«ورتالىق ازيا – ەۋروپالىق وداق» ءسامميتى اياسىندا مەملەكەت باسشىسى ەۋروپالىق كەڭەس پرەزيدەنتى شارل ميشەلمەن كەزدەسۋ وتكىزدى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
قاسىم-جومارت توقاەۆ شارل ميشەلگە ءىلتيپات بىلدىرە وتىرىپ, قازاقستان ەۋروپالىق وداقپەن ستراتەگيالىق سەرىكتەستىككە باسا ءمان بەرەتىنىن اتاپ ءوتتى. ەلىمىزدىڭ ەۋروپالىق وداقپەن جاساعان كەڭەيتىلگەن سەرىكتەستىك جانە ىنتىماقتاستىق تۋرالى كەلىسىمى بەرىك قارىم-قاتىناستاردىڭ جاڭا كەزەڭىنە جول اشتى. بۇگىندە ەۋرووداق – قازاقستاننىڭ جەتەكشى ساۋدا سەرىكتەسى جانە ەكونوميكامىزدىڭ ەڭ ءىرى ينۆەستورى.
ءوز كەزەگىندە شارل ميشەل ەۋرووداق پەن قازاقستان اراسىنداعى ىنتىماقتاستىقتىڭ قارقىندى دامىپ كەلە جاتقانىن جوعارى باعالاپ, ءوزارا قارىم-قاتىناستى ودان ءارى دامىتۋ ءۇشىن بىرلەسە جۇمىس ىستەۋ كەرەك ەكەنىن اتاپ ءوتتى.
سونداي-اق ولار جاھاندىق جانە وڭىرلىك كۇن تارتىبىندەگى ماسەلەلەر جونىندە پىكىر الماستى.