«Apple» كورپوراتسياسىنىڭ نەگىزىن قالاعان ستيۆ دجوبس 10 جىل بۇرىن ومىردەن وتسە دە, ونىڭ ادامزات يگىلىگى ءۇشىن اشقان جاڭالىعى ونەرتاپقىشتىڭ ەسىمىن تاريح بەتىندە ماڭگىلىككە قالدىرعانى داۋسىز. دەسە دە ەل اۋزىندا جۇرگەن ايگىلى ادامدى ۇناتپايتىندار دا بار ەكەن. ولار كىمدەر دەيسىز بە؟ حاكەرلەر!
ستيۆ دجوبس 21 جاسىندا دوسى ستيۆ ۆوزنياكوۆپەن ءوز كومپانياسىنىڭ ىرگەتاسىن قالاعانى بارشاعا ءمالىم. ال وعان دەيىن ستيۆ كوللەدجدە وقىعان. بىراق اياقتاي الماعان. ونى كوللەدجدەن شىعارىپ جىبەرگەن. ءتىپتى بولاشاق كاسىپكەر ەسىرتكى قولدانىپ, ءۇندىستاندا 7 اي تۇرىپ, رۋحاني ازىق الىپ, ەمدەلگەن ەكەن.
دجوبس ورەگون شتاتىنداعى ريد كوللەدجىندە ءبىلىم العان. العاشقى كۋرستا ميلليونەردىڭ ەسىندە قالعانى – كالليگرافيا. قازاقشا تاپسىرلەسەك, كالليگرافيا – قۇسني حات, ياعني ادەمى جازۋ ونەرى. مىنە, بولاشاق ميلليونەردىڭ كاسىبىنىڭ العاشقى قادامى دا ءدال وسى ونەردەن باستالعان. ستيۆ كالليگرافياعا بار ىنتاسىمەن بەرىلگەن. ءدال سول ۋاقىتتا ونەرتاپقىش ادامدارعا مينيماليستىك ءارى فۋنكتسيونالدى ءديزايننىڭ كەرەك ەكەنىن تۇسىنەدى. ونىڭ 2011 جىلى ەكىنشى ايپادتى «ونەر جانە جاڭا تەحنولوگيالار قيىلىسى» دەگەن جازبامەن كوپشىلىككە تانىستىرۋى دا سوندىقتان. دجوبس الگى ءىس-شارادا «Apple»-ءدىڭ دنك-سىنا ءبىر عانا تەحنولوگيا جەتكىلىكسىز. تەحنولوگيا مەن ونەردى, گۋمانيتارلىق عىلىمداردى بىرىكتىرىپ, ونىڭ ناتيجەسىن كورگەندە عانا جۇرەگىمىزدىڭ قاعىسى جيىلەيتىنى انىق», دەگەن ەكەن.
ال ەندى ماقالانىڭ تاقىرىبىنداعى سۇراققا كەلەيىك. ءيا, حاكەرلەر «Apple» مەن ستيۆ دجوبستى ۇناتپايدى. سەبەبى ونەرتاپقىش جابىق جۇيەلەردى ويلاپ تاپقان. ول بوگدە ادامدار كىرىپ, وزگەرتۋلەر مەن تۇزەتۋلەر ەنگىزە المايتىن ءمىنسىز قۇرىلعىنى جاساپ شىعاردى. ال مۇنداي جاعدايدا حاكەرلەردىڭ قارا تەرگە تۇسەتىنى ايتپاسا دا تۇسىنىكتى. اۋەلدە دجوبس ۇيالى بايلانىس قۇرالىنا «Apple»-ءدىڭ ارنايى قوسىمشالارىن عانا ورناتۋدى كوزدەگەن. كەيىن ونى قىزمەتكەرلەرى رايىنان قايتارىپتى.
دجوبس ومىردەن ءوتىپ كەتسە دە, كومپانياسىنىڭ جۇمىسى تابىستى جالعاسىپ جاتاتىن ادامدارعا ءتانتى بولعان ەكەن. «Apple»-ءدىڭ دە وزىنەن كەيىنگى عۇمىرى وسىلاي بولسا ەكەن دەپ ارمانداپتى. ونىڭ اسقاق ارمانى ورىندالعانىنا ءسىز بەن ءبىز كۋامىز. ساتىلىم بويىنشا «Apple» رەكورد جاڭارتۋدان الدىنا قارا سالار ەمەس. بۇل كومپانيا اۋەلى الەم بويىنشا العاش رەت 1 ملرد دوللارعا تەڭ ساتىلىم جاسادى. كەيىن بۇل رەكوردى جاڭارتىپ, 2 ملرد دوللار قاراجات جينادى. 2021 جىلدىڭ قاڭتار ايىندا بەلسەندى «Apple» قولدانۋشىلارىنىڭ سانى 1 ميلليارد ادامعا جەتكەنىن دە قاپەرىڭىزگە سالا كەتەيىك.
ايتپاقشى, تىرىسىندە دجوبستىڭ ۇستىنەن قارا جەيدەنى تاستامايتىنىن كورگەن شىعارسىز. بۇل ونى وزگەلەردەن ەرەكشەلەيتىن وبراز. ونى جاپوندىق ديزاينەر يسسەي مياكە ستيۆكە ارناپ 10 داناسىن تىككەن. دجوبستىڭ بۇل جەيدەگە كوڭىل اۋدارۋى دا تەكتەن-تەك ەمەس. ول 1980 جىلى جاپونيادا «Sony» كومپانياسى قىزمەتكەرلەرىنىڭ جۇمىسقا ارنالعان ارنايى فورماسىن كورىپتى. بۇل ونەرتاپقىشتىڭ كوڭىلىنەن شىققان ءارى فورمانى «Apple» قىزمەتكەرلەرىنە ۇسىنعان. الايدا جۇمىسشىلار مەن دجوبستىڭ تالعامى سايكەس كەلمەي ولار قارا جەيدەدەن بىردەن باس تارتىپتى. بىراق ميلليونەر قارا جەيدەسىن تاستاعان ەمەس. كەيىن بۇل وبراز جالپىحالىقتىق سيپات الدى.