كەيدە كىتاپ مۇلدە بولەك الەم سەكىلدى, كەيدە ءومىردىڭ ءدال كوشىرمەسى سياقتى. مىنا الەمدە كىتاپتان كوپ نارسە جوق شىعار. كىتاپتان تۇيەر وي دا كوپ. ءبىر كىتاپتى وقىپ بولعان سوڭ اۆتور مەن وقۋشىنىڭ ويىنان تاعى ءبىر جاڭا وي تۋادى. ورالحان بوكەيدىڭ «قاسقىر ۇلىعان تۇندە» تۋىندىسىن وقىعان وقىرمانداردىڭ ويىن ۇسىنامىز. وقىرماننىڭ ويى سىزگە دە وي سالار. ال ەگەر شىعارمانى وقىماعان بولساڭىز, وقۋعا ىنتاڭىزدى وياتار.
بۇل كىتاپتى العاش وقىعان ادام جىگىت پەن قىزدىڭ ءمولت ەتكەن سەزىمى مەن وكىنىشىن عانا سەزىنۋى مۇمكىن. اسىلىندا, استە ولاي ەمەس. بۇل شىعارمادا كۇللى دۇنيەنى ءبىر-اق اۋىز سوزبەن بۇكتەي سالاتىن الپاۋىت وي جاتىر. «قاسقىر ۇلىعان تۇندە» - قىز بالانىڭ قىلدان نازىك تاعدىرى, قورعانسىزدىڭ قورقىنىشى, وكسىگى مول وكىنىش. كۇللى بۇلاق, داريالاردىڭ ءبىر مۇحابقا توعىساتىنى سەكىلدى ورالحان بوكەي ادامزاتتىڭ الىپ پروبلەماسىن ءبىر عانا كىتاپقا جاسىرعانىنا تاڭداناسىڭ, تاڭعالاسىڭ...
ابزال ماقاش, قاراعاندى
قورىتا ايتاتىن بولساق, ومىردە نە كۇتىپ تۇرعانىن ەشكىم بىلمەيدى. بىراق ءبارى وزىمىزگە بايلانىستى, ياعني سوڭعى شەشىمدى ءبىز ءوزىمىز قابىلدايمىز. ءومىر جولىمىزدى ءوزىمىز تاڭدايمىز. ءومىر جولىندا بىزگە ءتۇرلى مۇمكىندىك بەرىلەدى جانە سول مۇمكىندىكتى ەشكىمنىڭ ويىنا قاراماي پايدالانۋىمىز, جوعالتىپ الماۋىمىز كەرەك.
اقمارال جاربوسيموۆا, استانا
شىعارما شاعىن بولسا دا ومىردەگى بار شىندىقتى, قوعامداعى بارشا كورىنىستى الدىمىزعا جايىپ سالعانداي. سۇرەڭسىز قوعام مەن قورعانسىز ادام جانى. ءۇمىت پەن قاتىگەزدىكتىڭ ايقاسى. بۇل شىعارمادان تۇسىنگەنىم, پەندە ومىرىندە نە بولماسىن ءۇمىتى ۇزىلمەيدى ەكەن. بۇعان دالەل - ارايدىڭ جاققان شىرپىسى مەن قاسقىرمەن قار ۇستىندەگى ايقاسى.
نۇردينا امانگەلدى, استانا
ورالحان بوكەي «قاسقىر ۇلىعان تۇندە» اڭگىمەسى ارقىلى قوعامنىڭ نەبىر ماسەلەلەرىن قوزعاي وتىرىپ, بارلىعىنا دا تەك ءوزىمىز باستاۋشى دا, ارباۋشى دا بولا الاتىنىمىزدى جەتكىزدى. بارلىق جارقىراعان كەرەمەتكە قول سوزىپ العىمىز كەلەدى. بىراق ونىڭ كولەڭكەسىندە جاتقانداردىڭ تاعدىرى نە بولماق؟! 1. قوعامدا ءومىر سۇرگەن سوڭ, ءاربىر جايتقا ارقايسىمىزدىڭ قاتىسىمىز بار, بىراق تاڭداۋ ءوز ەركىڭدە. 2. سۇلۋلىقتى كورۋگە سۇلۋ جان كەرەك. 3. مەنى مەن مەنىكىنىڭ ايىرىلعان ءولدى دەپ ات قويىپتى وڭكەي بىلمەس. (اباي)
ايدانا سەرىكباي, تاراز
بەلگىلى ءبىر پروبلەماعا تەك ءبىر ادام نەمەسە ءبىر زات كىنالى بولمايدى. وعان تۇگەل قوعام, جۇيە, ونىڭ اينالاسىنداعى ادامدار كىنالى. ءبىر شەتتە كىناسىز ادام قالىپ قويمايدى. ويتكەنى قوعامداعى ءبىر ادامعا جاسالعان ادىلەتسىزدىك - تۇتاس قوعامعا جاسالعان ادىلەتسىزدىك.
سالتانات شەرحان, استانا
قوعامدا بولىپ جاتقان ءتۇرلى جاعدايلار ەكىنشى مارتە قايتالانباس ءۇشىن ءار ادام وزىنەن باستاۋى كەرەك. سەبەبى «ادامنىڭ كۇنى اداممەن». ءبىز دۇرىس بولساق, قوعام دۇرىس بولادى. ءوز باعىمتىمىزدى دۇرىستاۋ ارقىلى ىزگى قوعامدى قالىپتاستىرامىز.
توميريس قايساروۆا, استانا