اباي وبلىسىنداعى ءورتتى ءسوندىرۋ جەدەل شتابىنىڭ مالىمەتىنشە, ىزدەۋ جۇمىستارى بارىسىندا تاعى 11 ادامنىڭ ءمايىتى تابىلدى. قازىر قازا تاپقانداردىڭ جەكە باسى انىقتالىپ جاتىر, دەپ حابارلايدى Egemen.kz تجم تەلەگرام كانالىنا سىلتەمە جاساپ.
ەستەرىڭىزگە سالا كەتەيىك, بۇعان دەيىن جوعالعان ورمان شارۋاشىلىعى ءۇش قىزمەتكەرىنىڭ ءمايىتى تابىلعان بولاتىن. وسىلايشا, قازا تاپقاندار سانى 14-كە جەتتى.
ءورتتى سوندىرۋگە تجم, ورمان شارۋاشىلىعى كوميتەتىنەن, جاو جانە قورعانىس مينيسترلىگىنەن 1000-نان استام ادام, شامامەن 237 تەحنيكا جۇمىلدىرىلعان.
11 تىكۇشاق تارتىلدى. تاڭعى ساعات 6.00-دەن باستاپ ءورت وشاقتارىنا اۋەدەن 164 رەت جالپى كولەمى 410 توننا سۋ توگىلدى.
ءورتتى ءسوندىرۋ جۇمىستارى باستالعالى بەرى 263 رەت جالپى كولەمى 590 توننا سۋ توگىلدى.