا 3,9 مىڭعا اسىپ ءتۇستى, وسى ءۇش باسىم ونەركاسىپتىك وڭىردە ەڭ ۇلكەن تاپشىلىق ورتاشا بىلىكتى كادرلار بويىنشا (2 مىڭ تۇيىندەمە كەزىندە 8,7 مىڭ بوس جۇمىس ورنى) بايقالدى.
ماۋسىم ايىندا ەەب-دا بىلىكتىلىگى جوق قىزمەتكەرلەرگە تۇراقتى سۇرانىستان باسقا, بايلانىس ورتالىقتارىنىڭ وپەراتورلارىنا (1,9 مىڭ بوس ورىن), كۇزەتشىلەرگە (1,7 مىڭ بوس ورىن) جانە تاربيەشىلەرگە (1,6 مىڭ بوس ورىن) جوعارى قاجەتتىلىك بايقالدى. سونىمەن قاتار, بۇل ماماندىقتار جۇمىس ىزدەۋشىلەر اراسىندا تانىمال ەمەس. بايلانىس ورتالىقتارىنىڭ وپەراتورلارىنان بارلىعى 17 تۇيىندەمە, كۇزەتشىلەردەن – 588 تۇيىندەمە, تاربيەشىلەردەن – 770 تۇيىندەمە ورنالاستىرىلدى.
جاس ەرەكشەلىكتەرى بويىنشا 26-30 جاس ارالىعىنداعى ىزدەنۋشىلەر بەلسەندىلىك تانىتقان, ولار تۇيىندەمەلەردىڭ جالپى سانىنىڭ 16%-ىن (8,5 مىڭ) ورنالاستىرعان. زەينەتكەرلىك جاسقا دەيىنگى ىزدەنۋشىلەردىڭ ۇلەسى 7,7%-دى قۇرادى (4,2 مىڭ تۇيىندەمە). تۇيىندەمەنىڭ ەڭ ازى 15-20 جاس ارالىعىنداعى ىزدەنۋشىلەرگە تيەسىلى, تۇيىندەمەنىڭ جالپى سانىنىڭ 7% (3,5 مىڭ). وسىلايشا, جازعى ماۋسىمنىڭ باستالۋىمەن 20 جاسقا دەيىنگى جاستار قاراعاندى (14%), شىعىس قازاقستان (11%) جانە اقتوبە (10%) وبلىستارىندا ەڭ كوپ جۇمىس ىستەۋگە نيەتتى بولدى.
«ماۋسىم ايىنىڭ قورىتىندىسى بويىنشا جۇمىس بەرۋشىلەر جابدىقتاردى سىناۋ جانە رەجيمدىك رەتتەۋ بويىنشا باسشىلارعا (ورتا ەسەپپەن 700 مىڭ تەڭگەدەن باستاپ), it-ديزاينەرلەرگە (566 مىڭ تەڭگەدەن باستاپ) جانە قۇرىلىس-مونتاجداۋ جۇمىستارىنىڭ ينسپەكتورلارىنا (550 مىڭ تەڭگەدەن باستاپ) ەڭ جوعارى جالاقى مولشەرىن ۇسىنۋعا دايىن بولدى. سونىمەن قاتار, ىزدەنۋشىلەر اراسىندا ساۋدا سالاسىنداعى ءبولىم باستىقتارى (1,9 ملن تەڭگەدەن باستاپ), كرەديتتىك ينسپەكتورلار مەن باس ديرەكتورلار (1,4 ملن تەڭگەدەن باستاپ) جوعارى جالاقى سۇرادى», دەپ حابارلادى مينيسترلىك.
وسىلايشا, ماۋسىم ايىندا الدىڭعى ايلارمەن سالىستىرعاندا, سۇرانىس پەن ۇسىنىستىڭ ماۋسىمدىق اۋىتقۋىنا بايلانىستى ىزدەۋ جانە جالداۋ بەلسەندىلىگى تومەندەي باستادى. ونىڭ ىشىندە ەڭبەك نارىعىنا اسەر ەتۋشى فاكتور جازعى-دالالىق جانە جوندەۋ جۇمىستارى كەزەڭىندە بىلىكتىلىگى جوق جۇمىس كۇشىنە جوعارى سۇرانىس سەبەبىنەن جۇمىسقا ورنالاستىرۋ پروتسەسىن ءساتتى اياقتاعان بىلىكتىلىگى جوق جۇمىسشىلار تاراپىنان ۇسىنىستىڭ تومەندەۋى بولدى.