2023 جىلدىڭ 4-8 شىلدە ارالىعىندا قر سىرتقى ىستەر مينيسترلىگىنىڭ «وتانداستار قورى» قوعامى ۇيىمداستىرۋىمەن جانە قازاقستاننىڭ موڭعولياداعى ەلشىلىگىنىڭ قولداۋىمەن ۇلان-باتىر, قوبدا, بايان-ولگەي ايماقتارىندا قازاقستان مەن موڭعوليا اراسىنداعى ديپلوماتيالىق قاتىناستاردىڭ 30 جىلدىعى اياسىندا ەكى ەل اراسىندا دوستىق پەن ىنتىماقتاستىقتى نىعايتۋ ماقساتىندا موڭعوليا قازاقتارىنىڭ IV كىشى قۇرىلتايى وتەدى, دەپ حابارلايدى Egemen.kz.
اۋقىمدى شارا اياسىندا ەكى ەل عالىمدارى, مەملەكەت, قوعام قايراتكەرلەرىنىڭ قاتىسۋىمەن عىلىمي كونفەرەنتسيا, كينو جانە مۋلتفيلم اپتالىعى, بيزنەس فورۋم, ۇلتتىق ويىندار مەن مەرەكەلىك كونتسەرتتەر وتەدى.
سونىمەن قاتار 8-9 شىلدەدە رەسەي فەدەراتسياسىنىڭ التاي رەسپۋبليكاسىنداعى قازاقتار مەكەندەيتىن قوساعاش اۋدانىندا جانە التاي ولكەسى ورتالىعى بارناۋلداعى قانداستارمەن كەزدەسۋ وتكىزىپ, رۋحاني كەش ۇيىمداستىرىلادى.
«وتانداستار قورى» قوعامى تاراپىنان وسىنداي ءىس-شارالاردى وتكىزۋ ەلدەرىمىز اراسىنداعى دوستىق كوپىردى نىعايتىپ قانا قويماي, موڭعوليا جانە رەسەي قازاقتارىنىڭ ۇلتتىق بىرەگەيلىگىن ارتتىرا تۇسۋگە جانە ەلىمىزبەن رۋحاني بايلانىستاردى نىعايتۋعا دا ءوز ۇلەسىن قوسپاق.