اباي وبلىسىنداعى الاپات ءورت كەزىندە بولعان ادام شىعىنىنا بايلانىستى ەڭبەك قاۋىپسىزدىگىنىڭ بۇزىلۋ سەبەپتەرىن ەڭبەك جانە حالىقتى الەۋمەتتىك قورعاۋ مينيسترلىگى قاداعالايدى.
وسىعان وراي ەڭبەك جانە حالىقتى الەۋمەتتىك قورعاۋ مينيسترلىگىنىڭ وكىلدەرى ارنايى ۇكىمەتتىك كوميسسيا قۇرامىندا اباي وبلىسىنا باردى. قۇزىرلى مەكەمەنىڭ قىزمەتكەرلەرى «سەمەي ورمانى» مەملەكەتتىك ورمان تابيعي رەزەرۆاتىنىڭ اۋماعىندا بولعان الاپات ءورتتى ءسوندىرۋ كەزىندە ەڭبەك قاۋىپسىزدىگى جانە ەڭبەكتى قورعاۋ تالاپتارىنىڭ بۇزىلۋىنا جول بەرگەن ادامداردى انىقتاۋ ءۇشىن تەرگەۋ جۇرگىزەدى. سونداي-اق ۆەدومستۆو وكىلدەرى زارداپ شەككەندەردىڭ وتباسىلارىنا قاجەتتى الەۋمەتتىك كومەك كورسەتۋ كولەمىن انىقتايدى.
– اباي وبلىسىنداعى «سەمەي ورمانى» مەملەكەتتىك ورمان تابيعي رەزەرۆاتىنىڭ اۋماعىندا ءورت سالدارىنان بولعان جازاتايىم وقيعانىڭ سەبەپتەرى مەن ءمان-جايىن تەرگەۋ ءۇشىن پرەمەر-ءمينيستردىڭ ءبىرىنشى ورىنباسارى رومان سكلياردىڭ توراعالىعىمەن ارنايى ۇكىمەتتىك كوميسسيا قۇرىلدى. كوميسسيا قۇرامىنا توراعانىڭ ورىنباسارى بولىپ ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ولجاس ورداباەۆ, ەڭبەك جانە حالىقتى الەۋمەتتىك قورعاۋ كوميتەتىنىڭ توراعاسى – مەملەكەتتىك باس ەڭبەك ينسپەكتورى تولەگەن وسپانقۇلوۆ, سونداي-اق ورتالىق مەملەكەتتىك ورگانداردىڭ, وبلىس اكىمدىگىنىڭ, جۇمىس بەرۋشىلەردىڭ جانە جۇمىسكەرلەر كاسىپوداعىنىڭ وكىلدەرى ەنگىزىلدى, – دەيدى ەڭبەك جانە حالىقتى الەۋمەتتىك قورعاۋ مينيسترلىگىنىڭ ءباسپاسوز قىزمەتى.
ۆەدومستۆو وكىلدەرىنىڭ ايتۋىنشا, بۇعان قوسا ارنايى كوميسسيا كەلتىرىلگەن زالالدىڭ كولەمىن بەلگىلەپ, زارداپ شەككەندەر مەن قازا تاپقانداردىڭ وتباسىلارىنا ءبىرىنشى كەزەكتەگى كومەك كورسەتۋ جونىندە ءىس-شارالار قابىلدايتىن بولادى. ارنايى قۇرىلعان ۇكىمەتتىك كوميسسيا جۇمىستى 10 جۇمىس كۇنى ىشىندە اياقتايدى.