پرەزيدەنت قاسىم-جومارت توقاەۆ «ونلاين-پلاتفورمالار جانە ونلاين-جارناما تۋرالى» زاڭعا قول قويدى. بۇل قۇجات – ەلىمىزدىڭ قوعامدىق قاتىناستارىنىڭ باستى ينديكاتورى سانالاتىن الەۋمەتتىك جەلىلەردى رەتتەۋدىڭ ءادىسى.
ءپليۋراليزمدى دامىتۋ الەۋمەتتىك جەلى مادەنيەتىن ارتتىرۋدى تالاپ ەتەتىنىن ءومىر كورسەتىپ وتىر. ولار بۇگىندە نەگىزگى اقپارات كوزى مەن قوعامدىق-ساياسي باعىتتى قالىپتاستىراتىن پلاتفورماعا اينالدى. الەۋمەتتىك جەلىلەردىڭ قوعامنىڭ جاپپاي ساناسىنا اسەرىن, ونلاين كەڭىستىكتە جاڭا ەكونوميكالىق قاتىناستاردىڭ قالىپتاسقانىن ەسكەرە وتىرىپ, ءماجىلىستىڭ ءبىر توپ دەپۋتاتى «ونلاين-پلاتفورمالار جانە ونلاين-جارناما تۋرالى» زاڭ جوباسىنىڭ باستاماشىسى بولدى. قۇجاتتى دايارلاۋعا ماجىلىستەگى بارلىق فراكتسيا وكىلدەرى قاتىستى.
زاڭنىڭ قوعامنىڭ دامۋى ءۇشىن ماڭىزدىلىعىنا وراي, زاڭ جوباسىن ازىرلەيتىن جۇمىس توبىنا بەلگىلى جۋرناليستەر, جەلىنى پايدالانۋشىلار, وسى سالاداعى كاسىبي ساراپشىلار تارتىلدى. بۇكىل شەتەلدىك, ەۋروپالىق, اقش-تىڭ وسى سالانى رەتتەۋدەگى تاجىريبەسى ساراپتالدى. قۇجاتتىڭ قابىلدانۋى ەلىمىزدەگى ونلاين-پلاتفورمالاردىڭ قىزمەتى ءۇشىن قۇقىقتىق نەگىزدەر قالىپتاستىرادى, ونلاين-پلاتفورمالار مەن ونلاين-جارناما سالاسىنداعى رەتتەۋدىڭ نورماتيۆتىك نەگىزىن كونتسەپتۋالدىق تۇرعىدان وزەكتەندىرۋگە مۇمكىندىك بەرەدى.
وعان قوسا, ەۋروپالىق وداق قابىلداعان Digital Services Act نەمەسە تسيفرلىق قىزمەتتەر تۋرالى زاڭنىڭ بالاماسى ىسپەتتى بۇل زاڭ الەمدىك الەۋمەتتىك جەلىلەردىڭ ينتەرفەيسىن قازاقشالاۋ, ينفليۋەنسەرلەردىڭ جارناماسىن تاڭبالاۋ, زاڭسىز كونتەنتتى نەعۇرلىم ءتيىمدى مودەراتسيالاۋ ماسەلەلەرىن دە رەتتەيدى.
زاڭ اياسىندا كولەڭكەلى ەكونوميكا ءۇردىسىن ازايتۋ جانە ونلاين الاياقتىقپەن كۇرەسۋ بويىنشا قاجەتتى شارالار قابىلدانادى. باسقاشا ايتقاندا, وفلاين ومىردەگى جاۋاپكەرشىلىك ونلاين الەمدە مىندەتتەلەدى. سونداي-اق ساياسي سەپاراتيزمنىڭ باستى پروفيلاكتيكاسى بولماق. جالپى, قابىلدانعان زاڭ ازاماتتاردىڭ قۇقىقتارى مەن بوستاندىقتارىن تولىققاندى ىسكە اسىرۋ ءۇشىن ونلاين-پلاتفورمالارمەن ءتيىمدى ىنتىماقتاستىق پەن ءوزارا ءىس-قيمىل ورناتۋعا مۇمكىندىك بەرەدى.
قازىردىڭ وزىندە الەمگە ايگىلى الەۋمەتتىك جەلىلەر مەن ونلاين-پلاتفورمالار ارىپتەستىك ورناتۋعا ىقىلاستى ەكەنىن تانىتىپ, كەيبىرى وكىلدەرىن تاعايىندادى. وسى ورايدا وسى زاڭعا باستاماشى بولعان بارلىق دەپۋتاتقا, جالپى ءماجىلىس جانە سەنات دەپۋتاتتارىنا, جۇمىس توبىنىڭ مۇشەلەرىنە, ۇسىنىس ايتقان, قولداۋ بىلدىرگەن بارشا بەلسەندى ازاماتقا العىس ايتامىز. جاڭا زاڭ ەلىمىزدەگى قوعامدىق قاتىناستىڭ پاراساتتىلىعىن ارتتىرىپ, مەملەكەتىمىزدىڭ تۇتاستىعىن نىعايتىپ, سەپاراتيزمگە جول بەرمەي, ساليقالى ساياسي مادەنيەت قالىپتاستىرۋعا ءوزىنىڭ سەپتىگىن تيگىزەدى دەپ سەنەمىز.
ەرلان سايروۆ,
ءماجىلىس دەپۋتاتى