اتىراۋدا دا قازاق كۇرەسىنە بەت بۇرعان بالۋاندار قاتارى كوبەيدى. بۇل استانا كۇنى قارساڭىندا وتەتىن «قازاقستان بارىسى» رەسپۋبليكالىق ءتۋرنيرىنىڭ ىرىكتەۋ كەزەڭىندە بايقالدى.
سايىس باستالماس بۇرىن 15 بالۋان قارسىلاسىن جەرەبە ارقىلى تاڭدادى. ونىڭ ىشىندە 7 اۋداننان 13, اتىراۋ قالاسىنان 2 بالۋان بار. بالۋاندار 92 كگ-دان جوعارى سالماقتا باق سىنادى.
«قازاق كۇرەسىندە ەپتىلەر مەن كۇشتىلەردىڭ عانا باعى جانادى. الايدا ۇپاي سانىمەن الدا تۇرعان بالۋاننىڭ ءبىر سەكۋندتا ۇتىلىپ قالاتىن ءساتى ءجيى كەزدەسەدى. ويتكەنى ءتول سپورتىمىزدىڭ وسىنداي ەرەكشەلىگى بار», دەيدى اعا جاتتىقتىرۋشى ايبەك سەرعازيەۆ.
سىنعا تۇسكەن بالۋاننىڭ ءبارى اتالعان كۇرەستىڭ ءادىس-ءتاسىلىن جەتىك بىلەدى. ماسەلەن, بەكبول مۇقاشەۆ سپورتتىڭ بۇل ءتۇرىن بالا كەزىنەن سەرىك ەتىپ كەلەدى.
«قازاق كۇرەسىمەن 6 جاسىمنان بەرى شۇعىلدانامىن. ماعان جەكپە-جەك سپورتىنىڭ ءبارى ۇنايدى. بىراق كوڭىلىم قازاق كۇرەسىنە اۋدى», دەيدى ب.مۇقاشەۆ.
بۇل سايىسقا بىرنەشە رەت قاتىسىپ, تاجىريبە جيناعان بالۋاندار دا بار. سونىڭ ءبىرى 27 جاستاعى ارمان قاليەۆ بيىلعى ىرىكتەۋ جارىسىنا ءتورتىنشى رەت قاتىستى. اسىرەسە دزيۋدودان سپورت شەبەرى ادىلەت ساپارعاليەۆپەن بەلدەسۋى تارتىستى ءوتتى.
«سپورتتىق سايىستىڭ ءبارى دە تارتىستى وتەدى. ال قازاق كۇرەسىندەگى بەلدەسۋدىڭ ءجونى بولەك. جارتىلاي فينالداعى بەلدەسۋ وڭاي بولمادى. ادىلەت – قازاق كۇرەسىن مىقتى مەڭگەرگەن بالۋان. بۇرىن دزيۋدودان قازاقستاننىڭ چەمپيونى اتانعان. بۇل كۇرەستە سامبوشىلار, دزيۋدوشىلار, باسقا دا جەكپە-جەك تۇرلەرىنىڭ وكىلدەرى باق سىناپ ءجۇر. بىراق جەڭىلمەۋ ءۇشىن نامىسقا تىرىستىم», دەيدى ا.قاليەۆ.
قارسىلاسىنىڭ بارىنەن باسىمدىعىن تانىتقان ا.قاليەۆ «اتىراۋ بارىسى» اتاندى. وعان ۇزدىك بالۋان ديپلومىمەن بىرگە 500 مىڭ تەڭگەنىڭ سەرتيفيكاتى بەرىلدى. ال ەكىنشى ورىننىڭ جۇلدەسى – 300 مىڭ تەڭگەنى قىزىلقوعا اۋدانىنىڭ بالۋانى بەكبول مۇقاشەۆ جەڭىپ الدى. ءۇشىنشى ورىن مەن 200 مىڭ تەڭگەگە جىلىوي اۋدانىنان قاتىسقان ب.شاعاتاەۆ يە بولدى.
اتىراۋ وبلىسى