بيۋدجەت ەسەبى وسىنى كورسەتىپ وتىر
الدىمەن دەپۋتاتتار الدىندا باياندامانى قارجى ءمينيسترى بولات جامىشەۆ پەن رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتىنىڭ ءتوراعاسى ومارحان وكسىكباەۆ جاسادى. قارجى ءمينيسترى رەسپۋبليكالىق بيۋدجەت زاڭناماسىنداعى 44-باپتىڭ 25-ءى ورىندالعاندىعىن ەرەكشە اتاپ ءوتتى. ۇلتتىق قوردان بولىنگەن ترانسفەرتتەر مەن ۇكىمەت رەزەرۆىندەگى قارجىلار تولىق قارىشتالماسا, ونى جۇمساۋ ءبىزدىڭ باستى مىندەتىمىز بولعان جوق, دەيدى بولات بيداحمەت ۇلى. ۇكىمەت 2009 جىلدىڭ قورىتىندىسى بويىنشا بيۋدجەتتىڭ شىعىس بولىگىن 98,2 پايىزعا ورىنداعان, ال 60 ميلليارد تەڭگە يگەرىلمەي قالعان. ايتسە دە, ۇكىمەت الدىنا قويىلعان مىندەتتەر ورىندالدى دەپ سانايتىندىعىن ورتاعا سالدى قارجى ءمينيسترى.
كوميتەت توراعاسىنىڭ بايانداماسى ۇكىمەتتىكىمەن ۇندەسىپ جاتقانىمەن, ومارحان نۇرتاي ۇلى بىرقاتار كەمشىلىكتەرگە نازار اۋدارتتى (ونىڭ ءسوزى بولەك بەرىلىپ وتىر). رەسپۋبليكالىق بيۋدجەتتىڭ ورىندالۋىن تالقىلاۋ بارىسىندا دەپۋتاتتار بايانداماشىعا كوپتەگەن سۇراقتار قويىپ, ءتيىستى ۇسىنىستارىن ورتاعا سالدى. ءسويتىپ, قىزۋ تالقىدان وتكەن بيۋدجەتتىك ەسەپ سەناتقا جىبەرىلدى. سول سياقتى بىرقاتار كەدەندىك زاڭ جوبالارى قولداۋ تاۋىپ, ءتيىستى وزگەرىستەرىمەن جوعارعى پالاتاعا جول تارتتى.
ال جالپى وتىرىستا بىرقاتار جاڭا زاڭ جوبالارى زاڭمەن جۇمىس ىستەۋ وندىرىسىنە الىندى. اتاپ ايتقاندا, “ۋاقىتشا اكەلۋ تۋرالى كونۆەنتسيانى راتيفيكاتسيالاۋ تۋرالى”, “قازاقستان رەسپۋبليكاسىنىڭ ۇكىمەتى مەن اۋعانستان يسلام رەسپۋبليكاسىنىڭ ۇكىمەتى اراسىنداعى ءبىلىم بەرۋ سالاسىنداعى ىنتىماقتاستىق تۋرالى كەلىسىمدى راتيفيكاتسيالاۋ تۋرالى”, “كەدەن وداعى كوميسسياسىنىڭ كەدەندىك ستاتيستيكا ورتالىعى مارتەبەسى تۋرالى حاتتامانى راتيفيكاتسيالاۋ تۋرالى”, “سىرتقى ساۋدا ستاتيستيكاسى مەن ءوزارا ساۋدا ستاتيستيكاسىنىڭ دەرەكتەرىن بەرۋ ءتارتىبى تۋرالى حاتتامانى راتيفيكاتسيالاۋ تۋرالى” زاڭ جوبالارى بويىنشا ءماجىلىستىڭ حالىقارالىق ىستەر, قورعانىس جانە قاۋىپسىزدىك كوميتەتى قورىتىندى ازىرلەيتىن بولادى.
سونداي-اق دەپۋتاتتار “قازاقستان رەسپۋبليكاسىنىڭ ۇكىمەتى مەن قىتاي حالىق رەسپۋبليكاسىنىڭ ۇكىمەتى اراسىنداعى قازاقستان-قىتاي كەدەن شەكاراسى ارقىلى قۇبىرجول كولىگىمەن ءوتكىزىلەتىن ەنەرگيا رەسۋرستارىن كەدەندىك باقىلاۋ تۋرالى كەلىسىمدى راتيفيكاتسيالاۋ تۋرالى” قازاقستان رەسپۋبليكاسى زاڭىنىڭ جوباسىنا قازاقستان رەسپۋبليكاسى پارلامەنتىنىڭ سەناتى ەنگىزگەن وزگەرىستەردى جانە “جەر قويناۋى جانە جەر قويناۋىن پايدالانۋ تۋرالى” قازاقستان رەسپۋبليكاسى زاڭىنىڭ جوباسى بويىنشا قازاقستان رەسپۋبليكاسى پارلامەنتىنىڭ ءماجىلىسى مەن سەناتى اراسىنداعى كەلىسپەۋشىلىكتەردى ەڭسەرۋ جونىندەگى كەلىسىم كوميسسياسىنىڭ ۇسىنىستارىن قارادى.
جالپى وتىرىستا كۇن ءتارتىبىنە ەنگىزىلگەن وزگە دە زاڭدىق قۇجاتتار بويىنشا ءتيىستى شەشىمدەر قابىلداندى.
اسقار تۇراپباي ۇلى.