قانداسقا ارنالعان بىرەگەي كارتا

ەڭبەك جانە حالىقتى الەۋ­مەت­تىك قورعاۋ مينيسترلىگىنىڭ مالى­مەتىنشە, «اتا جولى» كارتاسىن شەتەل قازاقتارىنا بەرۋدەگى ماقساتى – تاريحي وتانمەن بايلانىستى نىعايتۋ, ولاردىڭ الەۋەتىن ارتتىرۋ ءۇشىن ءبىزدىڭ ەلىمىزگە كاسىپكەرلەر مەن تابىستى بيزنەسمەندەردى تارتۋ. كارتا شەتەلدە تۇراتىن ەتنوستىق قازاقتارعا ازاماتتىعىن ساقتاي وتىرىپ بەرىلەدى. سونداي-اق ولار ەل اۋماعىندا 10 جىل مەرزىمگە تۇرۋعا رۇقسات الادى.

«اتا جولى» كارتاسى بار شەتەل قازاقتارى باسقا ەلدىڭ ازاماتى بولا تۇرا قازاقستان ازاماتتارىمەن جانە رەپاتريانتتارمەن تەڭ قۇقىققا يە. بۇل كارتانىڭ مۇمكىندىكتەرى مول. اتاپ ايتقاندا, مەديتسينالىق كومەك, الەۋمەتتىك تولەمدەر مەن قىزمەت كورسەتۋ, ەڭبەك كودەكسىنە جانە «حالىقتىڭ كوشى-قونى تۋرالى» زاڭعا سايكەس ەل اۋماعىندا جۇمىسقا ورنالاسۋ, كاسىپكەرلىك كودەكسكە جانە قازاقستاننىڭ وزگە دە قۇقىقتىق اكتىلەرىنە سايكەس كاسىپكەرلىكپەن اينالىسۋعا, ء«بىلىم تۋرالى» زاڭعا سايكەس مەملەكەتتىك ءبىلىم بەرۋ ۇيىمدارىندا تەگىن ورتا ءبىلىم نەمەسە جوعارى وقۋ ورىندارىندا كونكۋرستىق نەگىزدە وقۋعا جانە جەكە وقۋ ورىندارىندا اقىلى ءبىلىم الۋعا, «ادۆوكاتتىق قىزمەت جانە زاڭ كومەگى تۋرالى» زاڭعا سايكەس مەملەكەت كەپىلدىك بەرگەن زاڭ كومەگىن الۋ, حالىقارالىق شارت­تارعا جانە زاڭنامالىق قۇ­قىق­تىق اكتىلەرىنە سايكەس جەڭىل­دەتىلگەن تارتىپپەن قازاقستان رەسپۋبليكاسىنىڭ ازاماتتىعىن الۋ قۇقىعىن پايدالانا الادى», دەيدى ۆەدومستۆو وكىلدەرى.

ولاردىڭ ايتۋىنشا, «اتا جولى» كارتاسى بار شەتەل قازاق­تارى تەك مەملەكەتتىك ورگاندار مەن جەرگىلىكتى ءوزىن-ءوزى باسقارۋ ورگاندارىنا سايلاۋعا, سايلانۋعا, رەسپۋبليكالىق رەفەرەندۋمعا قاتىسۋعا قۇقىعى جوق جانە مەم­لەكەتتىك قىزمەتكە كىرە المايدى. ال «اتا جولى» كارتاسىنىڭ يەسى قازاقستان ازاماتتىعىن العان جاعدايدا ونىڭ كارتاسى جارامسىز دەپ تانىلادى ەكەن.

رەسمي دەرەكتەرگە سۇيەنسەك, 2023 جىلعى 1 ماۋسىمداعى جاعداي بويىنشا 8 034 ەتنوستىق قازاق تاريحي وتانىمەن تابىسىپ, قانداس مارتەبەسىن العان. ەلىمىزگە كەلگەن ەتنوستىق قازاقتار نەگىزىنەن الماتى (27,8%), ماڭعىستاۋ (12,8%), تۇركىستان (6,4%) جانە جامبىل (4,8%) وبلىستارىنا, سونداي-اق استانا (10,7%), الماتى (8,8%) جانە شىمكەنت (7,1%) قالالارىنا قونىستانعان.

ەستەرىڭىزگە سالا كەتەيىك, قان­داستاردى قونىستاندىرۋعا ەڭبەك كۇشى تاپشى وڭىرلەر انىقتالدى: اقمولا, اباي, قوس­تا­ناي, پاۆلودار, شىعىس جانە سولتۇستىك قازاقستان وبلىستارى.

«وڭىرلەرگە قونىستاندىرۋ 2023 جىلعا ارنالعان قانداستاردى قابىلداۋ كۆوتاسى 1 925 ادامدى قۇ­راي­دى. 2023 جىلعى 1 ماۋ­­­سىم­داعى جاعداي بويىنشا وڭىر­­­لەرگە 787 قانداس قونىس اۋدار­دى.­ قانداستاردىڭ كەلۋى كوبەيگەن كەز­دە ول ايماقتاردا قابىلداۋ ءۇشىن كۆوتا مولشەرى ۇلعايتىلۋى مۇمكىن. جوعارىدا اتالعان وڭىرلەردە قونىستانعان قانداستارعا كوشۋگە سۋبسيديا تۇرىندە مەملەكەتتىك قولداۋ شارا­لارى ۇسىنىلادى – ءبىر مەزگىلدە وتاعاسىنا جانە وتباسىنىڭ ءاربىر مۇشەسىنە 70 اەك (241,5 مىڭ تەڭگە) مولشەرىندە; تۇرعىن ءۇي جالداۋعا جانە كوممۋنالدىق قىزمەتتەرگە اقى تولەۋگە – ءبىر جىل ىشىندە 15-تەن 30 اەك (51,7-دەن 103,5 مىڭ تەڭگەگە دەيىن) مولشەرىندە», دەيدى ەڭبەك جانە حالىقتى الەۋمەتتىك قورعاۋ مينيسترلىگى.