24 بالانى دۇنيەگە اكەلگەن انا بۇگىندە بەينەتىنىڭ زەينەتىن كورىپ وتىر. جەتىساي اۋدانىنىڭ قاراوزەك ەلدىمەكەنىندە تۇراتىن كوپبالالى باتىر انا ەلىمىزدىڭ جەتكەن جەتىستىكتەرى مەن العان اسۋلارىنا تىلەۋلەس جان. ەڭبەككە جاستايىنان ارالاسىپ, ەرتە ەسەيگەن اق جاۋلىقتى انانىڭ جاستارعا ايتاتىن وسيەتى جەتەرلىك.
«ادامدى ادام ەتكەن - ەڭبەك» دەيدى. جاس كەزىمىزدەن ەڭبەكپەن شۇعىلداندىق. جولداسىم جولامان ەكەۋمىز سوۆحوزدىڭ مالىن باقتىق. مال شارۋاشىلىعىندا وتاعاسى اعا شوپان, مەن كومەكشىسى بولىپ ىستەدىم. جانۇيالى بولىپ, 24 بالانى دۇنيەگە اكەلدىك. وكىنىشكە قاراي, ءومىردىڭ ءتۇرلى سىناعىنا تاپ بولىپ, 12 بالام قايتىس بولدى. اللاعا شۇكىر دەيمىن, قالعانىنىڭ بارلىعىن اياقتاندىردىق, قاتارىنان كەم قىلمادىق. نەمەرە, شوبەرە ءسۇيىپ وتىرمىز. بالالارىمىزدى جاقسى تاربيەلەۋگە تىرىستىق, ەڭبەكتى ءسۇيىپ وسىردىك. ماڭداي تەرمەن تابىلعان نان قاشاندا ءتاتتى», – دەيدى قارت انا.
ساپاركۇل اپا بۇگىندە 70 نەمەرە مەن 20 شوبەرەسىنىڭ قىزىعىن كورىپ وتىر. ءبىر رەت ۇشەمدەردى, ەكى رەت ەگىزدەردى دۇنيەگە الىپ كەلگەن اياۋلى انا العاش «باتىر انا» مەدالىن 1979 جىلى 17-ءشى پەرزەنتىن دۇنيەگە اكەلگەندە الىپتى. ال ەكىنشى «التىن القاسى» ومىراۋىنا تاۋەلسىزدىك تاڭى اتقان سوڭ تاعىلىپتى.
قازىر ۇل-قىزدارى قوساقتارىمەن اۋلەتتىڭ داۋلەتىن اسىرىپ, التىن قۇرساقتى انانىڭ اق باتاسىمەن ۇرپاق ءوربىتىپ وتىر. مەملەكەت باسشىسى قاسىم-جومارت كەمەل ۇلىنىڭ جاستارعا, اگرارلىق سەكتورعا, كاسىپكەرلەرگە جاساعان قامقورلىعىنىڭ ارقاسىندا شاڭىراقتان بەرەكە الىستاعان ەمەس. ساپاركۇل اپانىڭ پەرزەنتتەرى استانا, الماتى, شىمكەنت قالالارى مەن تۇركىستان وبلىسىندا ءوز ىستەرىنىڭ شەبەرى اتانىپ, كاسىپتەرىن دوڭگەلەتىپ, ناسىپتەرىن تاۋىپ ءجۇر.
باتىر انا جولداسى ەكەۋى بۇگىندە كەنجە ۇلدارىنىڭ شاڭىراعىندا تۇرادى.