پرەزيدەنت «بالالار كىتاپحاناسى» باعدارلاماسىن قولعا الۋدى تاپسىردى

پرەزيدەنت ەلىمىزگە شەتەلدىك كىتاپتار كوپتەپ كەلەتىنىن ايتىپ, وتاندىق كىتاپ ۇلەسىن ارتتىرۋ ماسەلەسىنە توقتالدى.   «يدەولوگيا جۇمىسىنداعى باستى باعىتتىڭ ءبىرى – كىتاپ باسىپ شىعارۋ ءىسى. قازاقستان نارىعىندا شەتەل ونىمدەرى باسىم ەكەنى جاسىرىن ەمەس. ادەبي كىتاپتاردىڭ 90 پايىزعا جۋىعى سىرتتان كەلەدى. بۇل ءۇردىستىڭ سالدارى قانداي بولاتىنى ايتپاسا دا تۇسىنىكتى. ۇلتتىق مۇددەگە ساي كەلەتىن كىتاپتاردى كوپتەپ باسىپ شىعارۋ وتە ماڭىزدى. سمارتفون بالانىڭ قولىنداعى كىتاپتىڭ ورنىن باسپاۋى قاجەت», دەدى مەملەكەت باسشىسى قاسىم-جومارت توقاەۆ.

سونداي-اق بالالاردى ۇلتتىق قۇندىلىق نەگىزىندە تاربيەلەۋ ءۇشىن سول باعىتتاعى كىتاپتاردى وقىتىپ, جالپى كىتاپقا دەگەن قىزىعۋشىلىعىن وياتۋدىڭ ماڭىزىن اتاپ ءوتىپ, ارنايى تاپسىرما بەردى.

«قازىر ەلىمىزدەگى مەكتەپ كىتاپحانالارىندا 130 ميلليوننان استام كىتاپ بار. بىراق ونداعى كوركەم ادەبيەتتىڭ ۇلەسى ماردىمسىز. شىن مانىندە, كىتاپ وقيتىن ەل زيالى ۇلتقا اينالادى. ءبىز جاس ۇرپاقتىڭ كىتاپقا قۇشتارلىعىن وياتۋىمىز كەرەك. بۇل قيىن ماسەلە ەكەنىن تۇسىنەمىن. اسىرەسە, ولاردىڭ بار نازارى الەۋمەتتىك جەلىدە بولعان كەزدە, ءتىپتى, قيىن. بىراق بۇل ماسەلەمەن شۇعىلدانۋ كەرەك. باسقا جول جوق.

سوندىقتان «بالالار كىتاپحاناسى» اتتى جاڭا باعدارلامانى قولعا الۋدى تاپسىرامىن. قازاق ادەبيەتىنىڭ ءتۇرلى كەزەڭدەرىن جانە جانرلارىن قامتيتىن ارنايى ءتىزىم جاسالۋعا ءتيىس. سول تىزىمدەگى كىتاپتار بارلىق بالاعا قولجەتىمدى بولۋى كەرەك», دەدى پرەزيدەنت.