قازنەتتە 5G جەلىلەرى ادامداردىڭ دەنساۋلىعىنا قاۋىپ توندىرەتىنى جايلى اقپارات تاراپ ءجۇر. مۇنداي دەرەكتى تاراتىپ جۇرگەندەردىڭ سوزىنە سەنسەك, 5G ادام دنق-سىنىڭ وزگەرىستەرىنە, مي ىسىگىنە جانە باسقا دا ەمدەلمەيتىن اۋرۋلارعا اكەلەدى-مىس, دەپ حابارلايدى Egemen.kz.
Stopfake.kz فاكتچەكەرلەرى بۇل اقپاراتتىڭ شىنايىلىعىنا كۇمان كەلتىرىپ, تەرەڭىنەن زەرتتەپ كوردى. الەۋمەتتىك جەلىدە تاراعان ۆيدەو Epoch Media Group كومپانياسىنا تيەسىلى NTD تەلەارناسىنىڭ جاڭالىقتار سيۋجەتىنەن ءۇزىندى بولىپ شىقتى. اتالمىش كومپانيا پسەۆدوعىلىمي جاڭالىقتار شىعارىپ, قاستاندىق تەوريالاردى جانە فەيك جاڭالىقتاردى تاراتۋمەن اينالىساتىن The Epoch Times گازەتىنىڭ دە يەسى.
بەينەروليكتە جۇرگىزۋشى 5G جەلىلەرىنىڭ زيانى دالەلدەنگەن عىلىمي كونفەرەنتسيا تۋرالى ءسوز قوزعاعان. بۇل كونفەرەنتسيا 2019 جىلى وتكەن جانە فاكتچەكەرلەر بۇل تۋرالى بۇرىن دا جازعان ەدى. وندا ايتىلعان تەزيستەر دالەلدەنبەگەن جانە قاتىسۋشىلاردىڭ سوزىمەن عانا راستالادى. سونىمەن قاتار 2019 جىلى تالقىلانعان كونفەرەنتسياعا قاتىسۋشىلاردىڭ مالىمدەمەلەرىنە قايشى كەلەتىن بەدەلدى عىلىمي زەرتتەۋلەر دە جارىق كورگەن ەدى.
بۇگىندە 5G جەلىلەرىنىڭ قاۋىپسىزدىگى ودان دا كوپ زەرتتەۋلەر مەن وبەكتيۆتى شىنايىلىقپەن راستالىپ كەلەدى. ماسەلەن, ددۇ-نىڭ رەسمي سايتىندا جاڭا بۋىنداعى جەلىلەر ادامداردىڭ دەنساۋلىعىنا تەرىس اسەر ەتەتىنىنە ەشقانداي دالەل جوق دەلىنگەن.
2020 جىلى يونداۋشى ەمەس ساۋلەلەنۋدەن قورعاۋ جونىندەگى حالىقارالىق كوميسسيا (ICNIRP) 5G بايلانىسىن قولدانۋ ادام دەنساۋلىعىنىڭ ناشارلاۋىنا اكەلمەيدى دەگەن قورىتىندىعا كەلدى.
2021 جىلى ەۋروپارلامەنت كوميسسياسى 5G تەحنولوگياسىن ادامدار ءۇشىن قاۋىپسىز دەپ تاپتى.
قازىردىڭ وزىندە 5G جەلىلەرى اقش, سولتۇستىك كورەيا, قىتاي, جاپونيا, ءباا, كۋۆەيت, شۆەتسيا, جاڭا زەلانديا, اۆستراليا جانە باسقا دا بىرقاتار ەلدەردە ورناتىلعان.
قازاقستاندا 5G بازالىق ستانتسيالارى 2023 جىلدىڭ باسىندا قويىلدى. ولار استانا, الماتى جانە شىمكەنت قالالارىندا بار. ەلىمىزدىڭ باسقا قالالارىندا دا جەلىلەردى ورناتۋ جوسپارلانىپ وتىر. ءار ءتۇرلى ەلدەردە بايلانىستىڭ بۇل ءتۇرى ىسكە قوسىلۋىمەن مي ىسىكتەرى مەن باسقا دا اۋىر اۋرۋلاردى تىركەۋ جاعدايلارى جوق ەكەنىن ايتا كەتكەن ءجون.