ۇلتتىق قۇندىلىقتارىمىزدىڭ ءبىرى دە بىرەگەيى – باتا بەرۋ ءداستۇرىن دارىپتەۋ, ۋاقىتپەن ۇندەستىرە جاڭعىرتۋ, كەيىنگى ۇرپاققا ۇلگى ەتۋ ماقساتىندا تاراز قالاسىندا ءداستۇرلى «باتامەنەن ەل كوگەرەر» اتتى بايقاۋ ءوتتى.
تاعىلىمى مول شاراعا وبلىس اكىمدىگىنىڭ قولداۋىمەن وڭىردەگى ارداگەرلەر جانە بيلەر كەڭەسى ۇيىتقى بولا ءبىلدى.
شارانى اشقان جامبىل وبلىستىق ءماسليحاتتىڭ توراعاسى ءابدالى نۇراليەۆ, وبلىستىق ارداگەرلەر كەڭەسىنىڭ توراعاسى ەركىمبەك سولتىباەۆ باتا بەرۋ – جاقسى نيەت, ونەگەلى وسيەت ءبىلدىرۋدىڭ ۇلتتىق ءداستۇرى ەكەندىگىن ايتا كەلىپ, باتاگوي قاريالارعا ساتتىلىك تىلەدى.
قازاقى شاپاندارىن يىققا جاۋىپ ورتاعا شىققان قاريالارىمىز ساحنا ءسانىن كىرگىزدى, شەشەندىك ونەرلەرىن پاش ەتتى. جينالعان كوپشىلىك ەجەلگى ءداستۇردىڭ جاندانعانىنا قۋاندى.
باتاگويلەردىڭ ونەرىن ساراپتاي كەلىپ, قازاقستاننىڭ قۇرمەتتى ءجۋرناليسى, قازاقستان جۋرناليستەر وداعى وبلىستىق فيليالىنىڭ توراعاسى جاڭاباي ميلليونوۆ باستاعان قازىلار القاسىنىڭ ۇيعارۋىمەن «جۇزدەن جۇيرىك شىققان» جۋالى اۋدانىنىڭ باتاگويى سەيىتقازى مەدەتبەكوۆ باس جۇلدەگە لايىقتى دەپ تانىلدى.
ءبىرىنشى ورىندى شۋ اۋدانىنان كەلگەن سايلاۋبەك قاليەۆ جەڭىپ السا, ەكىنشى ورىن تارازدىق يسان تىلەگەنوۆكە بۇيىردى. ال جۇلدەلى ءۇشىنشى ورىندى جامبىل اۋدانىنىڭ قارياسى ورىنباي رىسباەۆ يەلەندى.
ءىس-شارانى وبلىس اكىمىنىڭ ورىنباسارى ەرجان ۇيسىمباەۆ قورىتىندىلاپ, وبلىس اكىمى نۇرجان نۇرجىگىتوۆتىڭ قۇتتىقتاۋ حاتىن وقىپ بەردى.
بايقاۋدى تاماشالاۋعا كەلگەن جاس كورەرمەندەر, داناگوي قارتتارىمىزدىڭ ونەگەلى ءومىرىن ۇلگى ەتە وتىرىپ, عيبرات بولارلىق سوزدەرىن بويلارىنا سىڭىرە الدى دەپ ويلايمىز.
سونداي-اق اسىل قازىنا – قاريالارىمىزدىڭ بويىنداعى قاسيەتتەرىن دارىپتەۋ ارقىلى جاستاردى يماندىلىققا تاربيەلەۋ, ۇلكەنگە قۇرمەت, كىشىگە ىزەت كورسەتۋدى ۇيرەتۋدە مۇنداي ءىس-شارالاردىڭ ىقپالى مول ەكەنىنە تاعى ءبىر رەت كوز جەتكىزگەندەي بولدىق.
اتالى سوزدەر ايتىلىپ, ماعىنالى باتالار بەرىلگەن مەرەكەلىك ءىس-شارا ۇلتىمىزدىڭ قۇندىلىقتارىن دارىپتەۋ, كەيىنگى جاستارعا وسى ءداستۇردى جاڭعىرتىپ, ولاردى يماندىلىققا تاربيەلەۋمەن ەستە قالدى.
الدابەردى ماقاشەۆ,
تاراز قالالىق ارداگەرلەر كەڭەسىنىڭ مۇشەسى