يرەلەڭدەگەن جىلاننان جاسقانبايتىن جان بولا قويماس. بىراق سالتانات ومىربايقىزى جىلانمەن دوستاسقالى بىرنەشە جىلدىڭ ءجۇزى بولعان.
ونىڭ ايتۋىنشا, العاشقى «باۋىر باسقان» جىلانىن دجاۆاننا دەپ اتاعان ەكەن. الايدا ول ءتورت جىل بۇرىن ءولىپ قالعان. ال ەكىنشى جىلاندى مالايزيادان 1 ملن تەڭگەگە ساتىپ العان.
– ءۇش جىلدان بەرى ءوسىرىپ وتىرمىن. اتى – گرافينيا. قازىر 5 جاستاعى جىلاننىڭ ۇزىندىعى 3 مەترگە, سالماعى 30 كيلوعا جەتتى. جىلان دا جوتەلەدى, ءتۇرلى اۋرۋمەن اۋىرادى. ونى ۋاقىتىندا ەمدەۋ قاجەت. بۇل – قولعا تەز ۇيرەنەتىن تىرشىلىك يەسى. بىراق اشۋلاندىرسا, شاعىپ الۋى عاجاپ ەمەس, – دەيدى سالتانات ومىربايقىزى.
ول جىلاندى ۇيىندەگى ارنايى توردا ۇستايدى. كۇن سايىن شومىلدىرىپ, ەرەكشە كۇتىم جاسايدى. زوودۇكەننەن العان تاعاممەن اپتاسىنا ەكى رەت تاماقتاندىرادى. سۋدى كۇن سايىن بەرەدى.
– جىلاننىڭ ايىنا ءبىر رەت جالقاۋلىعى ۇستايدى. كوزىن اشىپ ۇيىقتايدى. دوستارىم ءتۇرلى باسقوسۋعا بيلەۋگە شاقىرىپ تۇرادى. سونداي باسقوسۋدىڭ بىرىندە قۇسىپ قويىپ, ۇياتقا قالدىردى. تاعى بىردە مەنى تۇنشىقتىرىپ, ەسىمنەن تانىپ قالدىم. ويتكەنى قۇيرىعى ەدەنگە ءتيىپ تۇرسا, وسىنداي ورەسكەل ارەكەتكە بارادى. مۇنىڭ ءبارى شارشاعانىنان بولعان عوي, – دەيدى ول.
سالتانات ومىربايقىزىنىڭ ەكى ءحوببيى بار. ءبىرى – جىلىجايدا ءتۇرلى جەمىس ءوسىرۋ, ال ەكىنشىسى – جىلانمەن بيلەۋ. ويتكەنى بالا كەزىنەن بي ۇيىرمەسىنە قاتىسقان.
اتىراۋ وبلىسى