مادەنيەت مينيسترلىگى بەيبىت شۇمەنوۆتىڭ جانجالىنا قاتىستى پىكىر ءبىلدىردى

«بەكىتىلگەن بەلگىلى ءبىر ەتيكا بار. وسى باعىتتا سپورتشىلارمەن, جاتتىقتىرۋشىلارمەن جانە ۇلتتىق قۇراما مۇشەلەرىمەن جۇمىس جۇرگىزىلىپ كەلەدى. سونداي-اق ءبىز يدەولوگيالىق جۇمىستاردى دا جۇرگىزەمىز. ءبىز بەيبىت شۇمەنوۆكە قاتىستى اقپاراتتان قانىقپىز. ارينە, بۇل دۇرىس ەمەس ارەكەت, اسىرەسە قوعامدىق ورىندا بولعان», دەدى سپورت جانە دەنە شىنىقتىرۋ ىستەرى كوميتەتىنىڭ توراعاسى ەربول مىرزابوسىنوۆ.

ونىڭ ايتۋىنشا, قازاقستاندىق سپورتشىلار قوعامعا ۇلگى كورسەتۋى كەرەك.

ەسكە سالا كەتسەك, كاسىپقوي بوكسشى بەيبىت شۇمەنوۆ ەلورداداعى ساۋدا ورتالىقتارىنىڭ بىرىندە قولىندا بالاسى بار ەر ادامدى ۇرعان. وقيعا ورنىندا تۇسىرىلگەن ۆيدەو جەلىدە تارادى. كەيىن بوكسشى اتالعان وقيعاعا قاتىستى تۇسىنىكتەمە بەردى. سويتسە, بوكسشى شەتەلدە تۇراتىن بالاسىن وتانىنا الىپ كەلىپ, قىدىرتىپ جۇرگەن. سول كەزدە ونى ءبىر بالا ۇرىپ, اياعىنان سۇيرەگەن كورىنەدى. ماسەلەنىڭ انىق-قانىعىن انىقتاۋ كەزىندە جايسىز وقيعا بولعان. پوليتسيا بولىمشەسىندە سوققىعا جىعىلعان ەر ادامنىڭ قازاقستاندا زاڭسىز جۇرگەنى بەلگىلى بولعان.

ال ەرەكشە بالانىڭ اناسى, كەرىسىنشە بوكسشىدان كەشىرىم سۇراپ, تاراپتار جاقسى تارقاسقان.