كەز-كەلگەن تۇرعىن قاۋىپسىز قالادا ءومىر سۇرگىسى كەلەدى. قوعامدىق قاۋىپسىزدىكتى ارتتىرۋدا جول بويىنداعى بەينەباقىلاۋ كامەرالارى ماڭىزدى ءرول اتقارادى. ولار بولعان وقيعالاردى جازىپ الىپ, ۇرلىق, شابۋىل جانە جول قوزعالىسى ەرەجەلەرىن بۇزۋ سياقتى قىلمىستاردى انىقتاۋعا كومەكتەسەدى. بەينەباقىلاۋ كامەرالارى ارقىلى قۇقىق قورعاۋ ورگاندارى وقىس وقيعا كەزىندە جىلدام ارەكەت ەتىپ, توتەنشە جاعدايلاردىڭ الدىن الۋ شارالارىن جاقسارتا الادى.
قاراعاندى وبلىسىنا قاراستى قاراعاندى, تەمىرتاۋ, ساران قالالارى مەن وساكاروۆ كەنتىندە 2021 جىلدىڭ قازان ايىنان باستاپ «قاۋىپسىز قالا» جوباسى جۇمىس ىستەيدى. ونىڭ اياسىندا 2726 بەينەباقىلاۋ كامەراسى ورناتىلدى. سونىمەن قاتار جول قوزعالىسى ەرەجەلەرىنىڭ بۇزۋشىلىقتارىن تىركەيتىن 86 كەشەن ىسكە قوسىلدى.
بەينەباقىلاۋ كامەرالارىنىڭ پروفيلاكتيكالىق اسەرى بار. ولار – جول ينفراقۇرىلىمىنىڭ باقىلاۋدا ەكەنىن كورسەتەتىن بىردەن-ءبىر قۇرال. ادامدار ءوز ءىس-ارەكەتتەرىنىڭ كامەراعا جازىلعانىن بىلگەن جاعدايدا زاڭعا باعىنۋعا بەيىم بولادى. بۇل قىلمىستىڭ الدىن الىپ, قالاداعى قاۋىپسىزدىكتىڭ جاقسارۋىنا ىقپال ەتەدى.
بەينەباقىلاۋ كامەرالارى جول قاۋىپسىزدىگىن جاقسارتۋعا كومەكتەسەدى. ولار جىلدامدىقتى ارتتىرۋدى, قىزىل باعدارشامعا ءوتۋدى, زاڭسىز باسىپ وزۋدى انىقتاي الادى. قالادا وسىنداي باقىلاۋ اۋماعىندا اۆتوموبيل ترافيگىن تىركەۋگە جانە جىلدامدىق رەجيمىنىڭ بۇزىلۋ بەلگىلەرى مەن وقيعالاردى انىقتاۋعا ارنالعان 70 اپپاراتتىق-باعدارلامالىق كەشەن بار. سونداي–اق بىزدە اۆتوموبيل ترافيگىن تىركەۋگە جانە جول قيىلىسىنداعى باعدارشامنىڭ تىيىم سالۋ سيگنالىنا ءوتۋ مەن ايالداما سىزىعىنا شىعۋ ەرەجەلەرىن بۇزۋ بەلگىلەرىندەگى وقيعالاردى انىقتاۋعا ارنالعان 16 كەشەن جۇمىس ىستەيدى.
باقىلاۋ كامەرالارى كولىك قوزعالىسى, قوزعالىس ءتارتىبى جانە جاياۋ جۇرگىنشىلەردىڭ مىنەز-قۇلقى تۋرالى دەرەكتەردى ۇلكەن كولەمدە جينايدى. بۇل دەرەكتەردى قالالىق ينفراقۇرىلىمدى تالداۋ جانە جوسپارلاۋ ءۇشىن پايدالانۋعا بولادى. جاقىندا اباي, شاحتينسك قالالارى مەن شاحان, دولينكا جانە سەۆەرو-زاپادنىي كەنتتەرىندەگى بەينەباقىلاۋ كامەرالارى بىرىڭعاي قالالىق بەينەباقىلاۋ جۇيەسىنە بىرىكتىرىلدى.
قاۋىپسىزدىك ساقشىلارى جول-كولىك وقيعالارى مەن كولىك اعىنىنىڭ پروبلەمالارى ءۇشىن جوعارى قاۋىپتى ايماقتاردى انىقتاۋعا كومەكتەسەدى. دەرەكتەرگە سۇيەنسەك, قاراعاندى وبلىسىنا قاراستى قالالاردا 2023 جىلدىڭ 5 ايىندا جول كولىك وقيعالارى سانى 2022 جىلدىڭ سايكەس كەزەڭىمەن سالىستىرعاندا 16,2%-عا تومەندەدى.
جول بويىنداعى باقىلاۋ كامەرالارى قالالاردى قاۋىپسىز ەتۋدە ماڭىزدى ءرول اتقارادى. ولار قوعامدىق قاۋىپسىزدىكتى جاقسارتۋعا, قىلمىستىڭ الدىن الۋعا, جول قوزعالىسى قاۋىپسىزدىگىن رەتتەۋگە جانە تالداۋ مەن جوسپارلاۋ ءۇشىن قۇندى دەرەكتەرمەن قامتاماسىز ەتۋگە كومەكتەسەدى. جول ينفراقۇرىلىمىنا بەينەباقىلاۋ كامەرالارىن ەنگىزىپ, ولاردىڭ سانىن ارتتىرۋ – قاۋىپسىز قالاعا جاسالعان ەڭ ءتيىمدى قادام. قاراعاندى قالاسىنىڭ تۇرعىندارى مەن قوناقتارى قاشان دا وزدەرىن ەركىن ءارى قاۋىپسىز سەزىنۋى ءتيىس.