كەرەكۋدەگى تاريحي عيماراتتار مەن ەسكەرتكىشتەرگە جاپسىرىلعان اقپاراتتىق QR-كودتار ەسىرتكى ساۋداسىن جارنامالاپ كەلگەنى انىقتالدى. ءتۇرلى كۇماندى سايتقا ءجون سىلتەيتىن سىلتەمەلەردىڭ تاريحي نىساندار جايلى رەسۋرسقا قالاي ءتۇسىپ كەتكەنى ازىرگە بەيمالىم.
قالا كوشەلەرىندەگى ەسكەرتكىشتەر مەن تاريحي نىساندار جايلى كەڭىرەك اقپارات الۋ, تۋريستەرگە قولايلى جاعداي تۋدىرۋ ماقساتىن كوزدەگەن QR-كودتار باستاماسى 2018 جىلى قولعا الىنىپ, وعان 1,7 ملن تەڭگە بيۋدجەت قاراجاتى جۇمسالىپتى. الگى QR-كودقا ۇيالى تەلەفونىڭىزدىڭ كامەراسىن جاقىنداتساڭىز بولعانى, تاريحي ەسكەرتكىش, بەلگىلى تۇلعالار جايلى اقپارات رەسۋرسى ينتەرنەتتەن اۆتوماتتى تۇردە اشىلادى. سول ۋاقىتتا بۇل دا تسيفرلاندىرۋدىڭ يگىلىگى عوي دەپ قۋانعانىمىز راس. الايدا تسيفرلى تەحنولوگيانى ۇنەمى باقىلاۋدا ۇستاماساڭ, قوعامعا كەسىرىن تيگىزىپ, لاڭ سالاتىن قىرسىزدىعى دا بار ەكەن. بيىل ماۋسىم ايىنىڭ ورتاسىنان جەرگىلىكتى تۇرعىندار مەن سىرتتان كەلگەن مەيماندار بۇل تسيفرلى سىلتەمەلەردىڭ دۇرىس جۇمىس ىستەمەي تۇرعانىن, تەلەفونمەن سكانەرلەگەندە ەسىرتكى ساتاتىن ينتەرنەت دۇكەندەردىڭ جارناماسى شىعا كەلەتىنىن بايقاعان. قالا كوشەلەرىندە تۇرعان 280 تاقتايشانىڭ كوبىنەن وسىنداي كۇماندى اقپاراتتار تابىلعان. جۇرتشىلىق نەگىزىنەن استانا, قامزين كوشەلەرىندە كەلەڭسىزدىكتەرگە تاپ بولعانىن ايتادى.
وڭىرلىك مادەنيەت, تىلدەردى دامىتۋ جانە ارحيۆ ءىسى باسقارماسىنان حابارلانعانداي, بيىل 1 قاڭتاردا اتالعان QR-كودتار تيىسىنشە جۇمىس ىستەپ, دۇرىس اقپاراتتاردى كورسەتىپ تۇرعان. قازىرگى كۇنى بارلىق رەسۋرستىق تاقتايشالار الىنىپ, ولاردى جاڭارتۋ كوزدەلىپ وتىر. شاھارداعى ەسكەرتكىشتەر مەن عيماراتتاردىڭ ءتىزىمى ءتۇزىلىپ, ولار جايىنداعى اقپاراتتاردىڭ قورى پاۆلودار وبلىستىق پوتانين اتىنداعى تاريحي-ولكەتانۋ مۋزەيىنىڭ سايتىنا توعىستىرىلىپ جاتىر. ەندىگى جەردە QR-كودتاردىڭ سىلتەمەسى بىردەن سول سايتقا باعىتتاماق.
انىقتاپ بىلگەنىمىزدەي, قالانىڭ كورنەكتى جەرلەرىنە الگىندەي QR-كودتاردى 2018 جىلى «تولچين ا.س.» جەكە كاسىپكەرلىگى ىلگەن. 2018 جىلدىڭ مامىر ايىندا اتالعان سۋبەكتىمەن پوتانين اتىنداعى تاريحي-ولكەتانۋ مۋزەيى شارتقا وتىرىپتى. كاسىپكەرلىك بۇعان قوسا شاھارداعى كورنەكتى جەرلەردىڭ كارتاسىنا, الەۋمەتتىك جەلىدەگى اقپاراتتىق ماتەريالداردى ازىرلەۋ جانە ورنالاستىرۋ قىزمەتىنە دە جاۋاپتى بولعان.
قازىرگى كۇنى اتالعان وقيعا بويىنشا وڭىردە قىلمىستىق تەرگەۋ باستالدى. «وڭىرلىك پوليتسيا دەپارتامەنتىنىڭ پوليتسەيلەرى قىلمىستىق كودەكستىڭ 299-بابى, 1-تارماعى بويىنشا سوتقا دەيىنگى تەرگەۋ-تەكسەرۋ شارالارى جۇرگىزىلىپ جاتىر. ونىڭ اياسىندا جەدەل ىزدەستىرۋ شارالارى قولعا الىنىپ, قىلمىستىق وقيعاعا قاتىسى بار تۇلعالار انىقتالۋدا» دەلىنگەن پوليتسيانىڭ رەسمي اقپاراتىندا. تەكسەرۋ ناتيجەلى بولسا, كىنالى ازاماتتار ءۇش جىلعا دەيىن باس بوستاندىعىنان ايىرىلىپ, دۇنيە-مۇلكى تاركىلەنۋى مۇمكىن.
پاۆلودار وبلىسى