باس پروكۋروردىڭ ورىنباسارى جاندوس ومىراليەۆ اباي وبلىسىنداعى ءورت بويىنشا قوزعالعان قىلمىستىق ىسكە قاتىستى بىرقاتار تۇسىنىكتەمە بەردى. ونىڭ ايتۋىنشا, بۇل ىسكە نەمقۇرايدى بولعان ءار ادام مىندەتتى تۇردە ءتيىستى جازاسىن الادى, دەپ حابارلايدى Egemen.kz.
جاندوس ومىراليەۆتىڭ ايتۋىنشا, بۇگىندە «ەكى جانە ودان دا كوپ ادامنىڭ قازا بولۋىنا اكەپ سوققان ءورت قاۋىپسىزدىگى تالاپتارىن بۇزۋ» 292-بابى 3-بولىگى بويىنشا قىلمىستىق ءىس قوزعالعان. مەملەكەت باسشىسى قاسىم-جومارت توقاەۆتىڭ تاپسىرماسى بويىنشا تەرگەۋ جۇمىستارىن باس پروكۋراتۋرا جۇرگىزىپ جاتىر. ۆەدومستۆونىڭ ارنايى قىزمەتى تەرگەۋگە كىرىستى, ۆەدومستۆوارالىق تەرگەۋ-جەدەل توبى قۇرىلىپ, وعان بارلىق قۇقىق قورعاۋ قىزمەتتەرىنىڭ ەڭ تاجىريبەلى, بىلىكتى تەرگەۋشىلەرى مەن جەدەل قىزمەتكەرلەرى كىردى. جۇمىس توبىن باس پروكۋروردىڭ ورىنباسارلارىنىڭ ءبىرى باسقارادى. ءىس باس پروكۋروردىڭ ەرەكشە باقىلاۋىندا.
«سونىمەن قاتار وسى تراگەديانىڭ اۋقىمىن, ەكولوگياعا كەلتىرىلگەن زالالدى, ەڭ باستىسى – قىزمەتتىك مىندەتتەرىن اتقارۋ كەزىندە 14 ورمان قىزمەتكەرىنىڭ قازا تابۋىن ەسكەرە وتىرىپ, ءبىز دە لاۋازىمدى تۇلعالارعا قاتىستى قىلمىستىق ءىس قوزعادىق. وسى قىلمىستىق ءىستى تەرگەۋ شەڭبەرىندە ءوز مىندەتتەرىنە, قىزمەتىنە جوسىقسىز, جاۋاپسىز قاراعان, سونىڭ سالدارىنان وزىنە جۇكتەلگەن مىندەتتەمەلەردى ورىنداماعان, وسىنداي قايعىلى وقيعالار مەن ادام ولىمىنە اكەپ سوققان بارلىق لاۋازىمدى ادامداردىڭ شەڭبەرى بەلگىلەنەتىن بولادى», دەپ ءتۇسىندىردى جاندوس ومىراليەۆ.
بۇل رەتتە توتەنشە جاعدايلار مينيسترلىگىنىڭ بۇرىنعى باسشىسى يۋري يلين, ەكولوگيا جانە تابيعي رەسۋرستار ءمينيسترى زۋلفيا سۇلەيمەنوۆا, اباي وبلىسىنىڭ اكىمى نۇرلان ۇرانحاەۆ, شىعىس قازاقستان وبلىسىنىڭ اكىمى دانيال احمەتوۆ سىندى لاۋازىمدى تۇلعالاردىڭ ءىس-ارەكەتىنە ءالى ەشقانداي باعا بەرىلگەن جوق.
«قوزعالعان قىلمىستىق ءىس اياسىندا قىزمەتتىك مىندەتتەرىنە قاتىستى ءتيىستى شارا قولدانباي, سونىڭ سالدارىنان اۋقىمدى ءورت پەن ادام ولىمىنە اكەپ سوقتىرعانداردىڭ ءبارى ءسوزسىز جاۋاپكەرشىلىككە تارتىلادى. قازىر شەنەۋنىكتەردىڭ ارەكەتى سارالانعان جوق, تەرگەۋ ەندى باستالدى. ايتا كەتسەم, جاۋاپقا تەك باسشىلار عانا ەمەس, ورتا بۋىن باسشىلارى دا تارتىلادى, ولار قازىر ءورتتى سوندىرۋگە اتسالىسىپ جاتقانىن ەسكەردىك. ءبىزدىڭ باستى ماقساتىمىز – ءورتتى ءسوندىرۋ. بىراق الداعى ۋاقىتتا ولاردان مىندەتتى تۇردە جاۋاپ الىنادى. تەرگەۋ مەرزىمى - ەكى اي», دەپ سەندىردى باس پروكۋروردىڭ ورىنباسارى.