ءماجىلىس دەپۋتاتى, «AMANAT» پارتياسى فراكتسياسىنىڭ مۇشەسى نۇرتاي سابيليانوۆ حالىقپەن كەزدەسۋىن اباي وبلىسىنىڭ ماقانشى اۋىلىنان باستادى, دەپ حابارلايدى Egemen.kz.
كەزدەسۋ بارىسىندا دەپۋتات مەملەكەت باسشىسى ماقانشى اۋدانىنا نازار اۋدارىپ وتىرعانىن ايتتى.
«پرەزيدەنتىمىز ۇلتتىق قۇرىلتايدا ماقانشى اۋدانىن قالپىنا كەلتىرۋ تۋرالى شەشىم قابىلداعانى بەلگىلى. ماقانشىنىڭ الەۋەتى مىقتى. وڭىردە تۋريزم, كەن ءوندىرىسى, قىتايمەن شەكاراداعى كەدەن بەكەتى ارقىلى ساۋدا-ساتتىق جاقسى دامىعان. ماقانشى اۋدانىن جەدەلدەتىپ قالپىنا كەلتىرۋ ماقساتىنداعى جۇمىستارعا ءبىز دە ءوز قۇزىرەتىمىز شەڭبەرىندە ىقپال ەتەتىن بولامىز», دەدى نۇرتاي ساليح ۇلى.
تۇرعىندار اۋىلشارۋاشىلىعىنا, سونىڭ ىشىندە مال وسىرۋگە, ەگىن ەگۋگە, ينفراقۇرىلىمدى دامىتۋ, كوگىلدىر وتىنمەن قامتاماسىز ەتۋ ماسەلەلەرىنە قاتىستى وزەكتى سۇراقتاردى كوتەردى.
ودان ءارى نۇرتاي سابيليانوۆ ازاماتتاردى جەكە ماسەلەلەرى بويىنشا قابىلدادى.
سونداي-اق دەپۋتات ءۇرجار اۋدانىنا جۇمىس ساپارى اياسىندا مالاق اۋىلىنداعى سۋمەن جابدىقتاۋ نىساندارىنىڭ قۇرىلىسىمەن تانىستى.
سۋ قۇبىرى جەلىسى 8,933 شاقىرىم, تەرەڭدىگى 55 مەتر. مەردىگەر مەكەمە وكىلدەرىنىڭ ايتۋىنشا, قۇرىلىس جۇمىسىن قازان ايىنىڭ سوڭىنا دەيىن اياقتاۋ جوسپارلانعان.
دەپۋتاتتىڭ كەزدەسۋى ودان ءارى ءۇرجار اۋدانىنىڭ جوعارعى ەگىنسۋ, ايتباي, تاسكەسكەن اۋىلدارىندا, اقسۋات اۋدانىنىڭ قىزىل-كەسەك, قۇمقول, تانامىرزا اۋىلدارىندا, كوكپەكتى اۋدانىنىڭ كوكپەكتى, شارىپتوعاي, شۇعىلباي, بيعاش اۋىلدارىندا, جارما اۋدانىنىڭ شار قالاسى, قالباتاۋ اۋىلدارىندا, اياگوز اۋدانىنىڭ تارباعاتاي, سارىارقا, قاراعاش, مالكەلدى, بارشاتاس, بايقوشقار اۋىلدارىندا, اباي اۋدانىنىڭ قاراۋىل, ارحات, قاسقاباق اۋىلدارىندا, سەمەي قالاسىندا جالعاسادى.