مەملەكەت باسشىسى قاسىم-جومارت توقاەۆ ۇلتتىق قۇرىلتاي وتىرىسىندا تاۋلىك بويى جۇمىس ىستەيتىن پرەزيدەنت كىتاپحاناسىن اشقىسى كەلەتىنىن ايتتى, دەپ حابارلايدى Egemen.kz.
پرەزيدەنت ءوز سوزىندە كىتاپ وقيتىن ەلدىڭ زيالى ۇلتقا اينالاتىنىن اتاپ ءوتتى.
«مارتين ليۋتەر كينگ سياقتى مەنىڭ دە كوكەيىمدە جۇرگەن ءبىر ارمان بار, بۇل – تاۋلىك بويى جۇمىس ىستەيتىن پرەزيدەنت كىتاپحاناسىن اشۋ. مەن مۇنداي كىتاپحانانى انكارادا كوردىم. ونىڭ وقىرماندارى الەمنىڭ ءار تۇكپىرىندە باسىلىپ شىققان كوركەم شىعارمالاردى, ارناۋلى ادەبيەتتى وقي الادى. مۇنداي كىتاپحانانى ەلىمىزدە دە سالۋعا بولادى دەپ ويلايمىن», دەدى قاسىم-جومارت توقاەۆ.
سونداي-اق مەملەكەت باسشىسى ۇلتتىق قۇندىلىقتاردىڭ الەۋمەتتىك جەلىدە كەڭىنەن ناسيحاتتالۋىن قولدايتىنىن ءبىلدىردى.
«جاقىندا ءماجىلىس دەپۋتاتى ەرلان سايروۆ قازاق مادەنيەتىن TikTok پلاتفورماسىندا ناسيحاتتاۋ جولدارى قاراستىرىلىپ جاتقانىن ايتتى. مەن مۇنى قولدايمىن. جاستار ءجيى پايدالاناتىن الەۋمەتتىك جەلىلەردە ۇلتتىق قۇندىلىقتارىمىزدى دارىپتەۋ – دۇرىس قادام», دەدى پرەزيدەنت.