ونلاين كۇندەلىكتىڭ كولەڭكەلى تۇستارى

بۇل سۇراقتىڭ جاۋابى «Egemen Qazaqstan» گازەتىنىڭ №110 (30589) سانىندا جارىق كورگەن «بىلىم رەفورمالارى حاقىندا» ماقالاسىندا ايتىلعان.

ماقالا اۆتورى نۇرعالي ماحاننىڭ پىكىرىنشە, «Bilim Land» ارقىلى وقۋشى كۇندەلىگىنىڭ جويىلىپ, سىنىپ جۋرنالىنىڭ ەلەكتروندى نۇسقاعا كوشۋى پەداگوگيكا-پسيحولوگيالىق تۇرعىدان قاتە شەشىم بولعان. مەكتەپ ەڭ كەمى 5G ينتەرنەتپەن, وقۋشىلار 100 پا­يىز كومپيۋتەرمەن قامتاماسىز ەتىلگەن جاعداي بولسا, اڭگىمە بولەك بولار ەدى. ورتا ەسەپپەن 1 مىڭ بالا وقيتىن مەكتەپتە 170-250 وقۋشى عانا كومپيۋتەرمەن قامتاماسىز ەتىلگەنى كوڭىل كونشىتپەيدى.

وسى تۇستا ماقالا اۆتورى - جوعارى ساناتتى شەبەر-پەداگوگ «Bilim Land» ارقىلى وقۋشىنىڭ ءبىلىم دەڭگەيىن انىقتاۋ قانشالىقتى دۇرىس دەگەن ساۋالعا جاۋاپ بەرەدى.

«سىنىپتا جۋرنالدىڭ بو­لۋى, سول جۋرنالدىڭ سوڭعى پاراقتا­رىن­داعى وقۋشى تۋرالى تولىق مالىمەت جانە وقۋشىعا كۇندەلىكتى باعا قويۋ مۇ­عا­لىمگە وقۋشىلاردى پسيحولوگيالىق تۇرعىدان تولىق زەرتتەپ بىلۋىنە مۇمكىن­دىك تۋدىراتىن ەدى. قازىرگى مۇعالىم ءوز وقۋشىلارىن تۇلعا رەتىندە جەكە زەرتتەۋى بىلاي تۇرسىن, ولاردى تولىق تانىپ بىلمەيدى دە. وعان مۇمكىندىگى دە, ۋاقىتى دا تاپشى», دەيدى نۇرعالي ماحان.

پەداگوگتىڭ ايتۋىنشا, سىنىپتا قاراپايىم, ءبىز بىلەتىن ءداستۇرلى جۋرنال بولسا, وقۋشى وعان قويىلعان باعانى ءوز كوزىمەن كورىپ, ساباققا قاراي بەت بۇرار ەدى.

«جۋرنال قولىمىزدا تۇرعاندا توقسان سوڭىندا وقۋشىدان اۋىزشا نە جازباشا سىناق الىپ, «ەگەر «4»-كە نە «5»-كە شىققىڭ كەلسە, مىنا تاقى­رىپتى وقىپ كەل», دەپ تاپسىرما بەرە­تىنبىز. بۇل ءادىس بالانىڭ بىلىمگە دەگەن ىنتاسىنا اسەر ەتەتىن. قازىر ول جوق. بۇكىل مەكتەپتە ينتەرنەتتىڭ 2-3 نۇكتەسى عانا بار. ول جەردەگى مۇعالىمدەر اراسىنداعى كەزەكتىڭ ءوزىن ايتپاعاندا, مەكتەپتەگى ينتەرنەت نۇكتەلەرىنىڭ ءوزى كۇندىز ناشار, تەك تۇنگە قاراي جاق­سى جۇمىس ىستەيدى ەكەن. بۇل جاڭا ەلەكتروندى جۇيە مۇعالىم مەن وقۋشىسى كومپيۋتەرمەن تولىق قام­تاماسىز ەتىلگەن, ينتەرنەتى مۇلتىكسىز جۇمىس ىستەيتىن ەلدەرگە قولايلى شىعار. ال ءبىزدىڭ جاعدايدا بۇل مۇعالىم پسيحولوگياسىنا اسەر ەتەدى. سەبەبى مۇعالىم جالاقىسى «Kundelik.kz» ار­قى­لى تولتىرىلعان جۋرنال بويىنشا ەسەپتەلەدى», دەپ ءتۇسىندىردى اۆتور.

تاعى دا ءبىر قىزىق جايت, مۇندا وقۋشىعا «2» دەگەن باعا قويۋعا بولمايدى ەكەن. ەگەر مۇنداي باعا قويىلسا, «Kundelik.kz» بازاسىنداعى تۇتاس اۋدان, قالا بەردى وبلىستىڭ ءبىلىم دەڭگەيىنىڭ كورسەتكىشى ءتۇسىپ كەتەدى. وقۋ­شىعا قويعان «2» دەگەن باعا ءۇشىن ءپان مۇعالىمىنەن باستاپ, مەكتەپ اكىمشىلىگى تۇگەل «جوعارىداعىلاردىڭ» الدىندا جاۋاپ بەرەدى. ونىڭ ۇستىنە «جاڭار­تىلعان وقۋ باعدارلاماسى» بويىنشا وقۋشىعا «2» قويۋ بىلاي تۇرسىن, «سەنىكى قاتە», «دۇرىس ەمەس» دەپ تە ايتۋعا رۇق­سات جوق.

«ۇستازداردىڭ جۇيكەسىن جۇقارتىپ وتىرعان تاعى ءبىر ماسەلە - كاسىبي بىلىكتىلىگىن انىقتاۋ ماقساتىندا ولاردان الىناتىن تەست-سىناعى. انى­عىن ايتقاندا, مۇعالىمنىڭ شىن ءبىلىم دارەجەسىن تەست-سىناقتارى انىقتاپ بەرە ال­مايدى. مەنىڭشە, قاي زاماندا دا مۇ­عالىمنىڭ ءبىلىم دەڭگەيى وقىتقان وقۋشى­لارىنىڭ ءبىلىم كورسەتكىشتەرىمەن انىقتالعان. سوندىقتان مۇعالىمنىڭ دەڭگەيىن وقىتقان وقۋشىلارىنىڭ ءبىلىم كورسەتكىشىمەن ەسەپتەۋ كەرەك. ول ءۇشىن مۇعالىمنىڭ 2-3 جىل ساباق بەرگەن سىنىبىنان جازباشا جانە اۋىزشا سىناق الۋ ءجون بولار ەدى», دەيدى مامان.