وزبەكستاندا قازاقستاننىڭ مادەنيەت كۇندەرى اياسىندا تاشكەنتتەگى الىشەر ناۋاي اتىنداعى ۇلكەن تەاتر ساحناسىندا «اباي» وپەراسىنىڭ كورسەتىلىمى ءوتتى. تاريحي تۋىندىنى اباي اتىنداعى قازاق ۇلتتىق وپەرا جانە بالەت تەاترىنىڭ شىعارماشىلىق ۇجىمى ۇسىندى, دەپ حابارلايدى Egemen.kz.
20 ماۋسىمدا باستالعان بىرقاتار ءىس-شارا «اباي» وپەراسىمەن سالتاناتتى تۇردە قورىتىندىلاندى. قويىلىمعا قر مادەنيەت جانە سپورت ءمينيسترى اسحات ورالوۆ باردى.
«بىرنەشە كۇن ىشىندە وزبەكستاننىڭ ءىرى قالالارىندا قازاقستاندىق فيلمدەردىڭ كورسەتىلىمدەرى, ارتيستەرىمىزدىڭ گالا-كونتسەرتتەرى جانە باسقا دا ءىس-شارالار ءوتتى. قازاقستاننىڭ مادەنيەت كۇندەرىن «اباي» وپەراسىنىڭ كورسەتىلىمى اياقتايدى. اباي قۇنانباي ۇلى - قازاق حالقىنىڭ عانا ەمەس, بۇكىل الەم ءۇشىن داڭقتى تۇلعا. اباي ارقاشان ادامزات بالاسىن سۇيۋگە شاقىرعان. وسى قاعيدالارعا سۇيەنە وتىرىپ, ءبىز وزبەك ارىپتەستەرىمىزبەن قارىم-قاتىناستى نىعايتۋ باعىتىندا جۇمىس ىستەيمىز دەپ ۋاعدالاستىق. وزبەكستان رەسپۋبليكاسىنىڭ مادەنيەت جانە تۋريزم مينيسترلىگىنە رۋحاني قولداۋ كورسەتكەنى جانە كومەكتەسكەنى ءۇشىن ەرەكشە راحمەت ايتامىن», دەدى قر مادەنيەت جانە سپورت ءمينيسترى.
مينيستر وزبەكستانعا جۇمىس ساپارى اياسىندا تاشكەنتتىڭ بىرقاتار تاريحي-مادەني ەسكەرتكىشتەرىن ارالادى. بۇل تولە بي كەسەنەسى جانە الەمدەگى ەڭ كونە قۇران قولجازباسى ساقتالعان حاست-يمام مەشىتى.
سونىمەن قاتار اسحات ورالوۆ وزبەك ارىپتەسى وزودبەك نازاربەكوۆپەن ەكىجاقتى كەزدەسۋ وتكىزدى, وندا ەكى ەلدىڭ مادەنيەت جانە تۋريزم سالاسىنداعى ىنتىماقتاستىعى تالقىلاندى.