ەل-نينو - تىنىق مۇحيتىنىڭ ەكۆاتوريالدى بولىمىندەگى بەتتىك قاباتىنداعى سۋ تەمپەراتۋراسىنىڭ تەربەلىسى. بۇل قۇبىلىستىڭ كليماتقا ەلەۋلى اسەرى بار. تاياۋدا عالىمدار تابيعي اپاتقا بايلانىستى دابىل قاقتى. تورتكۇل دۇنيەگە تاعى ءبىر ەل-نينو اعىسى قاۋىپ ءتوندىرىپ تۇر.
بۇل جايلى «Egemen Qazaqstan» گازەتىنىڭ ءتىلشىسى اباي اسانكەلدى ۇلى «جاھاندى الاڭداتقان ەل-نينو» اتتى ماقالاسىندا جازدى.
ماقالا اۆتورىنىڭ جازۋىنشا, تىنىق مۇحيتىندا بولاتىن ەرەكشە قۇبىلىس الەمنىڭ كەي بولىگىندە سۋ تاسقىنىن, باسقا جاعىندا قۇرعاقشىلىقتى تۋدىرۋى مۇمكىن.
ۇلتتىق مۇحيتتىق جانە اتموسفەرالىق قاۋىمداستىق ۇسىنعان دەرەكتەرگە قاراعاندا, قازىرگى تاڭدا ەل-نينو اعىسى باستالدى. سونداي-اق تىنىق مۇحيتىنىڭ شىعىسىنداعى ەكۆاتورعا جاقىن ايماقتاعى تەمپەراتۋرا شامامەن 0,5 گرادۋسقا جىلىنعان.
ايتا كەتەيىك, بۇعان دەيىن دە الەمنىڭ بىرقاتار ەلدەرى ەل-نينو سالدارىنان تالاي مارتە سۋ تاسقىنىنان, تسيكلونداردان, قۇرعاقشىلىقتان, ورمان ورتىنەن زارداپ شەككەن.
ەۋروپالىق وداقتاعى كوپەرنيك اتىنداعى كليماتتىڭ وزگەرۋى قىزمەتى باسشىسى كارلو بۋونتەمپو كەيىنگى جىلدارى لا-نينانىڭ سالقىنداتۋشى اسەرىنە قاراماستان, ەل-نينونىڭ قىزۋى ارتىپ كەتكەنىن ايتادى. وسىنىڭ سالدارىنان تىنىق مۇحيتىن جاعالاي قونىس تەپكەن بىرقاتار مەملەكەتكە قيىن تيمەك.
بۇل رەتتە ماقالا اۆتورى امەريكا قۇرلىعىنداعى بىرنەشە ەل, جاپونيا, اۋستراليا مەن جاڭا زەلانديا ەل-نينو سالدارىنان زارداپ شەگۋى مۇمكىن ەكەنىن جازدى.