قاراۋسىز بالاعا قاۋىپ كوپ

سوڭعى اپتادا ەرتىس-بايان وڭىرىندە تۇرىپ العان اپتاپ ىستىقتان جۇرت ابدەن مەزى بولدى. كۇندىزگى ۋاقىتتا سىناپ باعاناسى +40 گرادۋسقا دەيىن جەتىپ تۇر. جاز باستالماستان مۇنداي جوعارى تەمپەراتۋرانىڭ تۇراقتى ساقتالۋى اۋا رايى سالقىن كەلەتىن ايماق تۇرعىندارى ءۇشىن قيىندىق تۋدىرىپ وتىر. اسىرەسە جازعى دەمالىسقا شىققان بالالار ۇيگە سىيماي, كوشە قۋالاپ ويىن ىزدەپ كەتەتىنى بار. مۇنداي كەزدە قالا ورتالىقتارىنداعى سۋبۇرقاقتارعا شومىلىپ, قىزىق قۋادى. وكىنىشكە قاراي, قاداعالاۋسىزدىقتىڭ كەسىرىنەن جاقىندا اقسۋ قالاسىندا سۋبۇرقاققا ويناپ جۇرگەن 3 جاسار ءبۇلدىرشىندى ەلەكتر توگى سوعىپ, جەتكىنشەك ەسىنەن تانعان. ونى شاھار تۇرعىندارىنىڭ ءبىرى اۋپىرىمدەپ ءجۇرىپ سۋدان الىپ شىعىپ, جەتىپ ۇلگەرگەن جەدەل جاردەم قىزمەتكەرلەرىنىڭ قولىنا تاپسىرادى. قىزبەن بىرگە ونىڭ اپكەسى دە ءجۇر ەكەن. ابىروي بولعاندا, ول امان قالدى.

اقسۋ تۇرعىندارى بالالار شىعار­ماشىلىعى ءۇيىنىڭ الدىنداعى بۇل سۋبۇرقاقتىڭ جۇمىسىندا كەمشىلىك بار دەپ ەسەپتەيدى. ال نىسانعا جاۋاپتى قالالىق كوممۋنالدىق شارۋاشىلىق بولىمىندەگىلەر بۇعان دەيىن سۋبۇرقاق ءۇزىلىسسىز جۇمىس ىستەپ كەلگەن دەپ اقتالىپ وتىر. وقىس وقيعا بولعان كۇنى تاڭ ەرتەمەن سۋ جۇيەسى مەكەمەسىنىڭ مامانى ونى تەكسەرگەن. باقساق, بۇل سۋبۇرقاقتى جوندەۋگە جانە ۇستاپ تۇرۋعا قالا اكىمدىگى بيىل ەكى مارتە كونكۋرس جاريالاپ, ەكەۋى دە وتپەي قالعان. سوندىقتان كوممۋنالدىق بولىمدەگىلەر سۋ تاراتۋ مەكەمەسىنىڭ قىزمەتكەرلەرىن شاقىرىپ, ماۋسىم ايىنىڭ العاشقى كۇندەرىندە ىسكە قوسادى. «بۇل كۇنى سۋبۇرقاق قالىپتى ىستەپ تۇرعان. ەشقانداي توق كەرنەۋى تىركەلگەن جوق. مۇنداي جاعداي بولاتىنىن ەشكىم كۇتپەگەن ەدى. ويدا جوق جەردەن سۋ سورعىنىڭ قوزعالتقىشى­نا ءتۇسىپ, قىسقا تۇيىقتالۋ جۇر­گەن. ءسويتىپ, ەلەكتر تولقىنى الگى قىز بالا ويناپ جۇرگەن تۇسپەن وتكەن. سۋبۇرقاقتا شومىلىپ جۇرگەن وزگە بالالار زارداپ شەككەن جوق», دەيدى اقسۋ قالالىق تۇرعىن ءۇي-كوممۋنالدىق شارۋاشىلىعى, جولاۋشىلار كولىگى جانە اۆتوكولىك جولدارى ءبولىمىنىڭ باسشىسى ب.ازاماتوۆ.

