اقتوبە وبلىسى حرومتاۋ اۋدانىنىڭ تۇرعىنى بۇرىنعى ايەلىن اليمەنت وندىرۋگە سوتقا ارىز بەرگەنى ءۇشىن سوققىعا جىعىپ, باس بوستاندىعىنان شەكتەلدى. ەندى ول جازاسىن اقتوبە وبلىسى بويىنشا قىلمىستىق-اتقارۋ جۇيەسى دەپارتامەنتىنە قاراستى حرومتاۋ اۋداندىق پروباتسيا قىزمەتىنىڭ ەسەبىندە وتەيدى, دەپ حابارلايدى Egemen.kz.
جالاقىسىنىڭ جارتىسى اليمەنت ءۇشىن ۇستالعانىن كورگەن حرومتاۋ اۋدانىنىڭ تۇرعىنى اشۋعا بۋلىعىپ, ۇيىنە كورشى تۇراتىن بۇرىنعى ايەلىن سوققىعا جىققان.
سوققى سالدارىنان ءتۇرلى دەنە جاراقاتتارىن العان جابىرلەنۋشى ۋ. ءوزىن سوققىعا جىققان بۇرىنعى جولداسىن سوتقا بەردى. الايدا كەيىن ول ويىن وزگەرتىپ, ءوزىن سوققىعا جىققان بۇرىنعى جولداسىن كەشىرەتىنىن جانە ماتەريالدىق, مورالدىق زالالدىڭ تولىق وتەلگەنىن ايتىپ, مەدياتسيالىق كەلىسىمگە كەلگەنىن ايتادى. سونىمەن قاتار اليمەنت وندىرۋدەن باس تارتقانىن العا تارتىپ, سوتتان بۇرىنعى كۇيەۋىنىڭ باس بوستاندىعىنان ايىرمايتىن جازا تاعايىنداۋدى سۇرادى.
الايدا حرومتاۋ اۋداندىق سوتى سوتتالۋشى ازاماتتى قر قك-ءنىڭ 106-بابىنىڭ 1-بولىگىمەن كوزدەلگەن قىلمىستى جاساعانى ءۇشىن كىنالى دەپ تانىپ, 4 جىلعا باس بوستاندىعىنان شەكتەۋ جازاسىن تاعايىندادى. حرومتاۋ اۋداندىق پروكۋراتۋراسى تۇرمىستىق زورلىق-زومبىلىقتىڭ سالدارىن ءتۇسىندىرۋ, الدىن الۋ ماقساتىندا اتالعان سوت وتىرىسىنا حرومتاۋ اۋداندىق پروباتسيا قىزمەتىنىڭ ەسەبىندە تۇرعان سوتتالعانداردى قاتىستىردى.