پرەزيدەنتكە «استانا» حالىقارالىق قارجى ورتالىعىنىڭ بىلتىر جانە بيىل 5 ايدا اتقارعان قىزمەتىنىڭ ناتيجەسى جونىندە باياندالدى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
مەملەكەت باسشىسىنا ورتالىقتىڭ 2025 جىلعا دەيىنگى دامۋ ستراتەگياسىن ىسكە اسىرۋ اياسىندا شەتەلدەن ينۆەستيتسيا تارتۋعا جاردەمدەسۋ, قارقىندى كاپيتال نارىعىن دامىتۋ جانە قارجى يندۋسترياسىنداعى يننوۆاتسيالاردى ىلگەرىلەتۋ سەكىلدى نەگىزگى ءۇش باعىت بويىنشا اتقارىلىپ جاتقان جۇمىستار تۋرالى مالىمەت بەرىلدى.
رەنات بەكتۇروۆتىڭ ايتۋىنشا, قارجى ورتالىعى قۇرىلعالى بەرى قازاقستانعا 8,3 ميلليارد دوللاردان استام ينۆەستيتسيا تارتقان. سوڭعى جىلدارى احقو قاتىسۋشىلارىنىڭ سانى قارقىندى ءوسىپ كەلەدى. الەمنىڭ 75 ەلىنەن 2 مىڭعا جۋىق كومپانيا بيزنەس جۇرگىزۋ ءۇشىن احقو-نىڭ يۋريسديكتسياسىن تاڭدادى. الەمدىك ءىرى قارجى ينستيتۋتتارى, اتاپ ايتقاندا قىتاي بانكتەرى, اراب ەلدەرىنىڭ قارجى قۇرىلىمدارى جانە تانىمال تەحنولوگيالىق كومپانيالار احقو بازاسىندا وكىلدىگىن بەلسەندى تۇردە اشىپ جاتىر. جالپى, ورتالىق قۇرىلعان ساتتەن باستاپ احقو ەكوجۇيەسىنە قاتىسۋشىلار بيۋدجەتكە 50 ميلليارد تەڭگەدەن استام, سونىڭ ىشىندە بىلتىر 26 ميلليارد تەڭگە كولەمىندە سالىق تولەگەن. قارجى ورتالىعى قۇرامىنداعى داۋلاردى شەشۋ ينستيتۋتتارى (احقو سوتى جانە حالىقارالىق تورەلىك ورتالىعى) بۇگىنگە دەيىن 2 مىڭنان استام كوممەرتسيالىق جانە قارجىلىق ءىستى قاراعان.
كەزدەسۋ سوڭىندا قاسىم-جومارت توقاەۆ احقو-نى حالىقارالىق ارەنادا ەلىمىزدىڭ باستى ينۆەستيتسيالىق الاڭدارىنىڭ ءبىرى رەتىندە ىلگەرىلەتۋ قاجەت ەكەنىن اتاپ ءوتتى. سونداي-اق مەملەكەت باسشىسى احقو قۇرامىنداعى بيرجانى, رەتتەۋشىنى جانە باسقا دا ينستيتۋتتاردى الەمدىك ۇزدىك ستاندارتتار نەگىزىندە ودان ءارى دامىتۋ ماڭىزدى ەكەنىنە نازار اۋداردى.