قازىرگى كۇنى پوليتسەيلەر اتالعان جايت نەگىزىندە قىلمىستىق كودەكستىڭ 254-بابى («مىندەتتەرىنە ادال قارا­ماۋ») بويىنشا ءىس قوزعاعانىن ايتۋ كەرەك. تەرگەۋ-تەكسەرۋ شارالارى اياق­تال­عان سوڭ كىنالىلەر تۇلعالار جاۋاپقا تار­تى­لادى دەپ سەندىرىپ وتىر ءتارتىپ ساقشىلارى.

ايتا كەتەر ءبىر جايت, وقيعا كەزىندە 3 جاسار بالاقاي مەن ونىڭ اپكەسى ۇلكەندەردىڭ باقىلاۋىنسىز جۇرگەن. جالپى, سۋبۇرقاق – شومىلاتىن جەر ەمەس. ەگەر وندا جارىق شامدارى ورنالاسقان بولسا, ءتىپتى قاۋىپتى. ەلەكتر كابەلدەرىنىڭ وقشاۋلانعان تۇستارى كەيدە جىرىلىپ, سۋ تيەتىنى بار. سوندىقتان بالالاردىڭ ونداي جەرلەردە قاراۋسىز جۇرمەۋىن اتا-انالار ۇنەمى قاداعالاۋعا ءتيىس.

پاۆلودار قالالىق پروكۋراتۋرا­سىنىڭ اعا پروكۋرورى اسەل بەيسەنباەۆا سۋبۇرقاقتاردا بالانى باقىلاۋسىز قويا بەرگەنى ءۇشىن اتا-انالار اكىمشىلىك قۇقىق بۇزۋشىلىق كودەكسىنىڭ 127-بابى بويىنشا جاۋاپقا تارتىلاتىنىن ەسكەرتەدى. بۇل – بالاعا دۇرىس تاربيە بەرە الماۋ جانە وعان ءتيىستى كۇتىم جاساي الماۋمەن تەڭەستىرىلگەن جاعداي بولىپ ەسەپتەلەدى. ەرەسەكتەرگە 10 اەك مولشەرىندە, ءبىر جىل ىشىندە قاي­تالانعان جاعدايدا 15 اەك  كولەمىندە ايىپپۇل سالىناتىنىن ءبىلۋ كەرەك.

اقسۋداعى جاعداي پاۆلودار قالا­سى­نىڭ بيلىگى مەن ءتارتىپ ساقشى­لارى­نا ساباق بولسا كەرەك, شاھاردىڭ سۋبۇر­قاقتارىندا باقىلاۋسىز جۇر­گەن بالالاردى انىقتاۋ بويىنشا بىرلەس­كەن رەيد باستالىپ كەتتى. وبلىس ورتالىعىندا 20-عا جۋىق سۋبۇرقاق بار. قالالىق ءبىلىم بەرۋ ءبولىمىنىڭ باسشىسى قۋانىش قىدىرالين ءۇي ۇلكەندەرىنەن جاز ۋاقىتىندا بالالاردى باقىلاۋسىز قالدىرماۋدى سۇراپ وتىر. سەبەبى سۋبۇرقاقتار عانا ەمەس, اشىق سۋ ايدىندارى, ءۇي تەرەزەلەرى دە قاۋىپ كوزى. ەرىكتىلەر مەن قۇتقارۋشىلار ءبىر كۇن ىشىندە وزەندە قاراۋسىز شومىلىپ جۇرگەن 15 ءجاسوسپىرىمدى ۇيلەرىنە قايتارعان. ءتىلسىز جاۋ بالالاردى قويىپ, ەرەسەكتەر ءۇشىن دە وتە قاۋىپتى. وتكەن اپتادا عانا ەكىباستۇزدا رۇقسات ەتىلمەگەن جەردە سۋعا تۇسكەن ەر ادام باتىپ كەتتى. مۇنداي قايعىلى جاعدايلار قايتالانباس ءۇشىن جابدىقتالماعان جاعالاۋلاردا سۋعا تۇسۋگە بولمايتىنىن ايتادى ماماندار.

پاۆلودار وبلىسى