قىرعىزستاندا الماتى وبلىسى پوليتسيا دەپارتامەنتىنىڭ بۇرىنعى باسشىسى سەرىك كۇدەباەۆتىڭ ەلدەن قاشۋ فاكتىسى بويىنشا قوزعالعان قىلمىستىق ىس توڭىرەگىندە بەس ايىپتالۋشىعا ۇكىم شىعارىلدى, دەپ حابارلايدى Egemen.kz 24.kg سايتىنا سىلتەمە جاساپ.
بەلگىلى بولعانداي, ءىس بويىنشا ءتورت ايىپتالۋشى - قاراپايىم تۇرعىندار, تاعى بىرەۋى - قىرعىز رەسپۋبليكاسى ۇلتتىق قاۋىپسىزدىك مەملەكەتتىك كوميتەتى شەكارا قىزمەتىنىڭ بۇرىنعى قىزمەتكەرى. ىسپەن قىرعىزستاننىڭ اسكەري پروكۋراتۋراسى اينالىستى.
تەرگەۋ اياقتالعان سوڭ ماتەريالدار سوتقا بەرىلدى. الدىن الا مالىمەت بويىنشا, بارلىق ايىپتالۋشىلارعا 350 000 سوم (1,8 ملن تەڭگە) ايىپپۇل سالىندى.
ءساۋىردىڭ 28-ءى كۇنى تالدىقورعان قالالىق سوتىنىڭ سۋدياسى ءابدىللا ۇمبەتاي سەرىك كۇدەباەۆتى 10 جىلعا باس بوستاندىعىنان ايىرۋ جازاسىن, ورتاشا رەجيمدەگى كولونيادا وتەۋ تۋرالى ۇكىم شىعاردى.ايتا كەتەيىك, 27 ساۋىردە قازاقستاننىڭ باس پروكۋرورى بەرىك اسىلوۆ كۇدەباەۆتىڭ تۇركيادا ۇستالعانىن حابارلادى.
2023 جىلدىڭ 3 ساۋىرىندە الماتى وبلىستىق پوليتسيا دەپارتامەنتىنىڭ بۇرىنعى باسشىسى سوت وتىرىسىنا بارماعان, ناتيجەسىندە وعان حالىقارالىق ىزدەۋ جاريالانعان ەدى.
ۇقك شەكارا قىزمەتى سەرىك كۇدەباەۆتىڭ رەسمي تۇردە شەكارادان وتپەگەنىن مالىمدەدى. ءساۋىردىڭ 12-ءسى كۇنى باس پروكۋراتۋرا الماتى وبلىسى پد ەكس-باسشىسىنا قاتىستى مەملەكەتتىك شەكارانى زاڭسىز كەسىپ ءوتۋ فاكتىسى بويىنشا قىلمىستىق ءىس قوزعادى.