قازاقستان مەن ازەربايجان اراسىندا اپتاسىنا 32-دەن 42-گە دەيىن تۇراقتى رەيستەر قاتىنايدى, دەپ حابارلايدى Egemen.kz.
پرەمەر-مينيستر ءاليحان سمايىلوۆتىڭ ازەربايجان رەسپۋبليكاسىنا رەسمي ساپارى شەڭبەرىندە 2023 جىلعى 22 ماۋسىمدا قازاقستان رەسپۋبليكاسىنىڭ يندۋستريا جانە ينفراقۇرىلىمدىق دامۋ مينيسترلىگى مەن ازەربايجان رەسپۋبليكاسىنىڭ تسيفرلىق دامۋ جانە كولىك مينيسترلىگى اراسىندا اۋە قاتىناسى تۋرالى حاتتاماعا قول قويىلدى. قازاقستان تاراپىنان حاتتاماعا قازاقستان رەسپۋبليكاسىنىڭ يندۋستريا جانە ينفراقۇرىلىمدىق دامۋ ءمينيسترى مارات قاراباەۆ, ازەربايجان تاراپىنان – ءازىربايجان رەسپۋبليكاسىنىڭ تسيفرلىق دامۋ جانە كولىك ءمينيسترى راشاد نابيەۆ قول قويدى.
قول قويىلعان حاتتاماعا سايكەس ەكى تاراپتىڭ تاعايىندالعان تاسىمالداۋشىلارى ءار تاراپتان اپتاسىنا 32-دەن 42 رەيسكە دەيىن ەلدەر اراسىندا تۇراقتى رەيستەردى ورىنداۋ ءۇشىن قۇقىقتىق بازا كەڭەيتىلدى.
«قۇقىقتىق بازانى كەڭەيتۋ ەلدەر اراسىندا ورىندالاتىن رەيستەر سانىن ۇلعايتۋعا مۇمكىندىك بەرەدى, بۇل قازاقستان مەن ازەربايجان اراسىنداعى اۋە تاسىمالدار نارىعىنداعى باسەكەلەستىكتى ارتتىرادى, سونداي-اق ەلدەر اراسىنداعى ساۋدا-ەكونوميكالىق, ىسكەرلىك, تۋريستىك جانە مادەني ىنتىماقتاستىقتى ودان ءارى كۇشەيتۋگە ىقپال ەتەدى», دەپ حابارلادى يندۋستريا جانە ينفراقۇرىلىمدىق دامۋ مينيسترلىگىنىڭ ءباسپاسوز قىزمەتى.