تانىمال عالىم, مەملەكەتتىك سىيلىقتىڭ لاۋرەاتى مەيىربەك مولدابەكوۆ قازاقستاننىڭ عارىش سالاسىنداعى جەتىستىكتەرىمەن ءبولىستى. بۇل تۋرالى «Egemen Qazaqstan» گازەتىنىڭ ءتىلشىسى فارحات قايرات ۇلى جازدى.
عالىمنىڭ ايتۋىنشا, ەلىمىزدە عارىش قىزمەتىن دامىتۋدىڭ 2005-2007 جىلدارعا ارنالعان جانە رەسپۋبليكانى يندۋستريالىق-يننوۆاتسيالىق دامىتۋدىڭ 2009-2014 جىلدارعا ارنالعان مەملەكەتتىك باعدارلامالارى اياسىندا عارىش قىزمەتىن دامىتۋدىڭ سالالىق باعدارلاماسىن قابىلداۋ ءارى ىسكە اسىرۋ وتاندىق عارىش عىلىمىنىڭ دامۋىنا ايرىقشا سەرپىن بەرگەن. ناتيجەسىندە 2007-2014 جىلدارى بەلگىلى عارىشكەر, مايتالمان ينجەنەر تالعات مۇساباەۆ باسقارعان ۇلتتىق عارىش اگەنتتىگى عارىش سالاسىنىڭ عىلىمي جانە ينجەنەرلىك وزەگىن قالىپتاستىردى. سول ارقىلى عارىش تەحنيكاسىنىڭ وتاندىق ۇلگىلەرىن جاساۋ جونىندەگى عىلىمي ازىرلەمەلەردىڭ جاڭا باعىتتارى دامىدى. ەل عالىمدارى مەن ينجەنەرلەرىنىڭ قاتىسۋىمەن عارىشتىق بايلانىس جانە جەردى قاشىقتان زوندتاۋ جۇيەلەرى قۇرىلعان.
«ەلىمىزدىڭ جوعارى دالدىكتەگى سپۋتنيكتىك ناۆيگاتسيا جۇيەسى دۇنيەگە كەلدى. ونى تولىعىمەن وتاندىق عالىمدار ازىرلەپ شىقتى. سپۋتنيكتىك ناۆيگاتسيا سالاسىنداعى قۇزىرەتتەردى جانە عارىش جۇيەلەرى قىزمەتتەرىنىڭ تۇپكىلىكتى تۇتىنۋشىلارى ءۇشىن كوپتەگەن قوسىمشانى قارقىندى دامىتۋ ءۇشىن ءتيىستى جاعداي جاسالدى. عارىشتىق تەحنيكانى جانە عارىش قىزمەتتەرىن تۇتىنۋشىلاردىڭ اپپاراتتىق-باعدارلامالىق قۇرالدارىن ازىرلەۋ مەن ءوندىرۋدىڭ عىلىمي-تەحنولوگيالىق جانە وندىرىستىك بازالارى قۇرىلدى. ءبىزدىڭ عالىمدار مەن ينجەنەرلەردىڭ ارقاسىندا عىلىمي جانە تەحنولوگيالىق ماقساتتاعى وتاندىق ەكى عارىش اپپاراتى قۇرىلىپ, ۇشىرىلدى, ويداعىداي ىسكە قوسىلدى», دەپ تۇيىندەدى مامان.