ايگىلى «گرەممي» سىيلىعىنىڭ يەگەرى يمانبەك زەيكەنوۆ پوتانين اتىنداعى تاريحي-ولكەتانۋ مۋزەيىنە ءوزىنىڭ پلاتينالى ديسكىسىن تارتۋ ەتتى. زاماناۋي مۋزىكالىق كوللەكتسيا ساز ونەرىنە اڭسارى اۋعان جاس ورەندەر ءۇشىن قىزىقتى بولاتىنىنا داۋ جوق.
بۇل جاڭالىقتى پوتانين اتىنداعى تاريحي-ولكەتانۋ مۋزەيى الەۋمەتتىك جەلىدەگى پاراقشاسىندا حابارلادى. «قازاقستاندىق ديدجەي ءارى ساۋند-پروديۋسەر يمانبەك زەيكەنوۆ 2021 جىلى العان پلاتينالى ديسكىنى مۋزەيگە سىيلاپ, ەكسپوناتتار قورىن تولىقتىرا ءتۇستى. جاقىن كۇندەرى بۇل ەرەكشە ەكسپوناتتى ءبىزدىڭ ەكسپوزيتسيالارىمىزدان كورە الاسىزدار» دەلىنگەن اقپاراتتا. مۋزەيدىڭ باس قور ساقتاۋشىسى ءاليا جومارتوۆانىڭ ايتۋىنشا, بۇگىندە اتالعان مەكەمەنىڭ قورىندا 143 مىڭنان استام جادىگەر بار. مادەني ۇيىمعا قاراستى مايرا شامسۋتدينوۆا اتىنداعى ءان-ونەر مۋزەي-ۇيىندە كوبىنە ساز ونەرىنە قاتىستى ەكسپوناتتار توپتاستىرىلعان.
ايتىپ وتەيىك, پلاتينالى ديسكىنى يمانبەك شەتەلدىك تانىمال ءانشى-سازگەرلەر Rita Ora جانە David Guetta-مەن بىرگە وڭدەگەن «Big» كومپوزيتسياسى ءۇشىن العان. بۇل ترەكتە بي مۋزىكاسى, ەلەكترو-پوپ, حيپ-حوپ جانە حاۋس ىرعاقتارى بار. كەزىندە مۋزىكا سىنشىلارى اۋەندە كەزدەسەتىن دىبىستار مەن ۆوكالعا ەرەكشە ءمان بەرگەن. بۇل تۋىندى بولگارياداعى مۋزىكالىق چارتتاردا جەتىنشى ورىندى يەلەنسە, گەرمانيا, ماجارستان, يرلانديا, ليتۆا, شۆەيتساريا, ۇلىبريتانيا ەلدەرىندە تىڭدارمان تاراپىنان جوعارى باعالاندى. Billboard Dance/Electronic Songs رەيتينگىندە 11-ورىنمەن تۇيىندەلدى.
پاۆلودار